काठमाडौं / प्रधानमन्त्री सुशीला कार्कीले विदेशमा रहेका नेपाली समुदायलाई नेपालमै लगानी विस्तार गर्न आग्रह गर्दै विकास यात्रामा प्रत्यक्ष सहभागी बन्न आह्वान गरेकी छन्। गैरआवासीय नेपाली संघ (एनआरएनए) को १२औँ अन्तर्राष्ट्रिय सम्मेलनको समापन समारोहमा बोल्दै उनले नेपालको समृद्धि केवल सरकारी प्रयासले सम्भव नहुने स्पष्ट पारिन्।

उनले विश्वभर फैलिएका नेपालीहरूको पूँजी, ज्ञान, अनुभव र नवीन सोचलाई एकीकृत गर्न सके मात्र देशले तीव्र आर्थिक रूपान्तरण हासिल गर्न सक्ने बताइन्। “जहाँ भए पनि तपाईंहरूको जरा नेपालमै छ। त्यसैले मातृभूमिप्रतिको जिम्मेवारी सम्झेर विकासमा हातेमालो गर्नुस्,” प्रधानमन्त्रीको सन्देश थियो।

प्रधानमन्त्री कार्कीले प्रवासी नेपालीलाई ‘नेपालका अनौपचारिक दूत’ का रूपमा चित्रण गर्दै उनीहरूको व्यवहार, योगदान र पहिचानले अन्तर्राष्ट्रिय स्तरमा नेपालको छवि निर्माण गर्ने उल्लेख गरिन्। उनले नेपाललाई लगानीमैत्री, सुरक्षित र अवसरयुक्त गन्तव्यका रूपमा विकास गर्ने दिशामा सरकार केन्द्रित रहेको पनि बताइन्।

उनका अनुसार अबको नीति उत्पादनमूलक क्षेत्रमा वैदेशिक लगानी आकर्षित गर्ने, लगानी प्रक्रिया पारदर्शी बनाउने र दीर्घकालीन आर्थिक संरचना निर्माण गर्नेमा केन्द्रित हुनेछ। “प्रवासीको लगानी केवल पैसामा सीमित हुँदैन, यसले सामाजिक एकता र राष्ट्रिय पहिचान पनि मजबुत बनाउँछ,” उनले जोड दिइन्।

कार्यक्रममा नवनिर्वाचित नेतृत्वलाई बधाई दिँदै प्रधानमन्त्रीले एनआरएनएको एकताले नयाँ ऊर्जा थप्ने विश्वास व्यक्त गरिन्। विगतका विवादहरू पार गर्दै एउटै प्लेटफर्ममा आएको संगठनले अब देशको विकासमा ठोस योगदान दिने अपेक्षा उनले राखिन्।

संस्थापक अध्यक्ष डा. उपेन्द्र महतोले “नेपाल बनाउने जिम्मा नेपालीकै हो” भन्दै निजी क्षेत्र र सरकारबीच सहकार्य अपरिहार्य रहेको बताए। उनले आर्थिक समृद्धिसँगै सांस्कृतिक मूल्य जोगाउनुपर्नेमा पनि जोड दिए।

पूर्वअध्यक्ष जीवा लामिछानेले विदेशमा रहे पनि नेपालीहरूको मन देशमै रहेको उल्लेख गर्दै एकजुट भएर विकास अभियानमा लाग्ने प्रतिबद्धता व्यक्त गरे। त्यस्तै अध्यक्ष बद्री केसीले प्रवासी नेपालीलाई मताधिकारसहितका अधिकार सुनिश्चित गर्न माग राख्दै संविधान संशोधनको आवश्यकता औंल्याए।

नवनिर्वाचित अध्यक्ष डा. हेमराज शर्माले संगठनलाई नयाँ ढंगले पुनर्संरचना गर्ने र विश्वभरका नेपालीलाई एकीकृत गर्ने लक्ष्य सार्वजनिक गरे। उनले प्रवासीको सीप, ज्ञान र पूँजीलाई व्यवस्थित रूपमा नेपालको आर्थिक तथा सामाजिक क्षेत्रमा परिचालन गर्ने योजना अघि सारे।

सम्मेलनले विश्वभरका नेपालीलाई एउटै मञ्चमा जोड्दै साझा उद्देश्य—समृद्ध नेपाल निर्माण—तर्फ उन्मुख गराएको निष्कर्ष निकालिएको छ। सहभागीहरूले अब विगतका कमजोरी दोहोरिन नदिने र एकताबद्ध रूपमा अगाडि बढ्ने प्रतिबद्धता जनाएका छन्।