निकोलस माडुरोको गिरफ्तारीका लागि ५० मिलियन डलरको पुरस्कार घोषणा

संयुक्त राज्य अमेरिकाका महान्यायाधिवक्ता प्याम बण्डीले भेनेजुएलाका राष्ट्रपति निकोलस माडुरोको गिरफ्तारीमा सहयोग पुर्‍याउने जानकारी दिने व्यक्तिका लागि ५० मिलियन अमेरिकी डलर पुरस्कार घोषणा गरेकी छन्।

न्याय विभाग र विदेश विभागले संयुक्त रूपमा यो पुरस्कार रकम पहिलेको २५ मिलियन डलरबाट बढाएर ५० मिलियन बनाइएको जानकारी दिएका हुन्। अमेरिकी अधिकारीहरूले माडुरोलाई लागुऔषध माफिया र सडक गिरोहहरूसँग मिलेर अवैध कारोबारी र भ्रष्ट, दमनकारी शासन सञ्चालन गरेको आरोप लगाएका छन्।

“माडुरोले Tren de Aragua (TdA), Sinaloa र Cartel de los Soles जस्ता विदेशी आतङ्कवादी संगठनहरू प्रयोग गरेर हाम्रो देशमा हिंसा ल्याउने काम गरेका छन्,” बण्डीले एक भिडियो सन्देशमार्फत भनिन्, “ माडुरो संसारकै एक प्रमुख लागुऔषध तस्कर हुन् र हाम्रो राष्ट्रिय सुरक्षाका लागि ठूलो खतरा पनि।”

‘कार्टेल डे लोस सोलेस’ नामक संगठन उच्चपदस्थ भेनेजुएली अधिकारीहरूको संलग्नतामा सञ्चालन हुँदै आएको एक लागुऔषध तस्करी समूह हो। मार्च २०२० मा अमेरिकाले माडुरोविरुद्ध नार्को–आतङ्कवाद, कोकिन आयातको षड्यन्त्र, मेशिनगन र विस्फोटक हतियार राख्ने षड्यन्त्रलगायतका मुद्दा लगाएको थियो।

ड्रग इन्फोर्समेन्ट एजेन्सी (DEA) ले हालसम्म माडुरो र उनका सहयोगीहरूबाट सम्बन्धित ३० टन कोकिन बरामद गरिसकेको छ। बण्डीका अनुसार ती लागुऔषधहरू मेक्सिको र भेनेजुएलामा आधारित गिरोहहरूको मुख्य आम्दानी स्रोत हुन्।

अझ खतरनाक कुरा, कोकिनमा फेन्टानिल मिसाएर बेचिने हुँदा हजारौँ अमेरिकी नागरिकको ज्यान गएको बण्डीको भनाइ छ।

संयुक्त राज्यको विदेश मन्त्री मार्को रुबियोले माडुरोलाई बारम्बार “नराम्रो तानाशाह” भनी आलोचना गर्दै आएका छन्। उनले माडुरोलाई २०२४ को विवादास्पद निर्वाचनपछि भेनेजुएलाको वैध नेता नभएको जिकिर गर्दै आएका छन्।

“तानाशाह माडुरोले भेनेजुएली जनताको मतलाई लत्याएर आफूलाई विजेता घोषणा गरेको एक वर्ष पूरा हुँदा अमेरिकाले अझै पनि लोकतान्त्रिक प्रणालीको पुनर्स्थापनाका लागि पूर्ण समर्थन जनाइरहेको छ,” रुबियोले गत महिना भनेका थिए।

रुबियोले माडुरोलाई ‘नार्को–आतङ्कवादी संगठन’ कार्टेल डे लोस सोलेसको नेता भनी आरोप लगाउँदै भने, “उहाँले कोकिन युरोप र अमेरिकामा तस्करी गर्ने संरचनालाई संरक्षण गर्न भेनेजुएलाका संस्थाहरूलाई दुरुपयोग गर्नुभएको छ।”

सन् २०२५ को जनवरीमा अमेरिकी विदेश मन्त्रालयले माडुरोको गिरफ्तारीका लागि २५ मिलियन डलरको पुरस्कार घोषणा गरेको थियो। उनले कोलम्बियाली आतङ्कवादी संगठन FARC सँग मिलेर हिंसात्मक लागुऔषध षड्यन्त्रमा संलग्न भएको, ठूलो मात्रामा कोकिन ढुवानी गराउने सम्झौता गरेको, FARC लाई सैनिक हतियार उपलब्ध गराएको, होन्डुरसलगायत देशका लागुऔषध कारोबारीहरूसँग सहकार्य गरेको, र कार्टेलको लागि मिलिशिया समूह तयार पारेको आरोप लगाइएको छ।

महान्यायाधिवक्ता बण्डीका अनुसार माडुरोसँग सम्बन्धित ७० करोड डलरभन्दा बढी सम्पत्ति अमेरिकी न्याय विभागले जफत गरिसकेको छ, जसमा दुई निजी विमान र नौ गाडीसमेत रहेका छन्।

अमेरिकाले माडुरोलाई खोजी सूचीमा राख्दै अन्तर्राष्ट्रिय सुरक्षाका लागि गम्भीर खतरा ठानेको छ र उसको गिरफ्तारीमा सघाउने जुनसुकै जानकारीलाई उच्च प्राथमिकतामा लिएको छ।