‘राजसंस्था पुनर्स्थापनाका लागि संयुक्त जनआन्दोलन परिचालन समिति’ले प्रधानमन्त्री केपी शर्मा ओलीको अभिव्यक्ति हिंसा भड़काउने र असभ्य भएको भन्दै यसको भर्त्सना र निन्दा गरेको छ। समितिले शान्तिपूर्ण रूपमा संवैधानिक राजसंस्थासहितको व्यवस्थाका लागि आत्मसमर्पण गर्न पनि सुझाव दिएको छ। सरकारले तीनकुने गोलीकाण्ड मच्चाउनुपूर्व समेत प्रधानमन्त्री केपी शर्मा ओलीले आफ्ना कार्यकर्तालाई राजसंस्थावादी देशभक्तहरुमाथि बाघले झम्टिएजस्तो झम्टिएर हत्याहिंसामा उत्रिन निर्देशन दिएको र फेरि पनि हत्या हिंसामा उत्रिन दिएका पछिल्ला अभिव्यक्तिहरूको समितिले आइतबार एक विज्ञप्ति प्रकाशित गरी निन्दा गरेको हो। ‘कुनै व्यक्ति प्रधानमन्त्री नै हो भने उसले आफ्नो पूरै देश सरहद नै आफ्नो नियन्त्रणमा छ भन्न सक्नुपर्छ तर निश्चित दिन निश्चित स्थान वा राजधानी नियन्त्रणमा लिनू भन्ने फरमान जारी गर्नु पराजित भुत्ते शासकको लुते अभिव्यक्ति हो,’ समितिले भनेको छ।

राजसंस्था पुनर्स्थापनाको आन्दोलन गौरवमय रुपमा शान्तिपूर्ण हुने उल्लेख गर्दै समितिले यसअघि राष्ट्रगान गाइरहेको समूहमाथि अश्रूगोलीवर्षा गरिएजस्तो अशान्ति मच्चाउन खोजिएमा इतिहासले नबिर्सने जवाफ सहित सत्ताधारीहरुलाई नेटो कटाउने शक्ति जनतासँग रहेको चेतावनी पनि दिएको छ। समितिले भनेको छ- राजधानी कब्जा गर्ने प्रधानमन्त्रीको अभिव्यक्तिले उहाँ केवल सुरक्षाकर्मीको कब्जामा रहेर मात्र सुरक्षित हुनुहुन्छ देश अहिले उहाँको कब्जामा छैन भन्ने प्रमाणित गरेको छ । त्यसैले शान्तिपूर्ण संवैधानिक राजसंस्था सहितको व्यवस्थाका लागि आत्मसमर्पण गर्न पनि हामी सुझाव दिन चाहन्छौं।’

राजधानी कब्जा गर्ने अभिव्यक्ति दिने प्रधानमन्त्रीले पूर्वराजा सरह एक्लै आफ्ना सुरक्षाकर्मी र पालितपोषित समूह बिना सडकमा हिँडेर देखाउन पनि समितिले चुनौती दिएको छ। देशको कार्यकारी पदमा रहेर आफैं हिंसा भड्काउने अभिव्यक्तिबाट सिर्जना हुने क्षतिको आफैँ जिम्मेवार हुनु पर्नेमा पनि समितिले सचेत गराएको छ। देशविदेशका मानवअधिकारकर्मी, मानवअधिकारवादी संस्था, पर्यवेक्षक समेत सबैले ओलीको अभिव्यक्तिलाई जानकारीमा लिएर सचेत गराइदिन पनि समितिका प्रवक्ता स्वागत नेपालले जारी गरेको विज्ञप्तिमा आह्वान गरिएको छ।

प्रेस विज्ञप्ति :प्रधानमन्त्रीको हिंसा भड्काउने असभ्य अभिव्यक्तिप्रति गम्भीर आपत्ति

हाल नेपालको प्रधानमन्त्री पदमा रहेका खड्ग प्रसाद (ख.प्र.)ओलीले शान्तिपूर्ण जनप्रदर्शनका सम्बन्धमा पटक पटक असभ्य शैलीमा हिंसा भड्काउने आपराधिक अभिव्यक्तिमार्फत उपद्रव मच्चाउँदै आएकोमा यस राजसंस्था पुनर्स्थापनाका लागि संयुक्त जनआन्दोलन परिचालन समितिको गम्भीर ध्यानाकर्षण भएको छ ।
सरकारले तीनकुने गोलीकाण्ड मच्चाउनुपूर्व समेत निजले आफ्ना कार्यकर्तालाई राजसंस्थावादी देशभक्तहरुमाथि बाघले झम्टिएजस्तो झम्टिएर हत्याहिंसामा उत्रिन निर्देशन दिएको र फेरि पनि हत्या हिंसामा उत्रिन दिएका पछिल्ला असभ्य दुराभिव्यक्तिहरुको हामी घोरा भत्र्सना र निन्दा गर्दछौं ।
कुनै व्यक्ति प्रधानमन्त्री नै हो भने उसले आफ्नो पूरै देश सरहद नै आफ्नो नियन्त्रणमा छ भन्न सक्नुपर्छ तर निश्चित दिन निश्चित स्थान वा राजधानी नियन्त्रणमा लिनू भन्ने फरमान जारी गर्नु पराजित भुत्ते शासकको लुते अभिव्यक्ति हो ।
राजसंस्था पुनर्स्थापनाको आन्दोलन गौरवमय रुपमा शान्तिपूर्ण हुनेछ । यसअघि राष्ट्रगान गाइरहेको समूहमाथि अश्रूगोलीवर्षा गरिएजस्तो अशान्ति मच्चाउन खोजिएमा इतिहासले नबिर्सने जवाफ सहित विदेशी दलाल सत्ताधारीहरुलाई नेटो कटाउने शक्ति जनतासँग रहेको तथ्य ज्ञात रहोस् भन्ने चेतावनी दिन चाहन्छौं ।
राजधानी कब्जा गर्ने प्रधानमन्त्रीको अभिव्यक्तिले उहाँ केवल सुरक्षाकर्मीको कब्जामा रहेर मात्र सुरक्षित हुनुहुन्छ देश अहिले उहाँको कब्जामा छैन भन्ने प्रमाणित गरेको छ । त्यसैले शान्तिपूर्ण संवैधानिक राजसंस्था सहितको व्यवस्थाका लागि आत्मसमपर्ण गर्न पनि हामी सुझाव दिन चाहन्छौं ।
राजधानी कब्जा गर्ने अभिव्यक्ति दिने प्रधानमन्त्रीले राजा सरह एक्लै सो दिन आफ्ना सुरक्षाकर्मी र पालितपोषित समूह बिना एक्लै सडकमा हिँडेर देखाउन पनि चुनौति दिन चाहन्छौं । नत्र देशको कार्यकारी पदमा रहेर आफैँ हिंसा भड्काउने अभिव्यक्तिबाट सिर्जना हुने क्षतिको आफैँ जिम्मेवार हुनु पर्नेमा पनि सचेत गराउन चाहन्छौं ।
साथै देशविदेशका मानवअधिकारकर्मी, मानवअधिकारवादी संस्था, पर्यवेक्षक समेत सबैले खड्ग प्रसाद (ख.प्र.)ओलीको उक्त प्रदुषित अभिव्यक्तिलाई जानकारीमा लिएर सचेत गराइदिन पनि आह्वान गर्दछौं ।
~
स्वागत नेपाल
प्रवक्ता,
संयुक्त जनआन्दोलन परिचालन समिति