अन्तर्राष्ट्रिय पत्रकार महासङ्घ अमेरिका शाखा साउदी अरेबियाले चर्चित नेपाली गायिका रचना रिमाललाई सम्मान गरेको छ। साउदी अरेबियामा आयोजित विशेष सांस्कृतिक कार्यक्रममा नेपाली कला, सङ्गीत र संस्कृतिको प्रवर्द्धनमा पुर्‍याएको योगदानको कदर गर्दै रिमाललाई सम्मान गरिएको हो।
प्रवासमा रहेर नेपाली भाषा, कला, संस्कृति र सङ्गीतलाई माया तथा संरक्षण गर्दै आएका नेपाली समुदायमाझ लोकप्रिय गायिका रिमाललाई सम्मानपत्रसहित सम्मान गरिएको थियो। कार्यक्रममा महासङ्घका पदाधिकारी, पत्रकार, नेपाली समुदायका अगुवा तथा सर्वसाधारणको उल्लेख्य उपस्थिति थियो।
सम्मान ग्रहण गर्दै गायिका रिमालले प्रवासमा रहेका नेपालीबाट प्राप्त माया, सम्मान र हौसलाले आफूलाई नेपाली सङ्गीत क्षेत्रमा अझ राम्रो काम गर्न प्रेरणा मिलेको बताइन्। उनले विदेशमा बसेर पनि नेपाली कला र संस्कृतिप्रति नेपाली समुदायले देखाएको लगाव प्रशंसनीय रहेको बताउँदै आफूले आगामी दिनमा पनि नेपाली सङ्गीतमार्फत देश र नेपालीपनलाई विश्वभर चिनाउने प्रयास जारी राख्ने बताइन्।
कार्यक्रममा रिमालले आफ्ना लोकप्रिय गीतहरू प्रस्तुत गरेकी थिइन्। उनको प्रस्तुति सुरु भएसँगै कार्यक्रममा उपस्थित दर्शकहरू उत्साहित बनेका थिए। उनले ‘फोटो फिरिममा’, ‘मिनरल वाटर’, ‘चुरा त बज्यो’, ‘नाच फिरिरी’, ‘तिम्रो मायाले बाँधेर राख्यो’ लगायतका लोकप्रिय गीत प्रस्तुत गर्दै दर्शकलाई मनोरञ्जन प्रदान गरिन्। उनका गीतमा दर्शकले ताली, हुटिङ र नाचगानमार्फत साथ दिएका थिए।
सानै उमेरदेखि नेपाली सङ्गीत क्षेत्रमा सक्रिय रिमाल पछिल्लो समय नेपाली युवापुस्तामाझ निकै लोकप्रिय गायिकाका रूपमा स्थापित भएकी छन्। उनको स्वरमा रहेका विभिन्न गीतले नेपाली सङ्गीतप्रेमीको मन जित्दै आएका छन्। देशभित्र मात्र नभई विदेशमा रहेका नेपालीमाझ पनि उनको लोकप्रियता उत्तिकै देखिएको छ।
महासङ्घका अध्यक्ष बिष्णु घिमिरेले नेपाली पत्रकारिता र सञ्चार क्षेत्रसँगै नेपाली कला, साहित्य, सङ्गीत तथा सामाजिक क्षेत्रमा योगदान पुर्‍याउने व्यक्तित्वको सम्मान गर्दै आएको जनाएको छ। साथै नेपाली कलाकारहरूलाई प्रवासमा सम्मान गर्नुले उनीहरूको सिर्जनात्मक यात्रालाई थप ऊर्जा प्रदान गर्नुका साथै नेपाली कला र संस्कृतिको अन्तर्राष्ट्रिय प्रवर्द्धनमा समेत सहयोग पुग्ने महासङ्घको विश्वास रहेको बताए । गायिका रचना लाई आयोजक झापाली समाज साउदी अरेबिया सहित अन्य स्सथाहरूले समेत मायाको चिनोले सम्मान गरेको थिए ।

कार्यक्रममा सहभागी नेपाली समुदायका अगुवा तथा सञ्चारकर्मीहरूले रिमालको सांगीतिक योगदानको प्रशंसा गर्दै उनको आगामी सांगीतिक यात्राको सफलताको शुभकामना दिएका थिए। प्रवासमा आयोजित सांस्कृतिक कार्यक्रममार्फत नेपाली कलाकार र समुदायबीचको सम्बन्ध थप बलियो बन्दै गएको उनीहरूको भनाइ थियो।साउदी अरेबियामा नेपाली समुदायको ठूलो उपस्थिति रहेको अवस्थामा नेपाली कलाकारको आगमन र सांस्कृतिक कार्यक्रमले प्रवासी नेपालीमा उत्साह थप्ने गरेको छ। रिमालको सम्मान तथा सांगीतिक प्रस्तुतिले पनि साउदीमा रहेका नेपालीलाई नेपाली कला, सङ्गीत र संस्कृतिसँग अझ नजिकबाट जोड्ने काम गरेको आयोजकको भनाइ छ।