पुस्ता (Pusta) एउटा मन छुने नेपाली वेब सिरिज हो जसले गाउँमा बसोबास गर्ने तीन पुस्ते परिवारको माया, संघर्ष र सरल जीवनशैलीलाई भावुक ढंगले चित्रण गर्छ। हजुरबुबा–हजुरआमा, छोरा, बुहारी र नातिको वरिपरि घुम्ने यो कथा ग्रामीण जीवनका दैनिक चुनौती, आपसी आत्मीयता र परम्परागत मूल्यहरूको उजागर गर्छ। यसले परिवर्तन र परम्पराको टकरावलाई मार्मिक ढंगले प्रस्तुत गर्दै परिवारलाई एकताबद्ध राख्न गरिने त्याग र समर्पणलाई उजागर गर्छ। शुद्ध ग्रामीण परिवेश, मौलिक संस्कृति, र सजीव दृश्यहरूले भरिएको ‘पुस्ता’ ले नेपाली गाउँको जीवनशैलीको वास्तविक रुप प्रस्तुत गर्छ र पुस्ताबाट पुस्तामा सर्ने माया, संस्कृति र परिवारप्रतिको निष्ठाको मूल्य सम्झाउने उत्कृष्ट प्रयास हो।

काठमाडौं/ नेपाली गाउँ समाजको सादगी, परम्परा, माया र संघर्षलाई समेट्दै तयार गरिएको नयाँ नेपाली वेब सिरिज ‘पुस्ता’ (Pusta) को ट्रेलर सार्वजनिक भएको छ। तीन पुस्ते ग्रामीण परिवारको जीवनकथामा आधारित यो सिरिजले नेपाली समाजको भावनात्मक पक्ष, संस्कृति र समयसँगै बदलिँदो जीवनशैलीलाई उजागर गर्ने प्रयास गरेको छ।

सिरिजको कथा जीवन पन्तले परिकल्पना गरेका हुन् भने लेखन विनोद परियारले गरेका छन्। खमेश श्रेष्ठको निर्देशनमा तयार भएको यो वेब सिरिजको छायांकन रामकृष्ण कंडेलले गरेका हुन् भने उमेश शाह सहायक क्यामराम्यानको रूपमा रहेका छन्। सम्पादन र कलर सुरेश श्रेष्ठले गरेका छन्।

कलाकारहरूको मजबूत टोली
पुस्ता सिरिजमा लक्ष्मण विक्रम बस्नेत, विद्या कार्की, विनोद श्रेष्ठ, अनिता गिरी, मेलिना ठकुरी, विनोद पौडेल, ईश्वरी बराल, विनोद परियार, रोहित कार्की, रामकुमार महर्जन, पदम राई, अनन्या आरएल ठकुरी, शिवहरि नेपाल, लक्ष्मी ठकुरी, विकास थापा मगर, भरत उदासी, राजेन्द्र शाह शंकर, साकार घिमिरे, नानु भण्डारी र सुमित परियारजस्ता अनुभवी तथा नवप्रतिभा कलाकारहरूको अभिनय देख्न सकिन्छ।

संघर्ष, माया र परम्पराको कथावाचन
यो श्रृंखलाले हजुरबुबा-हजुरआमा, छोरा, बुहारी र नातिको जीवन वरिपरि घुम्दै गाउँको जीवनशैली, दैनिकी, पीडा, समर्पण र पुस्तागत सम्बन्धलाई उजागर गर्छ। परम्परा र आधुनिक सोचबीचको द्वन्द्व, परिवारलाई एकताबद्ध राख्न गरिने त्याग, र संस्कृतिको निरन्तरताको सन्देश यसले दिन खोजेको छ।

संगीत, संवाद र प्राविधिक पक्ष
पृष्ठभूमि संगीत कमल सिंजाली थापाको रहेको छ भने संवाद मनोज धमलाले लेखेका छन्। मेकअपमा मदन न्यौपाने, प्रोडक्सन व्यवस्थापनमा सुजन गिरी र मिडिया साझेदारका रूपमा टेक्सास मिडिया, विश्व न्यूज, र Nepalmother.com (US) रहेका छन्।

विशेष धन्यवाद रोजन श्रेष्ठ, कोपिल गुरुङ, पविन गुरुङ, रामप्रसाद खनाल (अमेरिका) र रमेश कुँवरलाई दिइएको छ।

Pusta Official युट्युब च्यानलबाट सिरिजको ट्रेलर सार्वजनिक गरिएको छ र सिरिजका अन्य भागहरू क्रमशः रिलिज हुँदै जाने जानकारी दिइएको छ। ग्रामीण नेपाली समाजको मौलिकता, माया र जीवनशैलीको संवेदनशील चित्रण बोकेको ‘पुस्ता’ ले दर्शकको मन छोने विश्वास निर्माण गरिएको छ।