राष्ट्रपति डोनाल्ड ट्रम्पले शुक्रबार अमेरिकी श्रम विभागअन्तर्गतको रोजगार तथ्याङ्क ब्युरो (BLS) विरुद्ध कडा आक्रोश व्यक्त गर्दै यसको प्रमुखलाई तत्काल बर्खास्त गर्ने घोषणा गरेका छन्। गत जुलाई महिनामा अपेक्षा भन्दा निकै कम रोजगारी सिर्जना भएको र यसअघि दुई महिनाको तथ्याङ्कमा ठूलो गिरावट देखिएको भन्दै ट्रम्पले यस्तो निर्णय गरेका हुन्।

जुलाई महिनामा अमेरिकामा ७४ हजार मात्र रोजगारी सिर्जना भएको BLS ले जनाएको थियो, जुन LSEG का अर्थशास्त्रीहरूले अनुमान गरेको १ लाख १० हजारभन्दा निकै कम हो। यस्तै मे र जुन महिनाको रोजगार वृद्धिको तथ्याङ्क पनि संशोधित गरिएको थियो। मे महिनाको तथ्याङ्क १ लाख २५ हजारले घटाएर केवल १९ हजार रोजगारी सिर्जना भएको उल्लेख गरिएको थियो भने जुन महिनाको रोजगारी वृद्धि पनि १ लाख ३३ हजारले घटाएर केवल १४ हजार मात्र रहेको जानकारी दिइएको थियो।

यसरी ठूलो मात्रामा तथ्याङ्क संशोधन पछिल्लो पटक मार्च २०२१ मा भएको थियो, जब कोभिड महामारीको एक वर्षपछि रोजगार वृद्धिमा १ लाख ४६ हजारको कटौती गरिएको थियो।

ट्रम्पले आफ्नो Truth Social प्ल्याटफर्ममार्फत प्रतिक्रिया दिँदै श्रम तथ्याङ्क प्रमुख डा. एरिका म्याकइन्टरफरले राष्ट्रपति निर्वाचन अगाडि जागिरका तथ्याङ्कमा हेरफेर गरेको आरोप लगाएका छन्। उनले लेखे, “डा. म्याकइन्टरफर बाइडेनद्वारा नियुक्त भएकी हुन्। उनीहरूले मार्च २०२४ मा रोजगारी वृद्धिको तथ्याङ्कलाई करिब ८ लाख १८ हजारले र निर्वाचनअघि अगस्ट र सेप्टेम्बरमा १ लाख १२ हजारले बढाएर गलत रिपोर्ट गरेका थिए। यति ठूलो गल्ती कसैले गर्न सक्दैन।”

उनले अगाडि लेखेका छन्, “हामीलाई सही र निष्पक्ष रोजगार तथ्याङ्क आवश्यक छ। मैले मेरो टिमलाई बाइडेनद्वारा नियुक्त यो व्यक्तिलाई तत्काल हटाउन निर्देशन दिएको छु। उनको ठाउँमा अधिक योग्य र सक्षम व्यक्तिलाई नियुक्त गरिनेछ।”

ट्रम्पले केन्द्रीय बैंक (फेड) माथि पनि राजनीतिक खेल खेलेको आरोप लगाउँदै ब्याजदरको हेरफेर निर्वाचनको समयमा गरिएको बताएका छन्। उनले फेड अध्यक्ष जेरोम पावेललाई पनि पदबाट हटाउनुपर्ने धारणा राखेका छन्।

विडम्बनाको कुरा, डा. म्याकइन्टरफर जनवरी २०२४ मा सिनेटबाट ८६-८ मतले अनुमोदित भएकी थिइन्, जसमा तत्कालीन सिनेटर तथा हालका उपराष्ट्रपति जेडी भान्सले पनि उनको पक्षमा मत दिएका थिए।

यो रिपोर्ट अनुसार जुलाईमा लामो समयदेखि (२७ हप्ताभन्दा बढी) बेरोजगार मानिसको सङ्ख्या १ लाख ७९ हजारले बढेर १८ लाख पुगेको छ, जुन कुल बेरोजगारको २४.९% हो। श्रम सहभागिता दर पनि गत वर्षभन्दा ०.५ प्रतिशतले घटेर ६२.२% मा पुगेको छ।