काठमाडौं, नेपाल / देशभक्त, राष्ट्रवादी नेपालीहरू तथा जेन्जी पुस्ताको अस्मिता जोगाउने अभियानमा आबद्ध युवाहरू एउटै मञ्चमा एकताबद्ध भइरहेका बेला, सत्य र न्यायको खोजी अभियानका अध्यक्ष ध्रुवलाल श्रेष्ठले जारी गरेको प्रेस विज्ञप्तिले देशको राजनीतिक, न्यायिक र प्रशासनिक संरचनामा गहिरो प्रश्न उठाएको छ।

श्रेष्ठका अनुसार, राज्य शक्तिको दुरुपयोग, सरकारी तहमा हुने संगठित भ्रष्टाचार, राज्य आक्रान्त प्रवृत्ति र दण्डहीनता विरुद्ध उठेको पहिलो जेन्जी आन्दोलनलाई मध्यरातमा दमन गरी, अहिले अवैध रूपमा बनेको अन्तरिम सरकारले आन्दोलनका हत्यारा र योजनाकारलाई कारबाही गर्नुको सट्टा “सुरक्षा कवच” प्रदान गरिरहेको आरोप लगाइएको छ। यही परिस्थितिमा सुरु भएको दोस्रो जेन्जी आन्दोलनमा अदृश्य शक्तिहरूको घुसपैठ भई राष्ट्रिय सम्पदामा ठूलो क्षति हुन सक्ने उच्च सम्भावना रहेको चेतावनी वक्तव्यमा दिइएको छ।

अन्तरिम सरकारका चालबाजी र न्यायिक नेतृत्वमाथिको आरोप

विज्ञप्तिमा भनिएको छ – पूर्व गठबन्धन सरकारले नियुक्त गरेका न्यायिक नेतृत्वमा रहेका केही व्यक्तिहरू अदृश्य शक्तिको योजनाअनुसार पुनः जेन्जीहरूलाई झुक्याई सत्ताको नेतृत्व कब्जा गर्न दगुर्दै छन्। उनीहरूले जेन्जीहरूकै हत्यारा प्रवृत्ति भएका समूहको चाकरी गर्दै, “हाम्रो नेतृत्वमै पुराना शक्तिहरू कानुनी शिकंजाबाट जोगिन्छन्” भन्ने भ्रम छर्न खोजिरहेको आरोप लगाइएको छ।

मिडियामा भ्रम फैलाउने प्रयास भइरहेको भन्दै, यसतर्फ सबै राष्ट्रवादी युवाहरूले सचेत हुनुपर्ने श्रेष्ठको आग्रह छ।

न्यायालय कब्जा र भ्रष्ट आदेशबारे गम्भीर खुलासा

श्रेष्ठले जारी गरेको वक्तव्यमा नेपालका केही महत्वपूर्ण राष्ट्रिय सम्पदासम्बन्धी मुद्दामा:

• ललिता निवास

• सगरमाथा राष्ट्रिय निकुञ्ज क्षेत्र

• धरानको सर्दु जलाधार

जस्ता सरकारी जग्गा “भू–माफियालाई मिल्नेगरी अदालतले अवैध फैसला गरेको” गम्भीर आरोप लगाइएको छ।

उनी भन्छन्, “न्यायपरिषद गठन नभईकन संविधानविपरीत न्यायालयलाई राजनीतिक कब्जामा राखियो, रातभर एनेक्स बिल्डिङमा आफ्ना मान्छे थुनेर भागबण्डामा नियुक्ति गरियो, जसले C-051088, C-051089, C-051090 नम्बरका उजुरीहरू अख्तियारमा दर्ता हुँदाहुँदै पनि कारबाही भएन। अख्तियारमा नै भ्रष्टहरू भर्ति गरिएकाले देशद्रोही निर्णय गर्नेहरू अहिले पनि सुरक्षित छन्।”

श्रेष्ठका अनुसार, जेन्जीयुक्त राष्ट्रवादी सरकार गठन भएपछि यी सबै मुद्दाहरूलाई प्राथमिकताका साथ अघि बढाइनेछ।

सोच्छ बर्जन हुने जोखिम : जेन्जी पुनः नठगियोस्

उनी भन्छन् “विगतमा आफ्नै बिरुद्ध उजुरी दर्ता भइरहँदा कहिल्यै नबोल्नेहरू, अहिले जेन्जीहरूले अन्तरिम सरकार असफल भएको भन्दै विकल्पको खोजी थालेपछि मात्रै रोदन गर्न थालेका छन्। जेन्जीहरूले बेलैमा यस्ता चालबाजी बुझेनन् भने उनीहरू फेरि एकपटक ठगिन्छन्।”

होटल याक एन्ड यती प्रकरणबारे प्रमाण सार्वजनिक गर्ने तयारी

श्रेष्ठले आफूविरुद्धका आरोपहरू प्रमाणित गर्न चुनौती दिनेहरूलाई कठोर प्रश्न गरेका छन्—“केसरी अदालतलाई कब्जामा लिइयो?”

• “नेपाल औद्योगिक विकास निगमको अर्बौं मूल्य पर्ने सरकारी जग्गामा प्रशस्त चौडा राजमार्ग हुँदाहुँदै पनि किन ‘होटेललाई बाटो छैन’ भन्दै सरकारी जग्गा निजी स्वार्थमा मिलाइयो?”

निकट भविष्यमा पत्रकार सम्मेलन गरी समस्त प्रमाण सार्वजनिक गर्ने, चुनौती दिनेहरूलाई साक्षी सहित उपस्थित हुन निम्तो गर्ने र
“हाम्रो प्रमाण गलत ठहरियो भने हामी कानूनी कारबाही भोग्न तयार छौं”
भनेर कडा प्रतिबद्धता पनि वक्तव्यमा गरिएको छ।

राष्ट्र बचाउनको लागि दोस्रो जेन्जी आन्दोलन महत्वपूर्ण

विज्ञप्तिको अन्त्यमा अध्यक्ष श्रेष्ठले भन्छन्—“दोस्रो जेन्जी आन्दोलनमा कुनै पनि दृश्य वा अदृश्य देशी–विदेशी शक्तिको घुसपैठ हुन नदिन सबै सजग बनौँ।
धन–जन–सम्पत्ति नष्ट हुने काम रोक्न,
र राष्ट्रवादी तथा जेन्जीहरूको संयुक्त, स्वच्छ, दह्रो र भ्रष्टाचार–शून्य कार्यकारी सरकार बनाउन अहिले नै निर्णायक ध्यान दिन जरुरी छ।”

उनी थप भन्छन्— “जेन्जीहरूलाई फेरि कसैले नझुक्याउन । राष्ट्रबचाउने अभियानमा आम नागरिकको ऐतिहासिक योगदान अभिलेखित रहोस्।”

– सत्य र न्यायको खोजी अभियान, नेपाल