Updated…. वाशिङ्टन डीसी, नोभेम्बर ३, २०२६। अमेरिकामा राष्ट्रपति डोनाल्ड ट्रम्पको दोस्रो कार्यकालको आगामी दुई वर्षको राजनीतिक दिशा निर्धारण गर्ने महत्त्वपूर्ण मध्यावधि निर्वाचनअन्तर्गत आज मंगलबार देशभर मतदान भइरहेको छ। अमेरिकी संसद्को नियन्त्रणका लागि सत्तारूढ रिपब्लिकन र विपक्षी डेमोक्र्याटिक पार्टीबीच तीव्र प्रतिस्पर्धा छ।

यस निर्वाचनमा अमेरिकी प्रतिनिधिसभाका सबै ४३५ स्थान, सिनेटका ३५ स्थान र ३६ राज्यका गभर्नर पदका लागि मतदान भइरहेको छ। विभिन्न राज्यमा स्थानीय सरकार, राज्य विधायिका तथा जनमतसङ्ग्रहका विषयमा पनि मतदान हुँदै छ। पछिल्लो विवरणअनुसार ५ करोड ९० लाखभन्दा बढी अमेरिकीले अग्रिम मतदान गरिसकेका छन्।

अमेरिकी पूर्वी समयअनुसार मंगलबार दिउँसोसम्म अधिकांश स्थानमा मतदान सामान्य रूपमा भइरहेको छ। यद्यपि न्यूयोर्क र जर्जियाका केही मतदान केन्द्रमा मेसिनसम्बन्धी समस्या देखिएका छन् भने फ्लोरिडाका केही क्षेत्रमा वर्षा र बाढीले मतदान व्यवस्थापन प्रभावित पारेको छ। निर्वाचन सुरक्षाका लागि अमेरिकी न्याय मन्त्रालयले देशभर करिब एक हजार संघीय पर्यवेक्षक तथा निगरानी कर्मचारी परिचालन गरेको छ।

हाल अमेरिकी संसद्का दुवै सदन रिपब्लिकनको नियन्त्रणमा छन्। डेमोक्र्याटिक पार्टीले प्रतिनिधिसभामा कम्तीमा तीन र सिनेटमा चार स्थानको खुद वृद्धि गरे बहुमत प्राप्त गर्न सक्ने अवस्था छ। विशेषगरी जर्जिया, मिशिगन, मेन, नर्थ क्यारोलाइना, ओहायो र टेक्ससलगायतका राज्यका प्रतिस्पर्धाले सिनेटको शक्ति सन्तुलन निर्धारण गर्न महत्त्वपूर्ण भूमिका खेल्न सक्छन्।

यसपटक महँगी, जीवनयापनको बढ्दो खर्च, अर्थतन्त्र, आप्रवासन, स्वास्थ्य सेवा, इरान युद्ध र राष्ट्रपति ट्रम्पका नीतिहरू प्रमुख चुनावी मुद्दा बनेका छन्। रिपब्लिकनहरूले कर कटौती, सीमा सुरक्षा र आर्थिक नीतिलाई जोड दिएका छन् भने डेमोक्र्याटहरूले महँगी, स्वास्थ्य सेवा र प्रशासनका निर्णयहरूमाथि प्रश्न उठाएका छन्। ट्रम्प स्वयं रिपब्लिकन उम्मेदवारहरूको पक्षमा सक्रिय चुनावी अभियानमा सहभागी भएका छन्।

संघीय निर्वाचन आयोगका तथ्याङ्कमा आधारित विश्लेषणअनुसार यसपटक चुनावी अभियान तथा सम्बन्धित राजनीतिक गतिविधिमा ११ अर्ब ९० करोड डलरभन्दा बढी खर्च भएको छ। यसले निर्वाचनलाई अमेरिकी इतिहासकै महँगा मध्यावधि निर्वाचनमध्ये एक बनाएको छ।

अमेरिकी पूर्वी समयअनुसार आज साँझ ७ बजेदेखि विभिन्न राज्यमा मतदान केन्द्र बन्द हुन थाल्नेछन्। त्यसपछि मतगणना र प्रारम्भिक परिणाम सार्वजनिक हुनेछन्। तर अत्यन्त प्रतिस्पर्धात्मक राज्यहरूमा अन्तिम परिणाम आउन केही दिन लाग्न सक्छ।

यो निर्वाचनको परिणामले राष्ट्रपति ट्रम्पका आगामी नीति, बजेट, कर, आप्रवासन, सरकारी नियुक्ति तथा विदेश नीतिमा अमेरिकी संसद्को भूमिकालाई प्रभावित पार्न सक्छ। त्यसको प्रभाव नेपालसहित विश्वका अन्य मुलुकसँग अमेरिकाको सम्बन्धमा समेत पर्न सक्नेछ।

अहिलेसम्म कुनै पनि पार्टीको अन्तिम विजय सुनिश्चित भएको छैन। आज रातिदेखि आउने मतगणनाका परिणामले अमेरिकी संसद्को आगामी शक्ति सन्तुलन र राष्ट्रपति ट्रम्पको बाँकी कार्यकालको राजनीतिक दिशा क्रमशः स्पष्ट पार्नेछन्।