जापानमा आयोजना हुने २०औँ एसियाली खेलकुदमा नेपालको प्रतिनिधित्व गर्ने खेलाडी तथा अफिसियललाई शिक्षा तथा खेलकुद मन्त्रालयले औपचारिक रूपमा बिदाइ गरेको छ।

सेप्टेम्बर १९ देखि जापानको आइची–नागोयामा सुरु हुने प्रतियोगितामा सहभागी हुन लागेको नेपाली टोलीलाई बिहीबार आयोजित विशेष कार्यक्रममा खेलकुदमन्त्री सस्मित पोखरेलसहित राष्ट्रिय खेलकुद परिषद्का पदाधिकारीहरूले शुभकामना दिँदै बिदाइ गरेका हुन्।

कार्यक्रमलाई सम्बोधन गर्दै मन्त्री पोखरेलले सीमित स्रोत र पूर्वाधारका बाबजुद नेपाली खेलाडीहरूले गरेको तयारी र मेहनत प्रशंसनीय रहेको बताए। सरकारले उपलब्ध स्रोतसाधनको अधिकतम उपयोग गर्दै खेलाडीको तयारीमा सहयोग गरेको उल्लेख गर्दै उनले एसियाली खेलकुदबाट नेपालले सकारात्मक नतिजा हासिल गर्ने विश्वास व्यक्त गरे।

“उपलब्ध साधन र अवसरको उपयोग गरेर खेलाडीहरूले जुन मेहनत गर्नुभएको छ, त्यो प्रशंसनीय छ,” उनले भने, “तपाईंहरूको प्रदर्शनले देशको प्रतिष्ठा अझ माथि उठाउनेछ र नेपालले पदक प्राप्त गर्नेछ भन्ने विश्वास सरकारलाई छ।”

मन्त्री पोखरेलले अन्तर्राष्ट्रिय प्रतियोगितामा सहभागी हुन जाने खेलाडीको सम्मान र मनोबल अभिवृद्धिका लागि जापान प्रस्थानका क्रममा भीभीआईपी कक्षमार्फत बिदाइ गर्ने व्यवस्था मिलाइने पनि जानकारी दिए।

नेपाली टोलीका तर्फबाट बोल्दै ओलम्पियन तथा उसु खेलाडी विजय सिञ्जालीले खेलाडीहरू उच्च मनोबलका साथ प्रतियोगितामा उत्रिन तयार रहेको बताए। तयारी अपेक्षाअनुसार पर्याप्त हुन नसकेको स्वीकार गर्दै पनि उनले मैदानमा कुनै कसर बाँकी नराख्ने प्रतिबद्धता जनाए।

“परिस्थिति जस्तोसुकै भए पनि हामी आफ्नो शतप्रतिशत क्षमता प्रयोग गर्नेछौँ,” उनले भने, “नेपाल र नेपालीको पहिचानलाई आत्मविश्वासका साथ प्रस्तुत गर्दै प्रतिस्पर्धा गर्नेछौँ। हाम्रो लक्ष्य पदक जित्नु नै हो।”

एथ्लेटिक्सतर्फ प्रतिस्पर्धा गर्न लागेकी ओलम्पियन सन्तोषी श्रेष्ठले पनि नतिजाभन्दा खेलाडीको पूर्ण प्रयास महत्वपूर्ण हुने बताइन्। ठूलो अन्तर्राष्ट्रिय प्रतियोगितामा दबाब स्वाभाविक हुने भन्दै उनले खेलाडीहरूलाई मानसिक रूपमा दृढ भएर आफ्नो उत्कृष्ट प्रदर्शन दिन आग्रह गरिन्।

“पदक वा नतिजा हाम्रो नियन्त्रणमा सधैँ नहुन सक्छ, तर आफ्नो मेहनत र प्रदर्शन भने हाम्रो हातमा हुन्छ,” श्रेष्ठले भनिन्, “त्यसैले प्रत्येक खेलाडीले अन्तिम क्षणसम्म शतप्रतिशत दिएर खेल्नुपर्छ।”

यसपटक नेपालबाट १३५ खेलाडीले विभिन्न खेल विधामा प्रतिस्पर्धा गर्नेछन्। टोलीमा २९ प्रशिक्षक, १७ व्यवस्थापक तथा दुई खेल प्राविधिकसहित कुल १८४ जनाको सहभागिता रहनेछ।

२०औँ एसियाली खेलकुद सेप्टेम्बर १९ देखि अक्टोबर ४ सम्म जापानको आइची र नागोया क्षेत्रमा सञ्चालन हुनेछ।

खेलाडी बिदाइ कार्यक्रममा खेलकुदमन्त्री पोखरेलसँगै राष्ट्रिय खेलकुद परिषद्का सदस्यसचिव रामचरित्र मेहता, उपाध्यक्ष विशाल श्रेष्ठ, राखेपका बोर्ड सदस्य तथा खेल क्षेत्रसँग सम्बन्धित विभिन्न व्यक्तिहरूको उपस्थिति रहेको थियो।

एसियाली खेलकुदजस्तो ठूलो बहुराष्ट्रिय प्रतियोगितामा सहभागी हुन लागेको नेपाली टोलीका लागि यसपटक पनि मुख्य चुनौती सीमित तयारी, स्रोत र अन्तर्राष्ट्रियस्तरको प्रतिस्पर्धात्मक अनुभव रहनेछ। यद्यपि खेलाडीहरूले उच्च मनोबल र पदक लक्ष्यसहित जापानको यात्रा गर्न लागेको बताएका छन्।