काठमाडौं । नेपाली चलचित्र उद्योगमा पछिल्ला वर्षहरूमा मौलिक संस्कृति, परम्परा र सामाजिक जीवनशैलीलाई केन्द्रमा राखेर चलचित्र निर्माण गर्ने क्रम बढिरहेका बेला अभिनेत्री, निर्माता तथा निर्देशक नीता ढुंगाना निर्देशित बहुप्रतीक्षित चलचित्र ‘पार्वती’ ले पनि नेपालीपनलाई मुख्य आधार बनाएको संकेत दिएको छ। आगामी भदौ १२ गते देशभर प्रदर्शनको तयारीमा रहेको चलचित्रको नयाँ रत्यौली गीत ‘नौतुना रेलैमा’ सार्वजनिक गरिएको छ।

ओएसआर डिजिटलको आधिकारिक युट्युब च्यानलमार्फत सार्वजनिक गरिएको गीतले नेपाली हिन्दू विवाह संस्कृतिको अभिन्न हिस्सा मानिने रत्यौली परम्परालाई जीवन्त रूपमा प्रस्तुत गरेको छ। विवाह सम्पन्न भएपछि महिलाहरूले हाँसो, ठट्टा, नाचगान र सांस्कृतिक प्रस्तुति गर्दै मनाउने रत्यौली नेपाली समाजको मौलिक सांस्कृतिक सम्पदा मानिन्छ। चलचित्रको यस गीतले त्यही सांस्कृतिक सौन्दर्य, पारिवारिक आत्मीयता र नेपालीपनलाई आधुनिक चलचित्रीय प्रस्तुतिसँग जोड्ने प्रयास गरेको देखिन्छ।

गीतको भिडियोमा निर्देशक तथा मुख्य अभिनेत्री नीता ढुंगाना स्वयं परम्परागत नेपाली महिलाको पहिरनमा देखिएकी छन्। उनीसँगै नेपाली चलचित्रकी चर्चित कलाकार दीपाश्री निरौला, अञ्जली अधिकारी, सिरु विष्ट, वसुन्धरा भुसाल, आशा पौडेल, अशोक दर्जी तथा क्रिमसन श्रेष्ठले रत्यौलीको रमाइलो वातावरण सिर्जना गरेका छन्।

यस गीतको विशेष आकर्षण भने दीपाश्री निरौला बनेकी छन्। उनी पुरुषको भेषभूषामा प्रस्तुत हुँदै नेपाली रत्यौलीमा देखिने परम्परागत हास्य शैलीलाई जीवन्त बनाएकी छन्। नेपाली चलचित्रमा अभिनय, निर्देशन, निर्माण तथा हास्य प्रस्तुतिका माध्यमबाट आफ्नो छुट्टै पहिचान बनाएकी दीपाश्रीले यस गीतमा पनि आफ्नो बहुआयामिक प्रतिभा प्रदर्शन गरेकी छन्।

दीपाश्री निरौला नेपाली चलचित्र उद्योगकी सबैभन्दा सफल महिला निर्देशकमध्ये एक मानिन्छिन्। उनले निर्देशन गरेको ‘छक्का पञ्जा’ शृङ्खलाले नेपाली बक्स अफिसमा लगातार नयाँ कीर्तिमान कायम गरेको छ। कलाकार, निर्देशक, निर्माता र हास्य प्रस्तोताका रूपमा तीन दशकभन्दा लामो योगदान दिएकी दीपाश्री नेपाली चलचित्र, संगीत तथा मनोरञ्जन क्षेत्रकी प्रेरणादायी व्यक्तित्वका रूपमा परिचित छिन्। उनका कारण कुनै पनि चलचित्र वा सांगीतिक प्रस्तुतिप्रति दर्शकको चासो स्वतः बढ्ने गरेको उद्योगका जानकारहरू बताउँछन्।

गीतमा लोकप्रिय गायिका रचना रिमाल, सरु गौतम र सहिमा श्रेष्ठ को स्वर रहेको छ। नेपाली गीत–संगीतमा पछिल्लो समय अत्यधिक लोकप्रिय गीतकार हर्क साउद ले शब्द सिर्जना गरेका हुन् भने चर्चित संगीतकार दीपक शर्मा ले संगीत भरेका छन्। संगीत संयोजन, मिक्सिङ तथा मास्टरिङ नरेन्द्र वियोगी ले गरेका छन्।

गीतको शब्द, भाका र रत्यौलीको मौलिक शैलीलाई ध्यानमा राख्दै वरिष्ठ कोरियोग्राफर रामजी लामिछाने ले नृत्य निर्देशन गरेका छन्। परम्परागत नेपाली विवाह संस्कृतिमा आधारित नृत्य, पहिरन र प्रस्तुतीकरणले गीतलाई अझ आकर्षक बनाएको छ।

चलचित्र ‘पार्वती’ को कथा र पटकथा निर्देशक नीता ढुंगाना स्वयंले तयार पारेकी हुन्। चलचित्रको स्क्रिप्ट शिवम् अधिकारी ले लेखेका छन्। चलचित्रमा नीता ढुंगानासँगै दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेललगायत कलाकारहरूको अभिनय रहेको छ।

चलचित्रको छायांकन निर्देशन सुदीप बराल ले गरेका छन् भने सम्पादन साहिल खान ले गरेका हुन्। चलचित्रका निर्माता हरिहर अधिकारी हुन्। प्रदर्शन व्यवस्थापन एफडी कम्पनी, एप्पल इन्टरटेनमेन्ट र रिच इन्टरटेनमेन्ट ले संयुक्त रूपमा गर्ने भएका छन्।

चलचित्र निर्माण टोलीका अनुसार ‘पार्वती’ केवल मनोरञ्जनमा सीमित नभई नेपाली समाज, संस्कार, पारिवारिक सम्बन्ध, महिला पात्रको संघर्ष र सांस्कृतिक पहिचानलाई केन्द्रमा राखेर निर्माण गरिएको चलचित्र हो। सार्वजनिक गरिएको रत्यौली गीतले पनि चलचित्र नेपाली मौलिकताको संरक्षण र प्रवर्द्धन गर्ने उद्देश्यसहित निर्माण गरिएको स्पष्ट संकेत दिएको छ।

पछिल्ला वर्षहरूमा नेपाली चलचित्रमा मौलिक लोकसंस्कृति समेटिएका गीतप्रति दर्शकको आकर्षण बढिरहेको अवस्थामा ‘नौतुना रेलैमा’ ले पनि सामाजिक सञ्जाल र युट्युबमा सकारात्मक प्रतिक्रिया पाइरहेको छ। विवाह संस्कृतिमा आधारित मौलिक रत्यौली, अनुभवी कलाकारहरूको प्रस्तुति, लोकप्रिय स्रष्टाहरूको सहकार्य र दीपाश्री निरौलाको फरक अवतारका कारण यो गीत चलचित्र ‘पार्वती’ को प्रमुख आकर्षणमध्ये एक बन्ने अपेक्षा गरिएको छ।