लक्जेम्बर्गका विदेशमन्त्री एच.इ. जेभियर बेटेलको निमन्त्रणामा लक्जेम्बर्गका मानार्थ वाणिज्यदूत तथा मानार्थ वाणिज्यदूत जनरलहरूको ऐतिहासिक बैठक सम्पन्न भएको छ। दुई दिनसम्म चलेको उक्त बैठकमा विदेशमन्त्री, वाणिज्य तथा व्यापार मन्त्री र प्रधानमन्त्रीले लक्जेम्बर्गको विकास यात्रा, हालको उपलब्धि र भविष्यका योजनाबारे विस्तृत जानकारी दिएका थिए।

लक्जेम्बर्गको इतिहासमै पहिलोपटक आयोजित यस बैठकमा विश्वका विभिन्न मुलुकबाट १२० जना मानार्थ वाणिज्यदूत तथा वाणिज्यदूत जनरलले सहभागिता जनाएका थिए। कार्यक्रममा सहभागीहरूलाई मुलुकसम्बन्धी आवश्यक जानकारी दिनुका साथै आ–आफ्नो देशमा लक्जेम्बर्गको हितका लागि गरेको योगदानप्रति सरकारको आभार प्रकट गरिएको थियो।

नेपालका लागि लक्जेम्बर्गका मानार्थ वाणिज्यदूत जनरल श्रीराम लामिछाने पनि यस बैठकमा सहभागी भए। लामो समयदेखि उत्कृष्ट सेवा पुर्‍याउँदै आएका लामिछानेलाई लक्जेम्बर्गको हितका लागि उल्लेखनीय योगदान गर्ने सक्षम र समर्पित मानार्थ वाणिज्यदूत जनरलका रूपमा चिनिन्छ। बैठकमा उहाँसँगै उनका सहायक डा. विकास भट्टराई पनि सहभागी भएका थिए।

बैठकको अवसरमा युवराज एच.आर.एच. गिल्यमेले आफ्नै बर्ग दरबारमा अतिथिहरूको सम्मानमा विशेष स्वागत समारोहको आयोजना गरे। छोटकरी सम्बोधनमा युवराजले सबै मानार्थ प्रतिनिधिहरूको योगदानको प्रशंसा गर्दै धन्यवाद ज्ञापन गरे। सो अवसरमा युवराजसँगको विशेष भेटवार्तामा करिब २० वर्षअघि उहाँ १६ वर्षको स्काउटका रूपमा नेपाल भ्रमणमा आउँदा खिचिएको तस्बिर देखाइएको र त्यसमा युवराजले विशेष चासो देखाएको जनाइएको छ। समारोहमा युवराज्ञी एच.आर.एच. स्टेफनी अफ लक्जेम्बर्गसँग भेट्ने अवसर पनि प्राप्त भएको थियो।

मानार्थ वाणिज्यदूत तथा मानार्थ वाणिज्यदूत जनरलका रूपमा करिब २७ वर्षदेखि सेवा दिँदै आएका प्रतिनिधिले सन् १९९८ जुलाईमा दिवंगत ग्राण्ड ड्यूक ज्यान अफ लक्जेम्बर्गद्वारा पहिलो नियुक्ति पाएका थिए। त्यसपछि ग्राण्ड ड्यूक हेनरी र हाल युवराज गिल्यमेको शासनकालमा पनि सो जिम्मेवारी निर्वाह गर्दै आएका छन्।

यस प्रकारका पदहरू पूर्णतः स्वेच्छिक हुने भएकाले कुनै आर्थिक पारिश्रमिक हुँदैन। धेरै मुलुकहरूले सबै देशमा दूतावास वा पेशागत वाणिज्यदूत कार्यालय खोल्न नसक्ने भएकाले स्थानीय प्रतिष्ठित व्यक्ति वा व्यवसायिक समुदायका सदस्यलाई सीमित कूटनीतिक कार्यका लागि नियुक्त गर्ने परम्परा रहेको छ।

सन् १९६३ को जेनेभा सम्मेलनअनुसार मानार्थ वाणिज्यदूतको प्रमुख जिम्मेवारीमा आपतकालीन अवस्थामा नागरिकलाई सहयोग पुर्‍याउने, पासपोर्ट हराएको वा कानुनी समस्यामा परेका व्यक्तिलाई सहयोग गर्ने, मृत्यु वा दुर्घटनामा आवश्यक समन्वय गर्ने, उच्च पदाधिकारीलाई समर्थन गर्ने, आर्थिक, सांस्कृतिक तथा शैक्षिक सम्बन्ध प्रवर्द्धन गर्ने र मुलुकको प्रतिनिधित्व गर्दै विभिन्न औपचारिक कार्यक्रमहरूमा सहभागी हुने कार्यहरू पर्छन्।