ज्यानमा लागेको घाउ देखिन्छ, मनमा लागेको घाउको त फोटो पनि आउँदैन। लाइक र भ्युजको पछि दौडिँदा आफ्नो मानवता नै कतै छुटिरहेको त छैन? कसैको नराम्रो समयलाई आफ्नो राम्रो समय बनाउने प्रयास नगरौँ। कसैलाई बचाउन ठूलो सहयोग गर्नुपर्दैन, उसको घाउमा नुन नछर्किदिए मात्रै पनि पुग्छ।
कसैको जीवनमा केही नराम्रो भयो, कुनै घटना घट्यो, कुनै विवाद आयो वा कसैको निजी जीवनको कुनै कुरा बाहिर आयो भने हामीलाई किन त्यसको यति धेरै चासो लाग्छ? अझ भनौँ, किन कसैको दुःखमा हामीलाई यति धेरै रमाइलो लाग्छ? कसैको जीवनको कुरा काटेर, उसको कमजोरी देखाएर, उसको घाउ कोट्याएर, उसलाई होच्याएर बनाएको भिडियोमा हजारौँ लाइक र लाखौँ भ्युज आउँदा साँच्चै आफूलाई सफल भएको महसुस हुन्छ? नढाटि भन है मन भनेर आफैलाई सोध्नुहोस् त। के तपाईको जीवन चाहि शतप्रतिशत सफा छ? तपाईले जीवनमा कहिल्यै गल्ती गर्नुभएकै छैन हो ? तपाईले कहिल्यै कसैको मन दुखाउनुभएको छैन? तपाईको जीवनमा कहिल्यै लुकाएर राख्न चाहनुभएको कुनै घटना घटेको छैन? तपाईको जीवनमा नभए पनि तपाईको परिवारमा, आफन्तमा, तपाईले प्राणसरि माया गर्ने कसैको जीवनमा केही न केही त अवश्य भएको होला नि जुन कुरा संसारलाई थाहा छैन। थाहा नहुनुको अर्थ घटना घटेको छैन भन्ने त होइन नि!
आज जसको निजी कुरालाई लिएर तपाईहरू भिडियो बनाइरहनुभएको छ, हाँसिरहनुभएको छ र ट्रोल गरिरहनुभएको छ, भोलि तपाईको जीवनमा पनि त्यस्तै केही भयो भने? तपाईले संसारलाई देखाउन नचाहनुभएको कुनै तपाईको निजि कुरा सामाजिक सञ्जालमा छरपस्ट भयो भने? तपाईलाई दुःख लाग्छ कि लाग्दैन? तपाई सहन सक्नुहुन्छ? तपाईको बारेमा दिनहुँ भिडियो बन्दा, तपाईको फोटो राखेर मजाक उडाउदा, हजारौँ मानिसले तपाईलाई गाली गर्दा, तपाईको चरित्रमाथि प्रश्न उठ्दा , तपाईलाई चाहि कस्तो होला? तपाईको बाआमा रातभरि नसुती तपाईको चिन्तामा रोएर बस्नुभयो भने त्यो सहन सक्नुहुन्छ? हरेक व्यक्तिको एउटा निजी जीवन हुन्छ, एउटा व्यक्तिगत संसार हुन्छ, केही सम्बन्ध हुन्छन्, केही घटना हुन्छन्, केही कुरा हुन्छन् जुन उसले संसारलाई सुनाउन चाहँदैन। त्यसलाई नै Privacy भनिन्छ। कसैको जीवनको हरेक पाना संसारले पढ्न पाउनुपर्छ भन्ने छैन। कसैको घरभित्र के भइरहेको छ, उसको सम्बन्धमा के भइरहेको छ, उसले जीवनमा के भोगिरहेको छ भन्ने हरेक कुरा तपाईको चर्चाको विषय हुनुपर्छ भन्ने छैन।
