आहा गजबको संघीय लोकतान्त्रिक गणतन्त्र हाम्रो सुन्दर देशमा कति सुहाएको ? हिजोआज लोकतान्त्रिक व्यवस्था बचाउन आलोचना र परिवर्तन गर्नेहरुको जुलुस ,सभा रोक्ने उपायको खोजी हुदैछ । लोकतान्त्रिक व्यवस्था बचाउन सकभर पार्टीका पाल्तु गुन्डागर्दीका नाममा उदाएका बिचौलिया र तीनले पालेका जन्तु मार्फत तरबार ,बन्दुक ,खुकुरी र लठ्ठीले संरक्षण गर्ने ।तिनको बुताबाट नचले प्रहरी प्रयोग गर्ने ।उसले पनि नसके सेनाको प्रयोग ।किनभने यहाँ लोकतान्त्रिक व्यवस्था बचाउनु जरुरी छ ।विरोधी स्वरका सभा ,जुलुस विरोधसभाले व्यवस्था खतरामा पर्छ ।किनभने यहाँ लोकतन्त्र छ ??

धन्य आएछौं लोकतन्त्र त्यो पनि डोली चढेर होइन मोतीलाल नेहरुको सन्तति गान्धी परिवारको संरक्षणमा १२ बुँदे दिल्ली सम्झौता सहित श्यामशरण, सीताराम यचुरी र एसडी मुनीहरुको काँध चढेर। तिमीहरूले ल्याएको संघीय ,लोकतान्त्रिक ,गणतन्त्र अचेल १८ वर्ष पछि परिपक्व भएको छ। दिल्लीको मसिनो धागो चुडिएर देखिने गरि बेइजिङ र वासिङ्टन ढुक्ने भएको छ । राजनीतिमा मात्रै छैन हरेक क्षेत्रमा यसले आफ्नो क्षेत्राधिकार गाँज्दैछ। राज्यका हरेक अंग ,कार्यपालिका ,व्यवस्थापिका ,न्यायपालिका अनि त्यसको मातहतमा चल्ने सबैको उस्तै हविगत छ ।संवैधानिक निकाय पुरै मार्क्स ,लेनिन ,माओ ,स्टालीन र चे ग्वेभाराकरण छ ।नेपालीको आफ्नो सम्पत्ति धर्म ,संस्कृति ,परम्परा र पूर्वजले स्थापित गरेको नेपाली मुल्य र मान्यतालाई धमाधम वञ्चरो हान्दैछन्। दिल्ली पनि गम खादो हो भस्म पार्न पालेको भष्मासुर पो परेछ,अर्थात मै माथि प्रहार गर्दैछ ।

तिम्रो वरदानले विकृतिको चरमरुप छ यहाँ ।यहीँ अवस्था र व्यवस्था नेतृत्वमा नेपाली मात्रैको कहिल्यै सुधार हुने छाँट छ‌ैन यहाँ ।जब नयाँपुस्ताले बुझ्न थाल्यो ,विरोध सडकमा आउन थाल्यो अनि भन्दैछ अब लोकतन्त्र फेरि खतरामा छ। तर यिनलाई बचाउने तिमी आफै उता बाचेनौं ।बरु यतातिर वीपी र मनमोहनको बखान र व्याख्या युरो ,डलर ,पाउन्ड ,आरएमबीका पौष्यपुत्रहरुले गर्ने भएको रुपमा बाँचेको छ लोकतन्त्र । स्वयं वीपी कोइरालाले सधै साथमै राखेका,उनकै संरक्षणमा हुर्केका उनैले शिक्षा ,दीक्षा दिएका छोरा प्रकाश ,बुहारी ,नातीनी मनीषा, छोरा सशांक भन्दा बढी बुझ्ने बखानेहरु विचित्र ढंगले पेस भएका छन् ।यो लाजक‍ो पसारो छ यहाँ ।वीपीको आदर्शमा कांग्रेस बसेको हुदो हो त गणेशमान सिंह ,कृष्णप्रसाद भट्टराई जस्ताले अब कांग्रेस रहेनछ ,यसको नाश अवश्यम्भावी भनेर किन पार्टी छाड्थे होलान् र ?

वीपी र मनमोहनको नाममा लुटपाटमा संलग्नहरु गुजारा चलाउने, पार्टी चलाउनेहरु सुगा गोपी कृष्ण बोलमा छन् ।विचार शून्य तर राजनीतिका नाममा व्यापार, धन्दा जारी छ । आयआर्जन र निरन्तर तिकडममा सत्ता, अहिलेको अब्बल राजनीति र लोकतन्त्र यहीँ हो । चुनाव लड्ने माओवादी संग मिलेर सरकार बनाउने सकभर सबैसंग मिलिजुली भागबन्डाको प्रस्ताव फेरि सुरु भएको छ ।किनभने नत्र अर्को राष्ट्रिय शक्ति उदाउँदो छ ।त्यस्तो शक्ति जसले सबै विगतको ब्रम्हलुटलाई उथलपुथल पार्नेछ ।यसो गर्दा फेरि उही पुरानो चिस्यानको छिडी पुरानो सम्झना र भक्कानो छुट्छ सायद यसढंगको पनि चिन्ता छ। लुटपाटको निरन्तरता रोकिने त्रासमा छ लोकतन्त्र ।

स्थायी प्रतिपक्ष भन्छन् सञ्चारलाई झन्डै ६० प्रतिशत पश्चिमाको नाली बनेर दुर्गन्धित बनाउने काममा ब्यस्त छ ।यहाँका प्रतिष्ठित व्यक्ति ,व्यापारिक घराना र विश्वमा नाम आर्जन गर्न सफललाई बदनाम गराउन अहोरात्र खटिएको छ। मनीषा कोइराला ,भवानी राणा ,भाष्कराज राजकर्णिकार,विनोदबहादुर श्रेष्ठ ,भीम उदास ,लगायत दर्जनौं बौद्धिक वर्गको चासोलाई यथास्थितिवादीले आश्चर्यजनक ढंगले प्रश्न उठाएको छ ।भाडाका टट्टूहरु सधै बिक्रीको माल हुन यो बुझ्न सकिन्छ ।यति चै सबैले बुझ्नुपर्छ प्रकाश कोइराला र मनीषा कोइरालाले किन पछिल्लो राजनीतिक यात्रा तय गरे ।उनको परिवारले भन्दा वीपीलाई नजिकैबाट मैले बढी बुझेको छु ,यो भ्रम छर्नबाट भाडाका माल अलि परै बसेको राम्रो ।