इरानको सर्वोच्च राष्ट्रिय सुरक्षा परिषदका सचिव अली लारिजानी र क्रान्तिकारी गार्ड कोर (IRGC) अन्तर्गतको बासिज सेनाका प्रमुख गुलामरेजा सोलेमानी को मंगलबार राती हत्या भएको पुष्टि भएको छ।

इजरायलका रक्षामन्त्री इजरायल काट्जले यो जानकारी सार्वजनिक गरे।

के भयो त्यो रात ?

इजरायली अधिकारीहरूका अनुसार, तेहरानमा एकैरात एक दर्जनभन्दा बढी बासिज अधिकारीहरूलाई लक्षित गरी फरक-फरक स्थानमा हमला गरियो। यो कारबाही इजरायल र अमेरिकाको मिलेमतोमा सञ्चालन गरिएको एक वरिष्ठ इजरायली अधिकारीले बताए।

अधिकारीले भने  “बासिजका सबैभन्दा जेठा र शक्तिशाली व्यक्तिहरूलाई निशाना बनाइयो  जसका हातमा धेरैको रगत छ।”

बासिज भनेको के हो?

सन् १९७९ मा आयातुल्लाह खोमेनीले स्थापना गरेको बासिज इरानको एक स्वयंसेवक अर्धसैनिक बल हो। यो संगठन:

• आन्तरिक विद्रोह दबाउन प्रयोग हुन्छ
• महिला र युवाहरूमाथि इस्लामिक आचारसंहिता लागू गर्छ
• चुनावमा हेराफेरी को आरोप लगाइएको छ
• सन् १९९९ को विद्यार्थी आन्दोलन र २००९ को हरित क्रान्ति दमनमा सक्रिय थियो

इजरायली सेनाले यसलाई “इरानी आतंकी शासनको सशस्त्र हतियार” भनेको छ।

 अहिलेको अवस्था

यो घटना अमेरिका र इजरायलले इरानविरुद्ध युद्ध सुरु गरेको १८औँ दिनमा भएको हो। अमेरिकी सेन्ट्रल कमान्ड (CENTCOM) ले भनेको छ  “इरानी लक्ष्यहरूको खोजी र विनाश जारी छ।”

सोलेमानीको मृत्युले बासिजको आन्तरिक नियन्त्रण प्रणाली थप कमजोर हुने र इरानी शासनविरुद्ध उठ्न सक्ने जनविद्रोहलाई दबाउन थप कठिनाइ हुने विश्लेषकहरू बताउँछन्।

🔴 युद्धको १८औँ दिन : चार ठूला घटनाक्रम

१. इरानका शीर्ष नेता मारिए

इजरायलले दाबी गर्यो  इरानको सर्वोच्च सुरक्षा अधिकारी तथा सबैभन्दा शक्तिशाली निर्णायक व्यक्तित्वमध्येका एक अली लारिजानीलाई मारिएको छ। साथै, इरानको खतरनाक अर्धसैनिक बल बासिजका प्रमुख पनि मारिएको इजरायलले जनायो। इरानतर्फबाट भने अहिलेसम्म कुनै प्रतिक्रिया आएको छैन।

 २. बगदादमा अमेरिकी दूतावास नजिक विस्फोट

इराकको राजधानी बगदादस्थित अमेरिकी दूतावास नजिकै ठूलो धमाका सुनियो। दूतावास परिसर नजिकै हवाई रक्षा प्रणालीले प्रक्षेपास्त्र रोक्न खोजेको देखिएको छ। उल्लेखनीय छ, यही दूतावासमा शनिबार पनि आक्रमण भइसकेको थियो।

३. क्षेत्रीय हमलाको दायरा फैलियो

• इजरायलले तेहरानमा “शासन पूर्वाधार” र बेरुतमा हिजबुल्लाहका ठेगानाहरूमा नयाँ हमला सुरु गरेको जनाएको छ।
• अबु धाबीले ड्रोन आक्रमणपछि एउटा ग्यास क्षेत्रको सञ्चालन तत्काल रोक्यो।
• UAE को तेल बन्दरगाह नजिकै एउटा ट्यांकरमा “अज्ञात प्रक्षेपास्त्र” ले हानेको जानकारी आएको छ।

४. होर्मुज जलसन्धि तनाव चरमसीमामा

NATO सहयोगीहरूले राष्ट्रपति ट्रम्पको दबाबका बाबजुद होर्मुज जलसन्धि वरपर नौसेना अभियान विस्तार गर्न अस्वीकार गरे। ट्रम्पले सहयोगीहरूलाई समर्थनको कमीका लागि कडा आलोचना गरेका थिए। यसैबीच, इरानका एक वरिष्ठ नेताले चेतावनी दिए — “यो जलमार्ग अब पहिलेजस्तो रहनेछैन।”