अरब सागरमा आगो लागेको सिंगापुर झण्डावाहक कार्गो जहाजमा भारतको तटरक्षक दलको उद्धार प्रयास जारी, ४ जना अझै बेपत्ता

भारतको केरल राज्यको समुद्री किनार नजिकै अरब सागरमा आगलागी भएको सिंगापुरको झण्डा बोकेको मालवाहक जहाजमा भारतीय तटरक्षक दलले आगो निभाउने प्रयास जारी राखेको छ।

‘MV Wan Hai 503’ नामको जहाज श्रीलंकाको कोलम्बोबाट भारतको मुम्बईतर्फ जाँदै थियो। सोमबार जहाजभित्रै कन्टेनर विस्फोट भएपछि ठूलो आगो लागेको रिपोर्ट गरिएको हो।

जहाजमा रहेका २२ जना क्रूमध्ये १८ जनाको उद्धार गरिएको छ भने ४ जना अझै हराइरहेका छन्। उद्धार कार्यमा सहयोग गर्न सिंगापुरले आफ्नो टोली पठाएको छ।

भारतीय राष्ट्रिय महासागर सूचना सेवा केन्द्र (INCOIS) ले सम्भावित तेल चुहावट र जहाजबाट खसेका टुक्रा किनारमा पुग्न सक्ने भन्दै केरलको समुद्री क्षेत्रमा सतर्कता जारी गरेको छ।

मंगलबार सार्वजनिक भिडियो फुटेजमा MV Wan Hai 503 बाट बाक्लो धुवाँ निस्किरहेको देखिन्छ, जहाँ भारतीय नौसेना र तटरक्षक दल मिलेर आगो नियन्त्रणमा लिने प्रयास गर्दै थिए।

तटरक्षक दलका अनुसार जहाजमा आगो र विस्फोट क्रमशः जारी छन्।

सोमबारको खोज तथा उद्धार अभियानमा १८ जना क्रूलाई समुद्रबाट सुरक्षितरूपमा किनारमा ल्याइएको थियो, जसमा केही घाइतेको उपचार भइरहेको छ।
आगो लागेपछि क्रू सदस्यहरूले जहाज त्यागेर डुंगाबाट भागेका थिए, त्यसपछि भारतीय नौसेनाले उनीहरूलाई उद्धार गरेको भारतको रक्षा मन्त्रालयले जनाएको छ।

सिंगापुरको समुद्री तथा बन्दरगाह प्राधिकरण (MPA) का अनुसार हराइरहेका ४ जना मध्ये २ जना ताइवानका, १ जना म्यानमारका र १ जना इन्डोनेसियाली नागरिक हुन्। प्राधिकरणले आफ्नो उद्धार टोली भारत पठाइसकेको जानकारी दिएको छ।

केरल राज्यका बन्दरगाह मन्त्री भीएन वसावन का अनुसार जहाजबाट ५० वटा कन्टेनर समुद्रमा खसेका छन्।

स्थानीय मिडिया मथ्रुभूमि न्यूज का अनुसार जहाजमा १०० टन बंकर तेल लोड गरिएको थियो। मनोरमा न्यूज लाई INCOIS ले दिएको जानकारी अनुसार खसेका कन्टेनरहरू केरलको किनारतर्फ बगिरहेको र आउँदो तीन दिनभित्र किनारमा पुग्न सक्ने सम्भावना रहेको छ।

यो घटनासँगै केरल तटमा पछिल्लो ३ हप्तामा दोस्रोपटक यस्तो समुद्री दुर्घटना भएको हो। अघिल्लो महिनामात्रै लिबेरियाको झण्डा बोकेको एउटा तेल र खतरनाक सामान बोक्ने जहाज अरब सागरमै चुहावट भएर डुबेको थियो, जसले स्थानीय जनस्वास्थ्य र समुद्री जीवजन्तुमा असर पर्ने डर सिर्जना गरेको थियो।

त्यस घटनापछि राज्य सरकारले जहाज डुबेको स्थानको २० नौटिकल माइल क्षेत्रभित्र माछा मार्न प्रतिबन्ध लगाएको थियो र प्रभावित चार जिल्लाका माछा मार्ने समुदायलाई राहतको घोषणा गरेको थियो।

केरल राज्यको समुद्री तट जैविक विविधताले भरिपूर्ण छ र यो राज्य भारतको प्रमुख पर्यटकीय गन्तव्यहरूमध्ये एक हो।