काठमाडौं । ज्योतिष तथा धर्मशास्त्र क्षेत्रमा लामो समयदेखि सक्रिय पण्डित डा. रुद्रनाथ अधिकारीलाई विश्वम्भरा ज्योतिष विज्ञान परिषद् नेपालले सम्मान गरेको छ। ज्योतिष अध्ययन, अनुसन्धान, धार्मिक–सांस्कृतिक गतिविधि तथा समाजमा पुर्‍याएको योगदानको मूल्याङ्कन गर्दै परिषद्ले उहाँलाई सम्मान गर्नुका साथै आजीवन संरक्षकको जिम्मेवारीसमेत प्रदान गरेको हो।

परिषद्को साधारणसभा तथा सम्मान कार्यक्रममा डा. अधिकारीले ज्योतिष क्षेत्रमा पुर्‍याएको योगदान, अध्ययनशीलता, अनुसन्धानमूलक कार्य र सामाजिक सक्रियताको प्रशंसा गरिएको थियो। आयोजक संस्थाका अनुसार ज्योतिष तथा धर्मशास्त्रका क्षेत्रमा उहाँले निरन्तर रूपमा गर्दै आएको कामले यस विधाको संरक्षण र प्रवर्द्धनमा महत्वपूर्ण योगदान पुगेको छ।

कार्यक्रममा डा. अधिकारीले केही समयअघि भदौ महिनाको सुरुआतसँगै देशमा ठूलो विपत्ति आउन सक्ने र त्यसबाट जनधनको क्षति हुन सक्ने भविष्यवाणी सार्वजनिक गरेको विषयसमेत चर्चा गरिएको थियो। उक्त भविष्यवाणी विभिन्न सञ्चारमाध्यममार्फत सार्वजनिक भएको उल्लेख गर्दै कार्यक्रममा सहभागी वक्ताहरूले भदौ १० मा आएको विनाशकारी बाढीपछि त्यसलाई पुनः स्मरण गरेका थिए। यद्यपि भविष्यवाणीको वैज्ञानिक सत्यता स्वतन्त्र रूपमा प्रमाणित गर्ने विषय अलग रहने भए पनि परिषद्ले यसलाई उहाँको ज्योतिषीय अध्ययनसँग जोडेर प्रस्तुत गरेको थियो।

परिषद्ले ज्योतिष, धर्मशास्त्र, वेद, उपनिषद्, पुराण तथा सनातन धर्म–संस्कृतिप्रतिको उहाँको गहन अध्ययन, अनुसन्धानशीलता, कर्मक्षमता तथा समाज र राष्ट्रप्रतिको योगदानको उच्च मूल्याङ्कन गर्दै आजीवन संरक्षकमा नियुक्त गरेको जनाएको छ।

लेखक तथा गीतकारसमेत रहनुभएका डा. अधिकारीलाई सम्मान गर्न पाएकोमा परिषद्ले खुशी व्यक्त गरेको छ। कार्यक्रममा वाल्मीकि विद्यापीठका प्रमुख तथा प्राचार्य प्रा. डा. अच्युतप्रसाद लामिछाने, नेपाल पञ्चाङ्ग निर्णायक समितिसँग सम्बन्धित पुरुषोत्तम भट्ट राई, धर्मशास्त्रका विद्वान् प्रा. डा. देवमणि भट्ट राई, ज्योतिषी दिननाथ पण्डितलगायत विभिन्न क्षेत्रका विद्वान्, प्राध्यापक तथा ज्योतिषविद्हरूले डा. अधिकारीको योगदानको प्रशंसा गरेका थिए।

सोही अवसरमा डा. अधिकारीकी धर्मपत्नी लक्ष्मी ढकाल अधिकारीलाई पनि सम्मान गरिएको थियो। डा. अधिकारीको ज्योतिषीय तथा सामाजिक यात्रामा उहाँको महत्वपूर्ण साथ र योगदान रहेको उल्लेख गर्दै परिषद्ले लक्ष्मी ढकाल अधिकारीलाई उपाध्यक्षमा चयन गरेको जनाएको छ।

कार्यक्रममा डा. अधिकारीद्वारा रचित भक्तिमय भजन ‘हे रामजी’ को एल्बमसमेत सार्वजनिक गरिएको थियो। धार्मिक तथा सांस्कृतिक भावनामा आधारित उक्त सिर्जनालाई कार्यक्रममा सहभागी अतिथिहरूले शुभकामना दिएका थिए।

समारोहमा इतिहासमा ज्योतिषीय भविष्यवाणीका रूपमा उल्लेख गरिँदै आएको ज्योतिष कुलानन्द ढकालसँग सम्बन्धित एक प्रसंगसमेत प्रस्तुत गरिएको थियो। वक्ताहरूले विक्रम संवत् १८२६ कात्तिक २९ गते भक्तपुरमा आक्रमण हुने भविष्यवाणी गरिएको र त्यसपछि भएको युद्धसँग त्यसलाई जोडेर स्मरण गरेका थिए। त्यसक्रममा ज्योतिष विद्याको ऐतिहासिक र सांस्कृतिक महत्वबारे चर्चा गर्दै केही व्यक्तिका गलत अभ्यास र व्यावसायिक स्वार्थका कारण समग्र ज्योतिष समुदायको विश्वसनीयतामाथि प्रश्न उठ्ने गरेकोमा चिन्तासमेत व्यक्त गरिएको थियो।

ज्योतिष, धर्मशास्त्र, वेद, उपनिषद्, पुराण तथा सनातन धर्म–संस्कृतिका क्षेत्रमा क्रियाशील विद्वान्, अनुसन्धानकर्ता, पण्डित र विभिन्न क्षेत्रका विशिष्ट व्यक्तित्वहरूको सहभागितामा सम्पन्न कार्यक्रममा परम्परागत ज्ञान, धर्म, संस्कृति र ज्योतिष विद्याको संरक्षण तथा संवर्द्धन गर्दै यसको प्रयोग जनहितमुखी, उत्तरदायी र मर्यादित बनाउने विषयमा समेत जोड दिइएको थियो।