यस साताको धितोपत्र दोस्रो बजारमा लगानीकर्ताहरूले ठूलो घाटा व्यहोर्नु परेको छ । नेपाल स्टक एक्सचेञ्ज (नेप्से) का अनुसार गत साताको तुलनामा यो साताको अन्तिम कारोबारसम्म बजार पूँजीकरण १ खर्ब १९ अर्ब रुपैयाँभन्दा बढीले घटेको छ। गत साताको अन्त्यमा कुल बजार पूँजीकरण ४८ खर्ब ७६ अर्ब ९० करोड रुपैयाँभन्दा बढी थियो भने यो साताको अन्त्यमा घटेर ४७ खर्ब ५७ अर्ब ७६ करोड रुपैयाँभन्दा बढी मात्र कायम रह्यो।

नेप्से परिसूचक यो साताभर २ दशमलव ४७ प्रतिशतले घट्दै २ हजार ९२२.६३ अंकबाट झरेर २ हजार ८५०.३७ अंकमा पुगेको छ। लगातार बढ्दो बजार पछिल्ला दिनमा उतारचढावमा प्रवेश गरेको देखिन्छ। साताको अन्तिम कारोबार दिन भने हरियो टुप्पी भएको मैनबत्ती बनेको छ, जसले आगामी दिन बजार उक्लन सक्ने संकेत दिएको छ। किनमेलको इच्छा भए पनि विक्रेताले सस्तोमा बेच्न नचाहेको अवस्थाले पनि लगानीकर्तामा आशा बाँकी रहेको देखाउँछ।

ठूला कम्पनीहरूको मात्र कारोबार मापन गर्ने सेन्सेटिभ इन्डेक्स पनि २ दशमलव १९ प्रतिशतले घटेर ५०१.१२ अंकबाट ४९०.१६ अंकमा झरेको छ। कारोबार रकम र कित्तामा पनि ठूलो गिरावट आएको छ — कुल कारोबार रकम ४९ प्रतिशतले घटेर ९६ अर्ब ८९ करोड रुपैयाँभन्दा बढीबाट घटेर ४९ अर्ब ४० करोड रुपैयाँभन्दा बढीमा सीमित भएको छ। कारोबार कित्ता ४१ प्रतिशतले घटेर २१ करोड ७८ लाख कित्ताबाट झरेर १२ करोड ९६ लाख कित्तामा पुगेको छ।

औसत कारोबारमा पनि गिरावट आएको छ । गत साता दैनिक औसतमा १९ अर्ब ३७ करोड रुपैयाँभन्दा बढीको ४ करोड ३५ लाख कित्ता कारोबार भए पनि यो साता औसत ९ अर्ब ८ करोड रुपैयाँभन्दा बढीको २ करोड ५७ लाख कित्तामा झरेको हो।

समूहगत हिसाबले हेर्दा, यो सातामा व्यापारिक समूह बाहेक सबै सूचकहरूमा गिरावट आएको छ। व्यापारिक समूह ०.०९ प्रतिशतले मात्र बढ्दा अन्य समूह ५.२५ प्रतिशतले घटेर सबैभन्दा ठूलो गिरावटमा रह्यो। त्यस्तै, विकास बैंक ४.४२ प्रतिशत, निर्जीवन बीमा ३.४३ प्रतिशत, वित्त ३.२१ प्रतिशत, उत्पादन तथा प्रशोधन ३.१६ प्रतिशत, लगानी ३.०८ प्रतिशत, जीवन बीमा २.८२ प्रतिशत, जलविद्युत २.०५ प्रतिशत, होटल तथा पर्यटन १.८० प्रतिशत, बैंकिङ १.७४ प्रतिशत, म्युचुअल फण्ड ०.३९ प्रतिशत र लघुवित्त ०.२१ प्रतिशतले घटेका छन्।

यो प्रदर्शनले यस सातामा बजारमा लगानीकर्ताको मनोबल कमजोर भएको देखाए पनि अन्तिम दिनको सकारात्मक संकेतले आगामी सातामा बजार केही सुधार हुने अपेक्षा जगाएको छ।