गृह मन्त्रालयमा शुक्रबार बिहान गृहमन्त्री सुधन गुरुङ तथा मृतक ओमप्रकाश मेहता र जयप्रकाश मेहताका परिवारबीच लिखित सम्झौतामा हस्ताक्षर भएको हो। पीडित परिवारका तर्फबाट ओमप्रकाशका अभिभावक कुशदेव मेहता र जयप्रकाशका अभिभावक नरेश मेहताले सम्झौतापत्रमा हस्ताक्षर गरेका छन्।

बिहीबार रातिदेखि लगातार चलेको वार्तापछि शुक्रबार बिहान करिब ५ बजे सहमति जुटेको सरकारी स्रोतले जनाएको छ। सहमतिसँगै अस्पतालमा रहेका दुवै मृतकका शव परिवारले बुझ्ने भएका छन् भने उनीहरूको अन्त्येष्टि शुक्रबार दिउँसो २ बजे गरिने तय भएको छ।

शहीद घोषणा प्रक्रिया अघि बढाइने

सम्झौताअनुसार सरकारले गोलीकाण्डमा ज्यान गुमाएका ओमप्रकाश मेहता र जयप्रकाश मेहतालाई शहीद घोषणा गर्ने प्रक्रिया तत्काल सुरु गर्ने प्रतिबद्धता जनाएको छ। साथै, मृतकका परिवारलाई जनही १० लाख रुपैयाँ राहत उपलब्ध गराइनेछ।

यसका अतिरिक्त प्रत्येक मृतक परिवारका एक–एक जना योग्य सदस्यलाई रोजगारीको अवसर उपलब्ध गराउने सहमति पनि भएको छ।

निष्पक्ष छानबिन र दोषीमाथि कारबाहीको प्रतिबद्धता

सम्झौतामा घटनाको निष्पक्ष, स्वतन्त्र र प्रभावकारी छानबिन गरी दोषीमाथि प्रचलित कानुनअनुसार तत्काल कारबाही प्रक्रिया अघि बढाइने उल्लेख गरिएको छ। यसअघि गठन गरिएको छानबिन समितिले पेस गर्ने प्रतिवेदनका सुझाव तथा सिफारिसहरूलाई पनि कानुनी प्रक्रियाअनुसार शीघ्र कार्यान्वयन गर्ने प्रतिबद्धता सरकारले जनाएको छ।

मदरसाको कानुनी हैसियतबारे पनि अनुसन्धान

घटनासँग जोडिएको विषयलाई ध्यानमा राख्दै देवानगञ्ज गाउँपालिका–३ स्थित मदरसाको कानुनी हैसियत तथा त्यससँग सम्बन्धित विषयमा आवश्यक अनुसन्धान तत्काल सुरु गरिने सहमतिमा उल्लेख छ।

स्मृति पार्क निर्माण गरिने

दुवै मृतकको सम्झनामा स्थानीय सरकारसँग समन्वय गरी गाउँपालिकाको उपयुक्त स्थानमा स्मृति पार्क निर्माण गर्ने निर्णय पनि सहमतिपत्रमा समावेश गरिएको छ।

सहमतिका मुख्य बुँदाहरू

• मृतक ओमप्रकाश मेहता र जयप्रकाश मेहतालाई शहीद घोषणा गर्ने प्रक्रिया तत्काल अघि बढाइने।
• मृतकका परिवारलाई जनही १० लाख रुपैयाँ राहत उपलब्ध गराइने।
• घटनाको निष्पक्ष छानबिन गरी दोषीमाथि कानुनबमोजिम कारबाही गरिने।
• देवानगञ्ज–३ स्थित मदरसाको कानुनी हैसियत र सम्बन्धित विषयमा अनुसन्धान सुरु गरिने।
• प्रत्येक मृतक परिवारका एक जना योग्य सदस्यलाई रोजगारीको अवसर प्रदान गरिने।
• छानबिन समितिको प्रतिवेदनका सुझाव तथा सिफारिस शीघ्र कार्यान्वयन गरिने।
• मृतकद्वयको सम्झनामा गाउँपालिकामा स्मृति पार्क निर्माण गरिने।

सरकार र पीडित परिवारबीच सहमति भएपछि केही दिनदेखि सुनसरीमा जारी तनाव मत्थर हुने अपेक्षा गरिएको छ। अब घटनाको निष्पक्ष छानबिन, दोषीमाथिको कानुनी कारबाही तथा सहमतिका बुँदाहरू प्रभावकारी रूपमा कार्यान्वयन हुने विषयलाई स्थानीयवासीले चासोका साथ हेरिरहेका छन्।