काठमाडौँ । पृथ्वी राजमार्ग अन्तर्गत धादिङको धुनिवेशी नगरपालिका–६, चालिसेमा शनिबार अपराह्न भएको भीषण सवारी दुर्घटनामा ३५ जना घाइते भएका छन्। गोरखाबाट काठमाडौं आउँदै गरेका र काठमाडौंबाट बाहिरिँदै गरेका सातवटा सवारी साधन एकआपसमा ठोक्किँदा दुर्घटना भएको हो। शनिबार दिउँसो करिब ४ बजेको समयमा बस, ट्रक, कन्टेनर, स्कुल बस र मोटरसाइकल एकै स्थानमा ठोक्किँदा दुर्घटना भएको जिल्ला प्रहरी कार्यालय धादिङले जनाएको छ। प्रहरी निरीक्षक श्यामकुमार बस्नेतका अनुसार गोरखाबाट काठमाडौं आउँदै गरेको बा १ प ९१७ नम्बरको बस, सोही दिशामा रहेको ग १ ख ८५५१ नम्बरको बस तथा विपरीत दिशाबाट गजुरीतर्फ जाँदै गरेका एनएल ०१ एबी ४६५४ नम्बरको भारतीय कन्टेनर, जीजे ०३ एजेड ३२३१ नम्बरको भारतीय बस, बागमती प्रदेश ०६–००१ ग ००११ नम्बरको स्कुल बस, ना ४ ख ७१५ नम्बरको ट्रक र लु ९५ प ३०७ नम्बरको मोटरसाइकल एकआपसमा ठोक्किएका हुन्।

दुर्घटनामा परेर ३५ जना घाइते भएका छन्। घाइतेमध्ये केहीको अवस्था गम्भीर रहेको छ भने अधिकांशको अवस्था सामान्यदेखि मध्यम रहेको प्रहरीको भनाइ छ। सबै घाइतेलाई तत्काल उद्धार गरी नजिकका अस्पताल तथा काठमाडौँका विभिन्न स्वास्थ्य संस्थामा उपचारका लागि पठाइएको छ।

दुर्घटनामा संलग्न बागमती प्रदेश ०६–००१ ग ००११ नम्बरको स्कुल बसमा चितवनको कालिका नगरपालिका–६ स्थित श्री सेकेन्डरी स्कुल, रेडक्रस ग्रामका विद्यार्थी तथा शिक्षकहरू सवार थिए। उक्त स्कुल बसमा रहेका धेरै विद्यार्थी घाइते भएका छन्।

घाइतेहरूमध्ये अधिकांशको धार्केस्थित साइबाबा सामुदायिक अस्पताल र अल्फामेड अस्पतालमा उपचार गरिएको छ भने केहीलाई थप उपचारका लागि काठमाडौं रिफर गरिएको छ। सामान्य चोट लागेका धेरैजसो घाइते उपचारपछि डिस्चार्ज भइसकेका छन्।

बा १ प ९१७ नम्बरको बसमा सवार गोरखा, लमजुङ र काठमाडौंका यात्रुहरू विनोद पोखरेल, मिना पनेरु, इन्द्रकुमारी देवकोटा, सिता गजुरेल, अजय घिमिरे, सूर्य घिमिरे र कुशल घिमिरे घाइते भएका छन्। यीमध्ये केहीलाई काठमाडौं रिफर गरिएको छ भने केही उपचारपछि डिस्चार्ज भएका छन्।

स्कुल बसमा सवार चालक उदय बहादुर थापासहित सुवित थिङ, कबिता सिङ, यमवि श्रेष्ठ, रमित परियार, समिर मगर, इस्माइल थिङ, कमला लामिछाने, सचिन गुरुङ, शिव लामिछाने, आस्विन प्रजा, राधिका चेपाङ, मिलन तामाङ, कशिस तामाङ, सन्तोस प्रजा, बिराज तामाङ, जयराम अर्याल, निशान गुरुङ, समिर परियार, जसमिन श्रेष्ठ, कमल गुरा, रबिना सुनार, प्रतिमा मगर, आयुब बि.क. र बिमला तामाङ घाइते भएका छन्। तीमध्ये अधिकांश विद्यार्थी उपचारपछि डिस्चार्ज भएका छन् भने केहीको काठमाडौंस्थित ट्रमा सेन्टरमा उपचार भइरहेको छ।

मोटरसाइकल चालक सेख खलि एसको अवस्था गम्भीर रहेको छ र उहाँको शिक्षण अस्पताल (टिचिङ) काठमाडौंमा उपचार भइरहेको छ। त्यस्तै, दुर्घटनामा संलग्न भारतीय कन्टेनर चालकको अवस्था पनि गम्भीर रहेको र ट्रमा सेन्टरमा उपचार भइरहेको प्रहरीले जनाएको छ। ग १ ख ८५५१ नम्बरको बसका चालक राजु कार्की सामान्य चोट लागेर उपचारपछि डिस्चार्ज भएका छन्।

दुर्घटनापछि इलाका प्रहरी कार्यालय खानीखोलाबाट प्रहरी निरीक्षक नन्दराज जैशीको कमाण्डमा ट्राफिक प्रहरीसहितको टोली घटनास्थलमा पुगेर उद्धार तथा व्यवस्थापन कार्य गरेको थियो। दुर्घटनाका कारण अवरुद्ध भएको पृथ्वी राजमार्ग साँझ ६ बजेर ५५ मिनेटबाट एकतर्फी रूपमा सुचारु भएको प्रहरीले जनाएको छ।

दुर्घटनाको कारणबारे थप अनुसन्धान भइरहेको जिल्ला प्रहरीले जानकारी दिएको छ।