अस्ट्रियाको ग्राज शहरस्थित डाइअरशुटसेनगासे माध्यमिक विद्यालयमा भएको भयावह गोलीकाण्डमा ११ जनाको ज्यान गएपछि देशभर शोकको वातावरण छ। मंगलबार बिहान करिब १०:०० बजे भएको यो आक्रमणमा एक २१ वर्षीय पूर्व विद्यार्थीले अन्धाधुन्ध गोली चलाएका थिए।
उक्त युवक विद्यालयमा स्नातक नभएको पुष्टि भएको छ। उनले कानुनी रूपमा दर्ता गरिएका दुई बन्दुक प्रयोग गरेका थिए र आक्रमणपछि विद्यालयको शौचालयमा आत्महत्या गरेका थिए। प्रहरी अनुसार ती आक्रमणकारी पहिले कहिल्यै कानुनी निगरानीमा थिएनन्।
शुरुमा सात महिला र तीन पुरुषको मृत्यु भएको पुष्टि भएको थियो। पछि घाइते एक महिलाको अस्पतालमा उपचारका क्रममा ज्यान गएपछि मृतक संख्या ११ पुगेको हो। घटनामा १२ जना घाइते भएका छन्, जसमा दुईको अवस्था अत्यन्त गम्भीर छ भने पाँच जना गम्भीर घाइते छन्।
स्थानीय बासिन्दाहरूले पहिलो पटक १०–१५ गोली चलेको आवाज सुनेको, त्यसपछि केही क्षण शान्ति रह्यो र फेरि गोली चल्न सुरु भएको बताएका छन्। गोलीबारी विद्यालयको बाहिरी भाग र दोस्रो तलाका दुई कक्षामा भएको थियो।
अस्ट्रियाका चान्सलर क्रिश्चियन स्टोकरले घटनालाई “देशको इतिहासको एक कालो दिन” भनी सम्बोधन गर्दै तीन दिनको राष्ट्रिय शोक घोषणा गरेका छन्। बुधबार बिहान १०:०० बजेबाट एक मिनेटको मौनधारण गर्ने निर्णय गरिएको छ।
घटनापछि ग्राजका बासिन्दाहरू रक्तदानका लागि लाम लागिरहेका छन्। अस्ट्रियन रेडक्रस र फुटबल क्लब एसके स्टर्म ग्राजले रक्तदान केन्द्र सञ्चालनमा ल्याएका छन्। क्लबका अधिकारीले भनेका छन्, “हामी सानो भए पनि योगदान दिन चाहन्छौं।”
विद्यालय नजिकैको क्षेत्रमा शोकमा डुबेका परिवारहरू एकआपसमा अँगालो मारेर रोइरहेका देखिएका छन्। एक आमाले आफ्ना छोरा सुरक्षित रहेको जानकारी पाए पनि अझै मन नशान्त भएको बताइन्। उनले भनिन्, “त्यो क्षण एकदमै डरलाग्दो थियो—जब तपाईं घरमा बसिरहनुहुन्छ र थाहा छैन तपाईंको बच्चा सुरक्षित छ कि छैन।”
यो गोलीकाण्ड अस्ट्रियाको पछिल्लो समयको इतिहासमा सबैभन्दा भयावह विद्यालय आक्रमण हुनसक्ने बताइएको छ। यद्यपि ग्राज अस्ट्रियाको दोस्रो ठूलो शहर हो, तर यहाँका बासिन्दाहरू एक–अर्कालाई चिन्छन् भन्ने सामाजिक सम्वन्धले गर्दा घटना झन् पीडादायक बनेको छ।
(१० भाषामा अमेरिकाबाट प्रकाशित, निष्पक्ष, स्वतन्त्र, संसारका १७५ भन्दा बढी देशमा पढिने पत्रिका) Old Archive > 
प्रतिक्रिया