प्रहरीले दिएको जानकारीअनुसार काठमाडौंको ट्रमा सेन्टर, वीर अस्पताल, सिभिल अस्पताल, केएमसी अस्पताललगायतका अस्पतालमा रहेका घाइतेमध्ये २२ जनाको अवस्था गम्भीर छ ।

दमकमा प्रधानमन्त्रीको घरमाथि आक्रमण

झापाको दमक नगरपालिका–९, शान्तिमार्गस्थित प्रधानमन्त्री केपी शर्मा ओलीको घरमा आक्रोशित प्रदर्शनकारीले ढुंगामुढा गरेका छन्। भीड नियन्त्रणका लागि प्रहरीले दुई राउन्ड हवाई फायर गरेको र अहिले दमकको अवस्था तनावपूर्ण रहेको जिल्ला प्रहरी कार्यालयले जनाएको छ।

प्रदर्शनकारीहरूले त्यहाँको नगरपालिका कार्यालयमा समेत तोडफोड र आगजनी गरेका छन्। कार्यालय परिसरमा राखिएका दुईवटा मोटरसाइकलमा समेत आगजनी गरिएको छ।

पोखरा : गोली लागेका घाइतेबारे विवाद

कास्कीको पोखरामा प्रहरीले प्रदर्शन नियन्त्रणका लागि रबरको गोली, अश्रुग्यास र पानीको फोहोरा प्रहार गरेको छ।

• प्रहरीले कोही घाइते नभएको दाबी गरे पनि

• सामाजिक सञ्जालमा पोस्ट गरिएका भिडियोहरूमा केही प्रदर्शनकारी गोली लागेर रगताम्य भएको देखिएको छ।

कास्की प्रहरी प्रमुख श्यामबाबु ओलियाले घटनाको विवरण संकलन भइरहेको बताए। अहिले पोखराको अवस्था केही मत्थर भए पनि तनाव कायम छ।

सुनसरी : इटहरीमा कर्फ्यु

सुनसरीको इटहरी क्षेत्रमा पनि कर्फ्यु आदेश जारी गरिएको छ।

• आदेश सोमबार दिउँसो ३:३० बजेदेखि अर्को सूचना नआएसम्म लागू हुनेछ।

• प्रमुख जिल्ला अधिकारी धर्मेन्द्रकुमार मिश्रका अनुसार, स्थानीय प्रशासन ऐन २०२८ को दफा ६ (क) बमोजिम चार किलोमिटर क्षेत्र कर्फ्युको दायरामा परेको छ।

कर्फ्यु सिमाना :

• पूर्व : मिलन चोक–जुट विकास क्षेत्र

• पश्चिम : करफोक मोड–जनता बस्ती

• उत्तर : हलगडा नेपाली सेनाको ब्यारेक–पारवाहा चोक

• दक्षिण : अख्तियार आयोग–यातायात कार्यालय–पुष्पलाल चोक हुँदै वन पार्क

इटहरी उपमहानगर कार्यालयमा प्रदर्शनकारीले तोडफोड गरेपछि सुरक्षाकर्मीले हवाई फायर समेत गरेका थिए।

राजनीतिक प्रतिक्रिया

आन्दोलन उग्रिएसँगै नेपाली कांग्रेसले आकस्मिक बैठक बोलाएको छ।

• सभापति शेरबहादुर देउवाको निवास बूढानीलकण्ठमा बसेको बैठकमा पार्टीको आधिकारिक धारणा तय हुने महामन्त्री विश्वप्रकाश शर्माले जनाएका छन्।

• बिहानै महामन्त्रीद्वय शर्मासहित गगन थापाले देउवालाई भेटेर सामाजिक सञ्जाल बन्द फिर्ता लिन दबाब दिनुपर्ने माग राखेका थिए।

यसैबीच, सत्तारूढ एमालेको पार्टी कार्यालय च्यासल नजिक आन्दोलनकारी र प्रहरीबीच घम्साघम्सी भएको छ। प्रदर्शनकारीहरूले कार्यालय घेराउको प्रयास गर्दा प्रहरीसँग धक्का–मुक्की भएको छ।