जिपी कोईराला फाउन्डेशन अमेरिकाकाे न्यूयोर्क च्याप्टरले आयोजना गरेको वृहद रक्तदान कार्यक्रम न्यूयोर्कको क्विन्सस्थित उडसाइडमा रहेको आफ्नै कार्यालय परिसरमा सफलतापूर्वक सम्पन्न भएको छ। न्यूयोर्क ब्लड सेन्टरको सहकार्यमा आयोजित कार्यक्रम विहान ११ बजेदेखि साँझ ६ बजेसम्म निरन्तर सञ्चालन भयो।

अनलाइनमार्फत ९२ जनाले सहभागिताको स्वीकृति दिएकोमा विभिन्न कारणले केही उपस्थित हुन नसके पनि, स्वास्थ्य परीक्षणका कारण केही असफल भए पनि ६१ जनाले उत्साहपूर्वक रक्तदान गर्न सफल भएका थिए। फाउन्डेशनका अनुसार एक पिन्ट (५०० मिलिलिटर) रक्तदानले तीन जनाको जीवन रक्षा गर्न सकिने भएकाले यस अभियानलाई मानवीय सेवाको रूपमा अघि बढाइएको हो।

कार्यक्रम सफलतापूर्वक सञ्चालन गर्न फाउन्डेशनका अध्यक्ष सोमनाथ घिमीरे, पदाधिकारी राजेश आचार्य, प्रेम अधिकारी क्षेत्री, सुर्य सिंमखडा, फुदोमा शेर्पा, हिरा तामाङ, स्वयंसेवकहरू शेखर कार्की, टेक कार्की, लाक्पा शेर्पा, तुला शेर्पा गुरुङ, डा. रमेश चित्रकार लगायत प्रारम्भदेखि नै सक्रिय थिए। न्यूयोर्क ब्लड सेन्टरको वातानुकूलित विशेष बसमा चार वटा बेडको प्रयोग गर्दै लगातार रक्त संकलन गरियो। स्वयंसेवकहरूले दर्तादेखि खाद्यान्न, फलफूल, चियापान र व्यवस्थापनमा महत्वपूर्ण भूमिका निभाए।

समाजसेवी रविन बज्राचार्य र प्रोफेसर शर्मिला शाक्यले फलफूल तथा अण्डा प्रायोजन गरी योगदान दिए। नेपाली रेष्टुरेन्ट ‘टेस्ट अफ नेपाल’, ‘न्यु नेपाली मम क्याफे’ का संचालक रेखा श्रेष्ठ र हरी पुनले खाना प्रायोजन गर्दै सहयोग जनाए। नेपाल आमा सोसाइटी अफ हेल्पिङ ह्यान्ड्सकी अध्यक्ष शर्मिला सेरचनले १५० जनाका लागि जुस प्रायोजन गरिन्।

कार्यक्रम संयोजक ध्रुव कुँवर क्षेत्रीले नेतृत्व गरेको यो अभियानमा एनआरएनए अमेरिकाकी सचिव लक्ष्मी थापा, कम्युनिटी नेता उर्गेन शेर्पा, क्विन्स रोटरी क्लबका अध्यक्ष कर्मा लामा, सुदूरपश्चिम समाज अमेरिकाका पूर्व अध्यक्ष तथा सल्लाहकार रामबहादुर देउवा लगायतले रक्तदान गर्दै सहयोग जनाए।

त्यसैगरी न्युयोर्क सिटी मेयर कार्यालयका दक्षिण एसियाली सम्पर्क निर्देशक शुकरानी धनपत, आप्रवासी मामिला कार्यालयका माइकल ह्सिह, एनवाइसी कम्प्ट्रोलर–इलेक्ट्र मार्क लेभिनको ट्रान्जिसन टिम सदस्य दिलीप नाथ, संयुक्त राष्ट्रसंघीय धार्मिक समिति महासचिव दिलीपकुमार थंकप्पन, अन्तर्राष्ट्रिय सारी सङ्ग्रहालयका संस्थापक अध्यक्ष अश्विनी पर्साद, सारंगी वादक उस्ताद कमल साब्री, पाकिस्तानी–अमेरिकन सोसाइटीका नेता अनवर मोहम्मद लगायतको उपस्थिति उल्लेखनीय थियो।

अध्यक्ष सोमनाथ घिमीरेले कोरोना महामारीदेखि अहिलेसम्म सयौँ समाजसेवी कार्यक्रम सफलतापूर्वक सम्पन्न गर्दै आएको उल्लेख गर्दै पहिलो पटकको रक्तदान कार्यक्रम लक्ष्यभन्दा बढी सफल भएकोमा खुशी व्यक्त गरे। उपाध्यक्ष सुवर्ण लामाले गिरीजा प्रसाद कोईरालाको सहमति, सहकार्य र एकताको विचार आज पनि आवश्यकीय रहेको भन्दै प्रवासमा बसेर स्थानीय समुदायका लागि सेवा प्रदान गर्नु फाउन्डेशनको प्राथमिकता हो भने।

फाउन्डेशनका प्रवक्ता रामचन्द्र अधिकारीले समाजका इच्छुक रक्तदाताहरूसँग निरन्तर संवाद र समन्वय नै आजको भव्य सफलताको कारण भएको बताए। संयोजक ध्रुव कुँवर क्षेत्रीले कार्यक्रम सभ्य, सुरक्षित र व्यवस्थित ढंगले सम्पन्न भएको उल्लेख गर्दै सबै रक्तदाता, स्वयंसेवक, संघ–संस्था, प्रायोजक, सञ्चारकर्मी तथा फाउन्डेशन परिवारप्रति हार्दिक आभार व्यक्त गरे।

यस अवसरले फाउन्डेशन अमेरिकालाई समुदायमा सेवा, सहयोग र मानवीय कार्यमा अझ सक्रिय रहन प्रेरणा दिएको आयोजकहरूको भनाइ छ।