बुझ्ने लाई यत्ति नै काफी छ !
लडेर, भिडेर होइन, मिलेर, विगतका असफलताहरूबाट पाठ सिकेर, देश र जनतालाई केन्द्रमा राखेर नयाँ समझदारीमा जानु आजको आवश्यकता हो ! कसैले कसैलाई बाइ पास गरेर, लोकतन्त्रका नाममा लुटतन्त्र र गणतन्त्रका नाममा गलगाँड तन्त्र चलाएर, सङ्घीयता र धर्म निरपेक्षता नाममा कम्बल ओढेर घिउ खाएर, अरू लाई दोष लाएर मात्र हुन्न ।
न त अब निरङ्कुश कुनै वाद वा तन्त्र एक्लै चल्न सक्छ न त अहिलेको जस्तो लुटतन्त्र । २०४६ यताका सबै प्रयोगहरूको निर्मम समीक्षा गरेर, गल्ती कमजोरीहरू भएकोमा सबैले आत्मालोचना गरेर, देश र जनता सँग गल्तीका लागि क्षमा याचना गर्दै नयाँ समझदारी, नयाँ मोडेलमा नजाने हो भने हामीलाई भीरबाट लड्दै गर्दा बँचाउने कोही हुने छैनन्, उत्तर दक्षिण मात्र होइन पूर्व पश्चिम कोही रुने पनि छैनन् ।
मेरै गोरुको बाह्रै टक्का नगर । हामी ठुलो जन विस्फोटको निकट छौँ मनन गर । नत्र ठुलो क्षति बेहोर्न तयार होऊँ । सत्य तितो हुन्छ है ! आगे तपाईँहरूकै जो मर्जी ।
यसो भन्दै गर्दा केहीले तिमीहरू विदेशमा बस्नेहरूलाई नेपालको कुरा गर्ने के अधिकार समेत भन्न भ्याउनुहुन्छ हामीलाई थाहा छ, देश के हो ? माटो के हो ? यसको महत्त्व कस्तो हुन्छ ? देशमा बस्दा भन्दा विदेशमा बस्दा अझ बढी बुझ्न पाइँदो रहेछ नपत्याए विदेशमा बस्ने म मात्र होइन म जस्ता लाखौँ लाख लाई सोध्नुस् ।