: स्याङ्जाको वालिङमा गौरव तिवारीद्वारा डिजिटल साक्षरता र कृत्रिम बुद्धिमत्ता तालिम सञ्चालन

वालिङ,१२ कार्तिक / जर्मनीमा आधारित डेटा साइन्स र कृत्रिम बुद्धिमत्ताका विशेषज्ञ गौरव तिवारीले GIZ MEG डायस्पोरा एक्सपर्ट कार्यक्रम अन्तर्गत “Empowering Women and Young Girls through Digital Skills, Cyber security, and Financial Literacy” शीर्षकको प्रशिक्षण कार्यक्रम स्याङ्जाको वालिङमा सञ्चालन गर्नुभएको छ ।

वालिङ नगरपालिकाको सहकार्यमा २४ अक्टोबरदेखि शुरु गरिएको उक्त प्रशिक्षण कार्यक्रम १४ नोभेम्बर सम्म सञ्चालन हुनेछ । आज बुधबार वालिङमा गरिएको तालिममा डिजिटल साक्षरता, इन्टरनेट सुरक्षा, पासवर्ड र डाटा संरक्षण, वित्तीय योजना, साथै कृत्रिम बुद्धिमत्ता (AI) प्रयोग गरेर सिकाइ र उत्पादकता बढाउने जस्ता महत्वपूर्ण विषयहरूमा प्रशिक्षण दिइएको थियो ।डिजिटल अन्तर घटाउने र भविष्यका नवप्रवर्तकहरूलाई प्रेरित गर्ने उदेश्य सहित वालिङका विभिन्न संस्थाहरूमा कार्यक्रम गरिने जर्मनीमा आधारित डेटा साइन्स र कृत्रिम बुद्धिमत्ताका विशेषज्ञ तथा मुख्य प्रशिक्षक गौरव तिवारीले बताउनुभयो । व्यावहारिक अभ्यासमार्फत विद्यार्थीहरूलाई, विशेषगरी युवतीहरूलाई आत्मविश्वासी र प्रविधिमा सक्षम बनाउन यो तालीम केन्द्रित रहेको उहाँको भनाइ छ ।

उहाँले भन्नुभयो, “म सधैं आफ्नो देशका लागि केही योगदान गर्ने सोचमा थिएँ, र यस कार्यक्रमले त्यो सपना साकार पार्ने अवसर दियो। विशेष गरी भविष्यमा सफ्टवेयर इन्जिनियर र डेटा साइन्समा करियर बनाउन चाहने विद्यार्थी युवतीहरूलाई पढाउने अनुभव निकै सन्तोषजनक रह्यो।”

उहाँले थप्नुभयो, “यस्ता पहलहरू ग्रामीण क्षेत्रका युवाहरूलाई विश्वस्तरको डिजिटल ज्ञान र आत्मविश्वास दिलाउन अत्यन्तै आवश्यक छन्।”

स्याङ्जाको वालिङ नगरपालिका वडा नं १४ मा जन्मिनुभएका तिवारी विगत लामो समयदेखी जर्मनीमा सोही विषयमा अध्ययन गर्दै आउनुभए
को छ । विश्वका शक्तिशाली राष्ट्रहरु प्रविधिका क्षेत्रमा अग्रपंक्तिमा रहेको अवस्थामा हाम्रो देश नेपालका ग्रामीण क्षेत्रहरूमा रहेका युवाहरूलाई यो तालीम अत्यन्तै फलदायी सावित हुने उहाँको विश्वास छ । यस प्रकारको महत्त्वपूर्ण तालीम लिएर प्रविधिका ज्ञानहरु हासिल गर्न समेत अनुरोध गर्नुभएको छ ।

आज सम्पन्न कार्यक्रममा विभिन्न विद्यालायका शिक्षक, विद्यार्थी, सरकारी कर्मचारी लगायतका व्यक्तिहरु उत्साहजनक सहभागिता रहेको थियो । कार्यक्रम समूहगत छलफल, अन्तरक्रिया, र व्यावहारिक सत्रहरूका साथ सम्पन्न भएको थियो भने सहभागीहरूले डिजिटल समावेशीकरण र महिलाको सशक्तीकरणलाई निरन्तर प्रवर्द्धन गर्ने प्रतिबद्धता जनाएका थिए । तालीम वालिङ नगरपालिकामा मात्रै सञ्चालन हुनेछ ।