उडानकै दौरान ‘नोज डाइभ’ गरेर अर्को विमानसँग ठोक्किनबाट बच्यो साउथवेस्ट एयरलाइन्सको जहाज, यात्रुहरू डरले चिच्याउँदै छतमा ठोक्किए

क्यालिफोर्नियाको बर्बैंकबाट लस भेगास जाँदै गरेको Southwest Airlines को फ्लाइट 1496 मा यात्रा गरिरहेका यात्रुहरूका लागि केही सेकेण्ड अत्यन्तै त्रासदीपूर्ण बनेको थियो। उडानपछि केही मिनेटभित्रै जहाज अचानक तलतिर सोझो झर्ने (‘nose dive’) हरकतमा जाँदा यात्रुहरू आकाशिँदै सीटबाट उछिट्टिएर छतमा ठोक्किएका थिए।

घटनाका बेला विमानभित्र बालबालिका र वयस्कहरू चिच्याउँदै भयभीत देखिएका थिए।

२ जना फ्लाइट अटेन्डेन्ट घाइते

Southwest Airlines का प्रवक्ताले Fox News Digital लाई जानकारी दिँदै दुई जना फ्लाइट अटेन्डेन्ट घाइते भएको पुष्टि गरेका छन्। तीमध्ये एक जनाको टाउको छतमा ठोक्किँदा बेहोसजस्तै भएका थिए भने अर्का एक जनाले घटनापछि जागिर छाड्ने घोषणा गरे।

हडबडीमा गरिएको आकस्मिक झुकाव

Southwest Airlines को बोइङ 737 MAX 8 जहाजले उडान भरेको लगभग १० मिनेटपछि अचानक २० देखि ३० फिटजति तल झरेको यात्रु Caitlin Burdi ले बताइन्। “मैले सोचेँ, सामान्य त हो, तर दुई सेकेण्डमै त्यो ‘Tower of Terror’ जस्तो अनुभव भयो — हामी सबले ठूला स्वरमा चिच्यायौं, सबैले ठाने, अब त जहाज खस्छ,” उनले भनिन्।

फ्लाइटले दुईवटा ‘ट्राफिक अलर्ट’ पाएपछि पाइलटले आकस्मिक निर्णय लिए

एयरलाइन्सले पुष्टि गरेअनुसार बिहान ११ बजे तिर उडानपछि जहाजले दुई वटा onboard traffic alerts पाएको थियो जसका कारण चालकदलले एकपटक माथि चढ्न र एकपटक तल झर्नुपरेको थियो।

जसरी तसरी लस भेगासमा सुरक्षित अवतरण

उक्त डरावना क्षणपछि पनि जहाज निर्धारित गन्तव्य लस भेगासमा “सुरक्षित र सामान्य ढंगले” अवतरण गरेको Southwest ले बताएको छ।

“हाम्रो चालकदल र स्टाफको व्यावसायिकता प्रशंसनीय छ। यात्रु र कर्मचारीहरूको सुरक्षाभन्दा महत्वपूर्ण अरू केही छैन,” Southwest को विज्ञप्तिमा भनिएको छ।

FAA पनि अनुसन्धानमा संलग्न

संघीय उड्डयन प्रशासन (FAA) ले पनि घटनाको जाँच सुरु गरेको छ। FAA अनुसार घटनाको समयमा उक्त विमान Los Angeles Air Route Traffic Control Center को हवाई क्षेत्रमा थियो र त्यतै अरू एउटा विमान पनि नजिकै उडिरहेको थियो।

पाइलटले आफूले अर्को विमानसँग ठोक्किनबाट जोगिन आकस्मिक झुकाव गरेको बताए

यात्रु Burdi का अनुसार घटनापछि पाइलटले इन्टरकममार्फत भनिरहेका थिए, “हामी अर्काे जहाजसँग ठोक्किन लागेका थियौं, एयर ट्राफिक कन्ट्रोलसँगको सम्पर्क हराएपछि मैले आकस्मिकरूपमा तल जानुपर्‍यो।”

सोसल मिडियामा यात्रुहरूको साझा पीडा

उक्त घटनाका केही यात्रुहरूले सोसल मिडियामार्फत आफ्नो अनुभव सार्वजनिक गरेका छन्। स्ट्यान्ड-अप कमेडियन Jimmy Dore ले X (Twitter) मा लेखे —
“मैसहित धेरैजना सीटबाट उछिट्टिएर छतमा ठोक्कियौं, फ्लाइट अटेन्डेन्टलाई उपचार चाहियो। पाइलटले भन्नुभयो—‘collision warning’ बज्यो, अर्को जहाज जस्तै ठोक्किन लागेको थियो। होस उडाउने क्षण थियो।”

यो घटना साउथवेस्ट एयरलाइन्सको तर्फबाट ठूलो दुर्घटना हुनबाट बचाइएको उदाहरण हो। यद्यपि यात्रुहरूमा गहिरो मानसिक आघात परेको छ र यो घटनाले अमेरिकी आकाशमा ट्राफिक नियमनको प्रणालीप्रति गम्भीर प्रश्न खडा गरिदिएको छ।