३४१ मेगावाट क्षमताको बूढीगण्डकी जलविद्युत् आयोजना निर्माणका लागि आवश्यक वित्तीय स्रोत जुटिएको छ। साहस उर्जा मुख्य साझेदार रहेको टाइम्स इनर्जीको प्रवर्द्धनमा बन्ने यस आयोजना निर्माणका लागि १० वटा बैंक तथा वित्तीय संस्थाले ऋण उपलब्ध गराउने सम्झौता भएको हो।

करीब ७० अर्ब रुपैयाँ लागत अनुमान गरिएको आयोजनामा ५२ अर्ब ५० करोड रुपैयाँ (७५ प्रतिशत) ऋणमार्फत जुटाइने छ भने बाँकी २५ प्रतिशत अर्थात् १७ अर्ब ५० करोड रुपैयाँ प्रवर्द्धक कम्पनीले स्वपुँजीका रूपमा लगानी गर्नेछ। सम्झौतामा टाइम्स इनर्जीका सुशील थापा र लगानीको नेतृत्व गरेको नेपाल इन्भेस्टमेन्ट बैंकका प्रमुख कार्यकारी अधिकृत ज्योतिप्रकाश पाण्डेले हस्ताक्षर गरेका छन्।

ऋण लगानीमा नेपाल इन्भेस्टमेन्ट बैंकले १० अर्ब रुपैयाँ, नबिल बैंक र लक्ष्मी सनराइज बैंकले ८/८ अर्ब रुपैयाँ, ग्लोबल आइएमई बैंकले ७ अर्ब, हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेड (एचआइडिसिएल) र माछापुच्छ्रे बैंकले ४/४ अर्ब, सिटिजन्स बैंक, नेपाल इन्फ्रास्ट्रक्चर बैंक र प्रभु बैंकले ३/३ अर्ब र कृषि विकास बैंकले २ अर्ब ५० करोड रुपैयाँ ऋण दिने प्रतिबद्धता जनाएका छन्।

सम्झौता अनुसार पाँच वर्ष चार महिनाभित्र ऋण भुक्तानी गर्ने व्यवस्था गरिएको छ। यसअघि प्रवर्द्धक कम्पनी र नेपाल विद्युत् प्राधिकरणबीच विद्युत् खरिद–बिक्री सम्झौता (पीपीए) भइसकेको छ। पीपीए अनुसार वर्षायाममा प्रतियुनिट ४ रुपैयाँ ८० पैसा, सामान्य सुक्खायाममा ८ रुपैयाँ ४० पैसा र मुख्य सुक्खायाममा १० रुपैयाँ ५५ पैसा दरमा विद्युत् खरिद हुनेछ।

परियोजना प्रतिमेगावाट २० करोड ५३ लाख रुपैयाँमा निर्माण हुनेछ। यसबाट वर्षायाममा १,३०४.०४ गिगावाट, सामान्य सुक्खायाममा २४३.४३ गिगावाट र मुख्य सुक्खायाममा ३२०.३० गिगावाट विद्युत् उत्पादन हुनेछ। टाइम्स इनर्जीमा साहस ऊर्जाको ५१ प्रतिशत सेयर स्वामित्व रहेको छ।

सम्झौता समारोहमा टाइम्स इनर्जीले आगामी भदौदेखि बाँध र पावरहाउसका लागि जग्गा तयार गर्ने काम सुरु गर्ने र चैत महिनाबाट निर्माण कार्य थाल्ने जनाएको छ। आयोजना २०८७ साल पुस १५ गतेदेखि व्यावसायिक उत्पादनमा ल्याउने लक्ष्य लिइएको छ। उत्पादित विद्युत् ४५ किलोमिटर टाढा नुवाकोटको रातामाटे सबस्टेशनमा जोडिनेछ, जसको निर्माण मिलेनियम च्यालेन्ज कर्पोरेशन (एमसीसी) को सहयोगमा भइरहेको छ।

आयोजनाअन्तर्गत गोरखा जिल्लाको चुमनुब्री गाउँपालिका–३ सल्लेरीमा बाँध निर्माण गरी ६.९ किलोमिटर सुरुङमार्फत पानी धार्चे गाउँपालिका–३ तातोपानीस्थित पावरहाउसमा पठाइनेछ। टाइम्स इनर्जीले यसअघि निजी क्षेत्रकै सबैभन्दा ठूलो ८६ मेगावाटको सोलुखोला दूधकोशी जलविद्युत् आयोजना सम्पन्न गरिसकेको छ भने हाल २८५ मेगावाट क्षमताको माथिल्लो तमोर जलविद्युत् आयोजना निर्माणरत छ।

यो आयोजना सुरु भएपछि निजी क्षेत्रबाट सञ्चालित नेपालकै सबैभन्दा ठूलो जलविद्युत् आयोजनाको रूपमा बूढीगण्डकी परियोजनाको नाम दर्ता हुनेछ।