काठमाडौं, भदौ ११, २०८३ — चीनको हिमाली क्षेत्रमा हिमताल फुटेर आएको बाढी नेपालको सीमावर्ती भोटेकोसी नदीमा प्रवेश गरी रसुवा, नुवाकोट, धादिङलगायतका जिल्लामा ठूलो जनधनको क्षति पुर्‍याएको घटनाप्रति विभिन्न साहित्यिक तथा सिर्जनशील संस्थाहरूले गहिरो दुःख व्यक्त गरेका छन्।

विभिन्न साहित्यिक संस्थाका अध्यक्ष तथा प्रतिनिधिहरूले बिहीबार संयुक्त विज्ञप्ति जारी गर्दै अप्रत्याशित रूपमा आएको बाढीले सम्पूर्ण नेपालीलाई शोकमग्न बनाएको उल्लेख गरेका छन्। उनीहरूले विपद्मा ज्यान गुमाउने सबैप्रति भावपूर्ण श्रद्धाञ्जलि अर्पण गर्दै शोकसन्तप्त परिवारजनप्रति समवेदना व्यक्त गरेका छन्। साथै घाइतेहरूको शीघ्र स्वास्थ्यलाभको कामना गरेका छन्।

विज्ञप्तिमा अहिलेको अवस्थालाई ‘राष्ट्रिय शोकको घडी’ भन्दै उद्धार, राहत र सहयोगका काममा सम्पूर्ण नेपाली एकजुट हुनुपर्नेमा जोड दिइएको छ।

“यो समय राष्ट्रिय शोकको समय हो। त्यसैले अहिले सम्पूर्ण नेपाली आपतविपतमा परेकाहरूको उद्धार र सहयोगका लागि एकजुट भएर लाग्नुपर्छ,” संयुक्त विज्ञप्तिमा भनिएको छ।

साहित्यकार तथा सिर्जनकर्मीहरूले विपद्पछिको उद्धार, राहत र व्यवस्थापनका लागि सरकार तथा निजी क्षेत्रबाट भइरहेका र आगामी दिनमा हुने सहयोगप्रति ऐक्यबद्धता जनाएका छन्। विपद्को समयमा नआत्तिई धैर्य कायम राख्न तथा आ–आफ्नो स्थानबाट उद्धार, राहत र सहयोगका काममा सक्रिय हुन पनि उनीहरूले सबैलाई आग्रह गरेका छन्।

संयुक्त विज्ञप्तिमा रमेश विकल साहित्य प्रतिष्ठानका अध्यक्ष रोचक घिमिरे, साहित्यिक पत्रकार संघ तथा शंकर लामिछाने प्रतिष्ठानका अध्यक्ष राधेश्याम लेकाली, नेपाल स्रष्टा समाजका अध्यक्ष श्रीओम श्रेष्ठ ‘रोदन’, वासु शशी स्मृति परिषद्का अध्यक्ष कालीप्रसाद रिजाल, एपेक नेपालका अध्यक्ष विश्वविमोहन श्रेष्ठ, नेपाली कलासाहित्य डट कम प्रतिष्ठानकी अध्यक्ष मोमिला, गुन्जनकी अध्यक्ष जलेश्वरी श्रेष्ठ लगायत विभिन्न साहित्यिक संस्थाका प्रतिनिधिहरू सहभागी छन्।

त्यस्तै नेपाल मुक्तक प्रतिष्ठानका अध्यक्ष रामकाजी कोने, उपन्यास समाज नेपालका अध्यक्ष शङ्कर भारती, अभिनव साहित्य समाजका अध्यक्ष गोविन्द घिमिरे ‘वेदमणि’, सुरभि साहित्य प्रतिष्ठानका अध्यक्ष बाजुराम पौडेल, लीलाध्वज थापा साहित्य प्रतिष्ठानका अध्यक्ष विजयध्वज थापा, दायित्व वाङ्मय प्रतिष्ठानका अध्यक्ष रामप्रसाद पन्त, गीतकार संघ नेपालका अध्यक्ष वसन्त वित्यासी थापा, भूगोल साहित्य समाजका अध्यक्ष विनोद नेपाल, सुनकोशी वाङ्मय प्रतिष्ठानका अध्यक्ष छविरमण सिलवाल, नेपाल बालसाहित्य समाजका अध्यक्ष विजयराज आचार्य र लघुकथा समाजका अध्यक्ष तुलसीहरि कोइरालाले पनि विज्ञप्तिमा ऐक्यबद्धता जनाएका छन्।

संयुक्त वक्तव्यको समन्वय संस्था समन्वय समितिका संयोजक राधेश्याम लेकालीले गरेका हुन्।

साहित्यिक तथा सिर्जनशील क्षेत्रका प्रतिनिधिहरूले विपद्को यो कठिन समयमा राजनीतिक, सामाजिक वा व्यक्तिगत भिन्नताभन्दा माथि उठेर पीडितको उद्धार, राहत, उपचार र पुनःस्थापनामा सबै पक्षको सहकार्य आवश्यक रहेको सन्देश दिएका छन्।