अमेरिकाको मिनेसोटामा २५० मिलियन डलरको ‘कोरोना राहत’ घोटाला : “बच्चाहरूको भोकको सौदा गरी महल र विलासी गाडी किनिए”

वाशिङटन, जुलाई १८/ कोरोना महामारीको समयमा अमेरिकी संघीय सरकारबाट बालबालिकाको पोषण कार्यक्रममार्फत दिइएको रकमको दुरुपयोग गर्दै गरिएको २५० मिलियन डलरभन्दा बढीको ठगीलाई एफबीआई निर्देशक काश पटेलले “मिनेसोटा इतिहासकै सबैभन्दा घिनलाग्दो घोटालामध्ये एक” भनेर टिप्पणी गरेका छन्।

एफबीआई निर्देशक पटेलले विज्ञप्तिमा भने, “कोरोना महामारीको समयमा ‘Feeding Our Future’ नामक कार्यक्रमको आडमा गरिएको ठगीमा संलग्न ७० जनालाई अभियोग लगाइएको छ। तीमध्ये ३८ जनाले दोष स्वीकार गरिसकेका छन् भने एक दर्जनभन्दा बढीको मुद्दा बाँकी छ। आगामी अगस्ट ११ बाट अर्को मुद्दाको सुनुवाइ सुरु हुँदैछ।”

उनका अनुसार, ठग समूहले लाखौं बच्चाहरूलाई खाना खुवाएको झुटो दाबी गरे तर वास्तवमा उक्त पैसा निजी सम्पत्तिको किनमेलमा खर्च भयो। उनीहरूले जाली बिल, नक्कली उपस्थिति विवरण र झुटा वितरण रिपोर्टमार्फत बालपोषण राहत रकम झिके।

काश पटेलले भने, “महामारीको संकटको बेला भोकै बालबालिकाको नाममा राहत रकम लुटेर महल र विलासी गाडी किन्नु जति निर्दयी र बेशरम कुरा अरु हुन सक्दैन। एफबीआई र हाम्रा सहकार्य संस्थाहरूको मेहनतले यस ठगीको जालो तोड्न सफल भयो र कडा सन्देश दिएको छ— कमजोरहरूको नाममा चलखेल गर्नेहरू उम्कन सक्दैनन्।”

झुटा खाद्य वितरण केन्द्र खोलियो, तर खाना वितरण भएन

अभियोग अनुसार, ३०० भन्दा बढी ‘खाद्य वितरण केन्द्र’ खोलिएको भनिए पनि तीमध्ये अधिकांशले खाना नै वितरण गरेका थिएनन्। बाँडिएको भनिएको हजारौं खाना वितरणको रेकर्ड मात्र कागजमा थियो। कृषि मन्त्रालयले महामारीको अवधिमा केही मापदण्डहरू खुकुलो बनाएको फाइदा उठाउँदै उनीहरूले वितरणकर्ताको रूपमा भाग लिएका थिए।

अमेरिकाको संघीय सरकारी ‘Child Nutrition Program’ अन्तर्गत आउने रकम कपटपूर्वक मागेर लिइएको र पैसा सिधै जाली संस्था, व्यक्ति तथा ठेकेदारमार्फत फिर्ता लिने ‘मनी लॉन्डरिङ’ गरेको प्रमाण फेला परेको हो।

एफबीआईको कारबाही र नयाँ कानुनी सुधार

एफबीआईका विशेष एजेन्ट अल्विन विन्स्टनले भने, “संघीय सरकारलाई ठग्नु भनेको अमेरिकी जनतालाई ठग्नु हो। यसमा कुनै दोधार छैन।” उनका अनुसार, यस्तो भयानक घोटालाले जनताको विश्वासमा ठूलो धोका पुर्‍याएको छ। उनले थपे, “हामी यस्ता गिरोहको योजनाहरू पत्ता लगाउँछौं, उनीहरूको नेटवर्क भंग गर्छौं, र कानुन अनुसार कडा सजाय दिलाउँछौं।”

यो घटनाले मिनेसोटा राज्यको भित्रको भ्रष्टाचार उजागर मात्र गरेको छैन, यसले राज्यको कानुन सुधारतर्फ पनि दबाब बढाएको छ। अधिकारीहरूका अनुसार अनुसन्धान अझै जारी छ र थप अभियोग लाग्ने सम्भावना छ।