भोजपुर । ‘मुन्दुम ट्रेल भ्रमण वर्ष २०२५’ प्रवर्द्धन गर्ने उद्देश्यका साथ भोजपुर र खोटाङको सिमाना चखेवा भञ्ज्याङमा माघ एक गतेबाट सुरु भएको बृहत् सांस्कृतिक तथा पर्यटन कृषि मेलाको अवसरमा शुक्रवार खुला आर्चरी (धनुवाण) प्रतियोगिता आयोजना गरिएको छ ।

प्रतियोगिताको धनुवाणबाट टेम्केमैयुङ गाउँपालिकाका ज्येष्ठ नागरिक एक सय दुई वर्षका जमदार इन्द्रबहादुर राईले उद्घाटन गर्नुभयो । आर्चरीलाई युद्धकला र कौशलतासँग जोडिएको राष्ट्रिय प्रशिक्षक पाविहाङ राईले बताउनुभयो ।

प्रतियोगितामा पुरुष तथा महिला प्रतियोगीहरूको सहभागिता रहेको थियो । महिला प्रतियोगी तर्फ युनुहाङ राई प्रथम, पार्वती बिक दोस्रो र गोपीहाङमा राई तेस्रो हुनुभयो । यस्तै पुरुष प्रतियोगी तर्फ मित्लुङ राई पहिलो, कुबेरमान राई दोस्रो र आइकुमार राई तेस्रो हुनुभएको राष्ट्रिय प्रशिक्षक राईले जानकारी दिनुभयो ।

बिहीबार खुला साकेला सिली प्रतियोगिता आयोजना भएको थियो ।

एक लाख पर्यटक भित्राउने लक्ष्यका साथ गाउँपालिकाले ‘मुन्दुम ट्रेल भ्रमण वर्ष २०२५’ घोषणा गरी माघ एक देखि पाँच गतेसम्म विविध कार्यक्रम तय गरिएको छ । पर्यटन प्रवर्द्धनका साथै कृषि उत्पादनलाई विशेष जोड दिँदै बृहत् मेलाको आयोजना गरिएको छ ।

मेलाको उद्घाटन संस्कृति, पर्यटन तथा नागरिक उड्डयन मन्त्री बद्री पाण्डेले गर्नुभएको थियो । सोसँगै ‘मुन्दुम ट्रेल भ्रमण वर्ष २०२५’ पनि शुभारम्भ भएको छ ।