काठमाडौंमा हिंसा चर्कियो : नेताहरुका निवास, होटल र सरकारी कार्यालयमा आगजनी

काठमाडौं, २४ भदौ, २०८२ – सरकारविरुद्ध जारी ‘जेन–जी’ आन्दोलन आज थप उग्र बनेको छ। आक्रोशित प्रदर्शनकारीहरूले प्रधानमन्त्री केपी शर्मा ओलीको बालकोटस्थित निवाससहित विभिन्न नेताका घर, होटल, विद्यालय र सरकारी कार्यालयमा तोडफोड तथा आगजनी गरेका छन्।

ओली निवासमा आगजनी

भक्तपुरको बालकोटस्थित प्रधानमन्त्री ओलीको निजी निवासमा आज बिहानै आगजनी भएको हो। प्रहरीको प्रयासका बाबजुद प्रदर्शनकारी रोकिएनन्। अश्रुग्यास प्रहारपछि समेत भीडलाई नियन्त्रणमा लिन नसक्दा ओली निवासमा आगो लगाइएको हो।

हिल्टन होटल र अन्य सम्पत्ति आक्रोशको निशाना

नक्सालस्थित हिल्टन होटलमा पनि आगजनी भएको छ। होटल प्रहरी प्रधान कार्यालय नजिकै भएकाले घटनाले थप तनाव उत्पन्न गराएको छ। त्यस्तै, राष्ट्रपति रामचन्द्र पौडेलको बोहराटारस्थित घर, नेपाली कांग्रेसका महामन्त्री गगन थापाको रातोपुलस्थित घर र एमाले, एकीकृत समाजवादी नेताहरू माधवकुमार नेपाल, शंकर पोखरेल र गोकर्ण विष्टका निवासमा समेत तोडफोड र आगजनी भएको छ।

त्रिभुवन अन्तर्राष्ट्रिय विमानस्थल बन्द

काठमाडौंको सुरक्षा अवस्था नियन्त्रण बाहिर जाँदा त्रिभुवन अन्तर्राष्ट्रिय विमानस्थल पूर्णरूपमा बन्द गरिएको छ। गोठाटारलगायत क्षेत्रमा निरन्तर आगलागीका घटना बढेपछि हवाई सुरक्षामा खतरा देखिएको नेपाल नागरिक उड्डयन प्राधिकरणका अधिकारीले बताएका छन्। सबै उडानहरू स्थगित गरिएका छन् भने विमानस्थलको सुरक्षामा नेपाली सेना खटाइएको छ।

कांग्रेस नेताका घर र मन्त्री क्वार्टरमा आक्रमण

भैंसेपाटीस्थित मन्त्री क्वार्टरमा समेत प्रदर्शनकारी छिरेर तोडफोड गरेका छन्। कांग्रेस सभापति शेरबहादुर देउवाको निवासमा समेत आगजनी भएको छ। यसैबीच कांग्रेस महामन्त्रीद्वय गगन थापा र विश्वप्रकाश शर्माले संयुक्त विज्ञप्ति जारी गर्दै कांग्रेस–एमालेबीचको सातबुँदे सहमति औचित्यहीन भएको र प्रधानमन्त्री ओलीले तत्काल राजीनामा दिनुपर्ने माग गरेका छन्।

विद्यार्थी संगठन नेताहरूको राजीनामा

सरकारी दमनमा २१ जनाभन्दा बढी विद्यार्थीको मृत्यु भएपछि विद्यार्थी संगठनका नेताहरूले पनि राजीनामा दिन थालेका छन्। एमाले निकट अनेरास्ववियुका अध्यक्ष डा. सुजन कडरियाले पद त्याग गरेका छन्। उनले विद्यार्थीहरूको हक र जीवन रक्षा गर्न असफल भएको स्वीकार गर्दै संगठनमा रहिरहन नैतिकताले नदिएको बताएका छन्। यसअघि अखिलका उपाध्यक्ष विकास श्रेष्ठले पनि राजीनामा दिएका थिए।

देशभर चर्किएको आन्दोलन

सामाजिक सञ्जाल प्रतिबन्ध, व्यापक भ्रष्टाचार, नेताहरूको विलासी जीवनशैलीविरुद्ध उठेको आन्दोलनले देशभरका प्रमुख शहर अशान्त बनाएका छन्। काठमाडौं, विराटनगर, पोखरा, जनकपुर, बिर्तामोडलगायत स्थानमा प्रदर्शन हिंसात्मक बन्दै गएको छ। सार्वजनिक सम्पत्तिसँगै प्रहरी कार्यालयहरूमा समेत आगजनी भइरहेको छ।

भक्तपुरको बालकोटस्थित ओली निवासमा प्रदर्शनकारीले आगजनी गरे

फोटो : बाह्रखरी