तपाईको जस्तै उस्को पनि बाआमा हुनुहुन्छ । तपाईको जस्तै दुख्ने मन उस्को पनि मन छ। तपाईको जस्तै जिवन उस्को पनि छ । अब तपाईले कसैको जीवनलाई यति ठूलो मजाक बनाइरहनुभएको छ भने पक्कै पनि तपाईले केही ठूलो उपलब्धि हासिल गर्नुभएको हुनुपर्छ, होइन र? किनकि एउटा मान्छेको निजी जीवन छरपस्ट पार्नु, उसको आत्मसम्मानमा चोट पुर्याउनु र उसको मानसिक शान्ति खोस्नु सानो कुरा त पक्कै होइन! सायद तपाईलाई प्रधानमन्त्रीज्यूले नै राष्ट्रिय स्तरको पुरस्कार दिने घोषणा गर्नुभएको होला? सायद तपाईको वडाले तपाईलाई समाजको उदाहरणीय व्यक्तित्व भन्दै सम्मान गर्ने निर्णय गरेको होला? स्कुल र कलेजमा तपाई को उदाहरण दिँदै ‘बच्चाहरू हो, तिमीहरू पनि यस्तै बन्नुपर्छ’ भनिँदो होला? सायद देशका युवाहरूले तपाईलाई आफ्नो प्रेरणाको स्रोत बनाएका होलान्। सायद अन्तर्राष्ट्रिय स्तरमै तपाईको यो महान् योगदानको चर्चा भइरहेको होला!किनकि एउटा मान्छेको जीवनलाई तहसनहस पार्ने गरी बोल्नुभएको छ भने लाइक र भ्युज मात्रै त तपाईको उपलब्धि पक्कै नहोला, होइन र? कि यति ठूलो कामको पुरस्कारस्वरूप तपाईलाई केही हजार लाइक र केही लाख भ्युज नै पर्याप्त भयो? यदि like र views लागि मात्र अरुलाई depression को औसधि खुवाउन बाध्य बनाउनु भको छ भने माफ गर्नुहोला तपाई मान्छे नै होईन किनकी भोलि तपाईकै कारण त्यो व्यक्ति झुन्डिन बेर लाग्दैन । अझै पनि म मान्छे नै हु भन्नुहुन्छ भने उत्तर दिनुस् न त, तपाईले कसैको जीवनलाई मजाक बनाएर समाजलाई दिनुभएको सकारात्मक योगदान चाहिँ के हो? तपाईको घरपरिवारले तपाईले बनाएका यस्ता भिडियो हेर्दा गर्व गर्छन्? तपाईलाई फलो गर्ने हजारौँ मानिसले तपाईको भिडियो हेरेर के सिकिरहेका छन्? लाइक र भ्युज नै सबै कुरा हुन् त?
आज आएको भ्युज भोलि हराउँछ, आज चर्चामा भएको कुरा पर्सि कसैले सम्झिँदैन। तर तपाईले कसैको मनमा पुर्याएको चोट, उसको जीवनमा थपिदिएको मानसिक तनाव, एन्जाइटी र ट्रमा कति लामो समयसम्म रहन सक्छ भन्ने सोच्नुभएको छ? अब यस्ता भिडियो बनाउन बन्द गर्नुस् । कसैको पीडालाई मनोरञ्जन बनाइरहेको छ भने त्यस्ता भिडियो हेर्न बन्द गर्नुहोस्। अनफलो गर्नुहोस्, ‘Not Interested’ गर्नुहोस्, आवश्यक परे ब्लक गर्नुस्। त्यस्ता सामग्रीलाई भ्युज दिएर प्रोत्साहन नगर्नुस् । अन्तत : जो आज ट्रोलको शिकार भइरहनुभएको छ, उहाँहरूलाई मेरो अनुरोध छ । तपाईलाई जति नै अपमान गरे पनि, भिडियो बनाएर झगडा गरेर जवाफ नदिनुस् । उसलाई हृदयदेखि आशीर्वाद दिनुहोस्। साच्चिकै मनैदेखि आशीर्वाद दिनुहोस् र त्यसपछि हेर्नुहोस्, ब्रह्माण्डको खेल कसरी उल्टिन्छ, सत्ता कसरि पल्टिन्छ र कर्मले कसरी आफ्नो हिसाब आफैँ खोज्दै आउँछ । कर्म फर्केर आउँदा ढोका ढकढक्याएर आउँदैन, हिसाब लिएर आउँछ!
प्रतिक्रिया