यो हप्ता चैत्र पन्ध्रमा काठमाडौँ मा गएको राजनीतिक भुकम्प माथि उच्च अदालतको बुटवलको एउटा इजलासले थुनामा पठाउन शुक्रबार आदेश दिएर अर्को भुकम्प ल्याउँदै गर्दा उता जाजरकोटमा भने बास्तबिक भुकम्प गएको छ।
जाजरकोटमा शुक्रबार लगातार भूकम्पका दुई धक्का मापन गरिएको छ । तीन मिनेटको अन्तरमा पैंक केन्द्रविन्दु भएर दुई धक्का मापन गरिएको हो । राष्ट्रिय भूकम्प माापन तथा अनुसन्धान केन्द्रले जनाएको छ । भूकम्पपछि केही घरहरू चर्किएको जाजरकोटका प्रमुख जिल्ला अधिकारी मेखबहादुर मंग्रातीले जानकारी दिए । “घरहरू चर्किएको भन्ने खबर आएको छ । क्षतिको विवरण संकलन गर्ने कार्य गरेका छौँ,” प्रमुख जिल्ला अधिकारी मेखबहादुर मंग्रातीले भने । पहिलो धक्का साँझ ८ बजेर ७ मिनेट जाँदा ५.२ म्याग्निच्युडको र दोस्रो साँझ ८ बजेर १० मिनेट जाँदा ५.५ म्याग्निच्युडको रहेको थियो ।

यता रवि लामिछाने पक्राउ परेका छन् । उनलाई पक्राउ गर्न प्रहरी उनको घरमै पुगेको थियो । संगठित रुपमा सहकारी ठगी गरेको आरोप खेपिरहेका रास्वपा सभापति रवि लामिछानेलाई उच्च अदालतको बुटवल इजलासले थुनामा पठाउन शुक्रबार आदेश दिएको थियो । राति ९ बजेतिर उनलाई पक्राउ गर्न केन्द्रीय अनुसन्धान ब्यूरो (सीआईबी), उपत्यका अपराध अनुसन्धान कार्यालय र जिल्ला प्रहरी परिसर, काठमाडौंको संयुक्त टोली हात्तीगौंडास्थित सिजी हिल्समा पुगेको थियो । प्रहरी टोली पुग्दा लामिछाने आफ्नो कोठामा बसिरहेका थिए । उनलाई थुनामा पठाउने आदेश आएको थाहा पाएलगत्तै रास्वपाका उपसभापति डिपी अर्याल, सांसद् शिशिर खनाल, गणेश पराजुली, नेता प्रणय राना, विपिन आचार्य लगायत पनि त्यहाँ पुगिसकेका थिए ।

लामिछानेलाई शुक्रबार काठमाडौं प्रहरी परिसरमा राखिने भएको छ । सुप्रिम सहकारी ठगी तथा संगठित अपराधमा शुक्रबार पक्राउ परेका लामिछानेलाई शनिबार मात्रै रूपन्देही लैजाने प्रहरीले जनाएको छ ।

उच्च अदालत तुलसीपुरको बुटवल इजलासले रूपन्देहीको सुप्रिम सहकारी ठगी तथा संगठित अपराधमा थुनामा पठाउने आदेश दिएसँगै प्रहरीले उनलाई पक्राउ गरेको हो । रविलाई उनको निवास बूढानीलकण्ठबाट शुक्रबार साँझ पक्राउ गरिएको हाे ।

उच्च अदालत तुलसीपुरको बुटवल इजलासका न्यायाधीश रमेश ढकाल र स्वीकृति पराजुलीको संयुक्त इजलासले लामिछानेलाई शुक्रबार थुनामा पठाउने आदेश गरेको थियो । उक्त मुद्दामा रूपन्देही जिल्ला अदालतले एक करोड धरौटीमा रिहा हुने आदेश गरेको थियो । उच्च अदालतले उक्त मुद्दा बदर गर्दै रविलाई पुर्पक्षका लागि थुनामा राखेर अनुसन्धान अघि बढाउन आदेश दिएको हो । उच्च अदालत तुलसीपुरका न्यायाधीशद्वय रमेश ढकाल र स्वीकृति पराजुलीको संयुक्त इजलासले जिल्ला अदालत रुपन्देहीलगायतको आदेश बदर गर्दै रविलाई थुनामा पठाउने आदेश गरेको हो । उच्च अदालत तुलसीपुरका सूचना अधिकारी रामबहादुर कुँवरले रविलाई थुनामा पठाउने आदेश भएको बताए ।

पक्राउ गर्न प्रहरी पुगेपछि लामिछानेले रास्वपाको फेसबुकमार्फत लाइभ गरेर भिडियो सन्देश जारी गरेका थिए । त्यसमा उनले भनेका छन्ः
“आदरणीय आमाबुवा दाजुभाइ दिदीबहिनीहरू,
मेरो घरमा प्रहरी आएको छ। मैले समाचारबाट उच्च अदालतको आदेशबारे त थाहा त पाएँ। तर, बिना कुनै कारण अहिले यतिखेर केही पूर्जी पनि दिइएको छैन । कागज पनि दिइएको छैन।

मेरो घरभित्र आएर बेडरूमभित्र आउनु भएको छ । मैले सार्वजनिक पनि गरिसकेको छु। उताबाट आदेश हुनुभन्दा पहिले यसरी प्रहरी तैनाथ हुनु। यो सबैचीजले एउटा ठूलो आशंका सृजना गरेको छ ।

मैले सम्मानित अदालतको आदेशलाई सही मानेकै छु। कानुनलाई मानेकै छु । म आफै पनि उपस्थित हुन गएको छु । अहिले पनि सार्वजनिक गरेकै छु। तर यो राज्‍य आतंक ।

