वाशिंगटन डीसी / अमेरिकी राष्ट्रपति डोनाल्ड ट्रम्पका दर्जनौं उच्चस्तरीय मनोनयनहरूमा सहमति जुटाउने प्रयास शनिबार राति असफल भयो। घण्टौं लामो वार्तापछि पनि सम्झौता टुट्दा सांसदहरू अवकाशको लागि घर फर्किएका छन्।

हालको विवादमा डेमोक्र्याट र रिपब्लिकन दुबै एकअर्कालाई दोष दिइरहेका छन्, तर वार्ता पूर्ण रुपमा टुट्नुमा अन्ततः राष्ट्रपति ट्रम्प स्वयं जिम्मेवार बने।

ट्रम्पले आफ्नो सामाजिक सञ्जाल ‘ट्रुथ सोसियल’मार्फत लामो पोस्ट लेख्दै सीनेट अल्पसंख्यक नेता चक शुमरमाथि “केवल थोरै योग्य उम्मेदवार पारित गरिदिने सर्तमा एक अर्ब डलरभन्दा बढी रकम मागेको” गम्भीर आरोप लगाए।

“यो माग अत्यन्त आपत्तिजनक र अभूतपूर्व हो, जुन स्वीकारेमा रिपब्लिकन पार्टीको बेइज्जती हुने थियो। यो राजनीतिक ब्ल्याकमेलिङ हो,” ट्रम्पले लेखे। “शुमरलाई भन्नुस्— नरकमा जाऊ !”

उनले रिपब्लिकन सांसदहरूलाई अपिल गर्दै भने, “कुनै सम्झौता नमान्नुस्, घर जानुस् र आफ्ना जनतालाई डेमोक्र्याटहरू कति खराब छन् र हामी रिपब्लिकनहरूले देशका लागि कति राम्रो काम गर्यौं भनेर सुनाउनुस्। रमाइलो अवकाश मनाउनुस् र अमेरिका पुनः महान बनाऔं!”

तर चक शुमरले ट्रम्पकै निर्णयलाई डेमोक्र्याटहरूको विजयको रूपमा व्याख्या गरे। शुमरले आरोप लगाउँदै भने, “हामी बहुपक्षीय समाधानको प्रयासमा थियौं, तर ट्रम्प आफैं वार्ताबाट भागे।”

शुमरले ट्रम्पको पोस्टलाई ठूलो पोस्टरमा छापेर पत्रकारहरूलाई देखाउँदै भने, “ट्रम्पको क्रोधपूर्ण टाइप गरिएको पोस्टले सबै कुरा बताउँछ— उनी तिनपटकका प्रयासपछि हार मानेर रिपब्लिकनहरूलाई घर फर्काए।”

पहिले दुबै पक्ष ट्रम्पका ६० उम्मेदवारहरूलाई अनुमोदन गर्ने सहमतिको नजिक थिए, जसलाई द्विदलीय समर्थनसहित समितिहरूले अघि बढाएका थिए। तर अन्ततः केवल ७ जनाको मात्रै मतदान भयो।

सीनेटका बहुमत नेता जोन थुनले बताएअनुसार “धेरै प्रस्ताव आदान–प्रदान भए”, तर अन्तिम घडीमा सहमति टुट्यो।

डेमोक्र्याटहरूको माग के थियो?
– राष्ट्रिय स्वास्थ्य संस्थाको रोकिएको बजेट खोल्न
– वैदेशिक सहायता रोकिएको रकम फुकुवा गर्न
– भविष्यमा ह्वाइट हाउसबाट थप बजेट कटौती नगर्ने लिखित ग्यारेन्टी

यसको सट्टा उनीहरूले ट्रम्पका केही विवादरहित उम्मेदवारहरू पारित गर्ने वाचा गरेका थिए।

तर रिपब्लिकन सिनेटर मार्कवेन मुलिनले भने शुमरले बारम्बार आफ्ना माग बढाउँदै “तीन पटकसम्म सम्झौता गरेर फेरि फेरि ‘अझै चाहिन्छ’ भने”, जुन अस्वीकार्य भएको बताए।

उनले थपे, “शुरु देखिनै डेमोक्र्याटहरूले सम्झौता होइन, ट्रम्पलाई अयोग्य देखाउन खेल खेले।”

अब रिपब्लिकनहरूले सेप्टेम्बरमा संसद फर्किएपछि अनुमोदन प्रक्रिया परिवर्तन गर्ने सम्भावनाबारे संकेत गरेका छन्। तर शुमरले चेतावनी दिए— “सीनेटको नियम परिवर्तन गर्नु गम्भीर गल्ती हुनेछ।”

शुमरको निष्कर्ष:
“यदि रिपब्लिकनहरू साँच्चिकै अमेरिकी जनताको भलो चाहन्छन् भने ट्रम्पको अन्धा आज्ञापालन बन्द गर्नुपर्छ।”