वाशिङ्टन डीसी (अमेरिका) / अमेरिकाबाट प्रकाशन हुँदै आएको, संसारभरका नेपालीभाषी समुदायमा समर्पित लोकप्रिय डिजिटल पत्रिका नेपाल मदर डटकम अब नेपाली भाषामा मात्र नभई विश्वका प्रमुख १० भाषामा पढ्न सकिने सुविधा सहितको पहिलो नेपाली डिजिटल पत्रिका बनेको छ।

सन् २००८ देखि अमेरिकाको वाशिङ्टन डीसीबाट प्रकाशन हुँदै आएको नेपाल मदर डटकम मूलतः नेपालको बुटवल र पछि काठमाडौंबाट लगातार १७ वर्षसम्म प्रकाशित निष्पक्ष राष्ट्रिय साप्ताहिकको अनलाइन संस्करणको रूपमा सुरु भएको थियो । नेपालमा निकै लोकप्रिय राष्ट्रिय पत्रिका ‘निष्पक्ष राष्ट्रिय साप्ताहिक’ का प्रधान सम्पादक रामप्रसाद खनाल अमेरिका पुगेपछि यो पत्रिकाले नेपालमा आफ्नो छापा प्रकाशन स्थगित गरेको थियो र अमेरिकाबाट अन लाइन प्रकाशन शुरु गरेको थियो। सन २००८ देखि नेपाल मदर डट कमका रुपमा निरन्तर रूपमा प्रकाशन हुँदै आएको छ। आज यो विदेशमा रहेका नेपाली समुदायमा निकै लोकप्रिय सञ्चारमाध्यमको रूपमा स्थापित छ ।

नेपाल मदर डटकमले अब Nepali, English, Spanish, Hindi, Dutch, French, German, Portuguese, Italian गरी कुल १० भाषामा पढ्न सकिने सुविधा थपेको छ। यसका लागि पत्रिकाको शीर्ष भागमा रहेको भाषा छनौट गर्ने (Language Selection) विकल्पमा गएर आफुले चाहेको भाषा रोजी क्लिक गरेपछि सामग्री सोही भाषामा पढ्न सकिन्छ। यस सुविधाले नेपाल मात्र नभई विश्वभरका पाठकलाई आफ्नो सहज भाषामा सामग्री पढ्न मिल्ने अवसर दिएको छ।

नेपाल मदर डटकमको मूल उद्देश्य सत्य, तथ्य र निष्पक्ष समाचार तथा विविध सामग्री सम्प्रेषण गर्नु हो। यसले पत्रकारिताको मूल धर्म र मर्मलाई सम्मान गर्दै, नागरिकका मानवअधिकार, वाक स्वतन्त्रता, स्वतन्त्र प्रेस र प्रजातन्त्र (Democracy) मा आस्था राख्ने प्रतिवद्धता व्यक्त गर्दै आएको छ।

‘एउटा क्लिकमा सबैथोक’ भन्ने मूल धारणा अनुसार नेपालदेखि अमेरिका र विश्वका विभिन्न मुलुकसम्मका समाचार, विचार, लेख, अन्तर्वार्ता, मनोरञ्जन र विविध विषयवस्तु एकै ठाउँमा प्रस्तुत गर्दै, पाठक तथा दर्शकलाई आवश्यक सबै जानकारी र विश्लेषण एक प्लेटफर्ममा उपलब्ध गराउने नेपाल मदर डटकम, संसारका १७५ भन्दा बढी मुलुकमा पढिन्छ।

यो पत्रिका International Media & Entertainment House US LLC, USA द्वारा प्रकाशित तथा प्रधान सम्पादक रामप्रसाद खनालको सम्पादकीय नेतृत्वमा निरन्तर अघि बढिरहेको छ। यसमा विभिन्न देशबाट पत्रकारहरुले समाचार र सामग्री प्रस्तुत गर्दै आएका छन् ।

नेपाल मदर डटकमको यो नयाँ बहुभाषिक सुविधाले विश्वभरका पाठकसँग अझ नजिक ल्याउने र नेपाली पत्रकारितालाई अन्तर्राष्ट्रिय स्तरमा प्रवर्द्धन गर्ने अपेक्षा गरिएको छ।