यो धरपक्कड ममाथि के कारणले भइरेको छ ? मैले बुझ्न सकेको छैन । भोलिको चितवनको कार्यक्रमलाई निरन्तरता दिनुहोला । मलाई लागेको थियो केही कुरा भन्छु भनेर। तर, सामान्य अभ्यासभन्दा पर गएर जबरजस्ती बिना कागजपत्र प्रहरीले आतंक सृजना गर्‍यो ।

मलाई आतंकित बनाएको छ । मेरा लागि कुनै पक्रिया पूरा गर्न मानेको छैन। मेरो घरभित्र प्रहरी छिरेको छ । मैले यसरी नै गिरफ्तारी दिन्छु भनेको हुँ ।

जे होस् आम नागरिकले सब चिज हेरिरहेको छ भन्‍ने मलाई विश्वास छ । न्यायको लडाइँ म एक थोपा रगत रहुञ्जेल लडिरहन्छु। मैले कुनै गल्ती गरेको पनि छैन। कुनै पनि अपराध गरेको छैन। तर मलाई संसारकै सबैभन्दा ठूलो अपराधीले जस्तो ममाथि गरिएको यो व्‍यवहार आम जनताले हेरिरहेका छन् भन्‍ने मैले विश्वास लिएको छु। म धेरै केही पनि भन्दिन ।

म सम्मानित अदालतप्रति आशा र भरोसा राखेर कानुनी प्रक्रियामा सघाउनका लागि लागि परेको छु । यो दुनियाँका जति पनि न्यायलयका ढोकाहरू छन् । ती सबै ढोका ढक्ढक्याउँछु। मलाई यिनीहरूले हत्या नै गरेछन् भने पनि मतपत्रमा घण्टी चुनाव चिह्न रहनेछ। यसैलाई आशा र भरोसाको आवाज बुलन्द गरिरहनु होला । म कानुनी लडाइँमा छु । नमस्ते ।”

यसै बीच रास्वपाका संस्थापक महामन्त्री डा. मुकुल ढकालले रवि लामिछानेविरुद्ध पुर्पक्षमै राखेर अनुसन्धान गर्ने आदेशलाई लिएर टिप्पणी गरेका छन् । उनले यसअघि रवि लामिछानेलाई धरौटीमा रिहा गर्ने जिल्ला अदालतको आदेशबाट खुसी नहुन आग्रह गरेकोमा रविको अस्वभाविक खुसी देखिएको टिप्पणी गरेका छन् । आफूले लामिछानेलाई पार्टीबाट बिदा दिएर मुद्दा लड्ने फुर्सद दिउँभन्दा नमानिएको भन्दै यसले सिंगो पार्टीलाई घाटा पुर्‍याउने उनको भनाइ छ ।

“धरौटीमा छोड्दा पटक पटक यो देशमा न्याय जिउँदो छ भनेर अदालतको सम्मान गरेका थिए । मैले त भनेकै थिए, धेरै खुसी नहुनु । तर खुसी भएपछि कसको के लाग्छ र, बधाई दिए,” मुकुलले भनेका छन्, “अब अदालतलाई गाली गर्नुको के तुक रहन्छ र ? हिजो जसरी अदालतको फैसलाको स्वागत गरिएको थियो, त्यसरी स्वागत गर्ने ।”

उनले २०८१ असार १९ गतेको केन्द्रीय समितिमा आफूले राखेको प्रस्ताव स्मरण गरेका छन् । “रविको पार्टी होइन राष्ट्रिय स्वतन्त्र पार्टी बनाऔँ, यो प्रस्तावमा नआइ सुखै छैन । रवि दाइलाई राजनीतिबाट बिदा गरी राष्ट्रिय स्वतन्त्र पार्टी निर्माणमा लागौँ,” आफ्नो प्रस्तावबारे मुकुलले भनेका छन्, “यसले दाइलाई पनि सबै कुरा छोडेर, मुद्दा मामिलामा फोकस हुन सजिलो हुन्छ र पार्टी पनि बन्ने दिशामा अघि बढ्छ ।”

मुकुलले आफूले भनेको कुरा नौ महिनासम्म पनि नबुझे रास्वपाका अन्य नेताहरूले पनि राजनीति छोडिदिए हुने टिप्पणी गरेका छन् । उनले रास्वपा जोगाउने आधार आफ्नो प्रस्तावमा फर्किएर मात्र प्राप्त हुने उल्लेख गरे ।

“असारमा भनेको कुरा चैत्र लाग्दासम्म पनि बुझ्न सकेनौँ भने, राजनीति के गर्छौं ? छोडिदिए हुन्छ,” मुकुलले भनेका छन्, “अब पार्टी जोगाउने उपाय भनेको असारको प्रस्तावमा फर्कनु हो । रविको पार्टी होइन, राष्ट्रिय स्वतन्त्र पार्टी बनाउने निर्णय गर्नु हो ।” उनले त्यसो नगरे विधिको शासन र नैतिक मूल्यमान्यताको राजनीति गर्छु भन्न नमिल्ने उल्लेख गरेका छन् ।

उनले रविले भनेका अन्तिम वाक्य स्मरण गर्दै रविलाई नै उक्त भनाइ फर्काएका छन् । “देख्यौँ, शून्यमा पुर्‍याए तिमीलाई,” मुकुलले रविको अन्तिम वाक्य सम्झिँदै भनेका छन्, “हुन त मैले समीक्षा प्रतिवेदनमा नै शून्यबाट यात्रा सुरु गर्दै छु भनेर लेखेको थिएँ । दाइलाई सुनाइदिनु होला , दाइ, म शून्य थिएँ, शून्य छु र शून्य नै रहुँला, तर अब तपाईं कति ?”

अदालतको आदेश: