काठमाडौं । नेपाली चलचित्र उद्योगमा नयाँ उत्साह थप्ने उद्देश्यसहित निर्माण हुन लागेको चलचित्र ‘तीन तीघ्रे क्या बिग्रे’ को औपचारिक घोषणा गरिएको छ। रघुजी फिल्म्सको ब्यानरमा निर्माण हुन लागेको यस चलचित्रको शुभारम्भ भक्तपुरस्थित प्रसिद्ध सूर्यविनायक गणेश मन्दिर मा स्क्रिप्ट पूजा गरेर गरिएको हो।

लेखक तथा निर्देशक अमरदीप सापकोटा को लेखन तथा निर्देशन रहने चलचित्रले हास्यप्रधान कथावस्तुका साथ नेपाली दर्शकलाई भरपुर मनोरञ्जन प्रदान गर्ने निर्माण पक्षको दाबी छ। चलचित्रको छायांकन आगामी असार महिनाको अन्तिम सातादेखि सुरु गर्ने तयारी भइरहेको जनाइएको छ भने हाल प्रि–प्रोडक्सनका सम्पूर्ण कामहरू तीव्र गतिमा अगाडि बढाइएका छन्।

यस चलचित्रको विशेष आकर्षणका रूपमा नेपाली लोक तथा आधुनिक संगीत क्षेत्रमा स्थापित नाम पशुपति शर्मा पहिलोपटक चलचित्र अभिनयमा देखिने भएका छन्। दशकौँदेखि गायन, संगीत तथा सांगीतिक सिर्जनामार्फत दर्शकमाझ लोकप्रिय बनेका शर्माले अब अभिनयमार्फत नयाँ यात्रा सुरु गर्न लागेका हुन्। उनको चलचित्र प्रवेशलाई लिएर दर्शक तथा संगीत क्षेत्रका व्यक्तिहरूमा समेत उत्सुकता बढेको छ।

त्यस्तै, चर्चित गायिका अञ्जु पन्त की छोरी परितोषिका पन्त ले पनि यही चलचित्रमार्फत अभिनय क्षेत्रमा औपचारिक डेब्यु गर्ने भएकी छन्। संगीत परिवारमा हुर्किएकी परितोषिकाको अभिनय यात्रालाई नेपाली चलचित्र क्षेत्रले चासोका साथ हेरेको छ। निर्माण टिमका अनुसार चलचित्रमार्फत केही अन्य नयाँ तथा प्रतिभाशाली कलाकारहरूले समेत अभिनय यात्रा सुरु गर्नेछन्। यद्यपि उनीहरूको नाम भने निर्माण पक्षले हालसम्म सार्वजनिक गरेको छैन।

निर्देशक अमरदीप सापकोटाले चलचित्रलाई पूर्ण मनोरञ्जनात्मक कमेडी प्याकेजका रूपमा तयार पारिने बताएका छन्। उनका अनुसार समाजका विभिन्न पात्र र प्रवृत्तिलाई हास्य शैलीमा प्रस्तुत गर्दै दर्शकलाई हँसाउने मात्र होइन, जीवनका केही यथार्थ पक्षसमेत कथामार्फत उजागर गरिनेछ।

चलचित्रका निर्माता रघुनाथ सापकोटा ले रघुजी फिल्म्सले यसअघि घोषणा गरेका केही चलचित्र प्रोजेक्ट प्राविधिक तथा व्यवस्थापकीय कारणले केही समय पछाडि सार्नुपरेको जानकारी दिए। उनले अहिले ‘तीन तीघ्रे क्या बिग्रे’ लाई प्राथमिकतामा राखेर निर्माण प्रक्रिया अगाडि बढाइएको र यसपछि अन्य योजनाहरू पनि क्रमशः कार्यान्वयनमा आउने बताए।

वितरण व्यवस्थापनका हिसाबले पनि चलचित्रले प्रारम्भिक चरणमै महत्वपूर्ण साझेदारी पाएको छ। चलचित्रको नेपालभित्रको वितरण अधिकार आरआर फिल्म्स ले लिएको छ भने डिजिटल प्रदर्शन अधिकार ओएसआर डिजिटल ले प्राप्त गरेको निर्माण पक्षले जनाएको छ। विदेशी बजारमा समेत चलचित्रप्रति चासो देखिएको बताइएको छ। विभिन्न अन्तर्राष्ट्रिय वितरकहरूले सम्पर्क गरिरहेको भए पनि निर्माण कार्य सम्पन्न भएपछि मात्र विदेश वितरणबारे अन्तिम निर्णय गरिने जनाइएको छ।

नयाँ कलाकारहरूको आगमन, लोकप्रिय गायक पशुपति शर्माको अभिनय डेब्यु, परितोषिका पन्तको पहिलो चलचित्र तथा कमेडी शैलीको मनोरञ्जनात्मक प्रस्तुति रहने भएकाले ‘तीन तीघ्रे क्या बिग्रे’ अहिले नै नेपाली चलचित्र वृत्तमा चर्चाको विषय बनेको छ। निर्माण पक्षले आगामी दिनमा कलाकार, प्राविधिक टिम तथा कथावस्तुसम्बन्धी थप जानकारी सार्वजनिक गर्ने तयारी गरेको जनाएको छ।