बुटवल, तिलोत्तमा / नेपाली साहित्यका कवि, लेखक, पूर्व शिक्षक तथा साहित्यिक व्यक्तित्व नारद गौतमद्वारा लिखित कविता सङ्ग्रह ‘शब्दका छर्रा’ को लोकार्पण कार्यक्रम भव्य रूपमा सम्पन्न भएको छ। गुल्मी जिल्लाबाट उदाएका गौतम हजारौँ विद्यार्थीका प्रेरणाका स्रोत मात्र होइन, नेपाली कविता गीत, साहित्यमा दीर्घकालीन योगदान पुर्‍याउने सर्जकका रूपमा परिचित छन्। दर्जनौँ कृति, हजारौँ कविता तथा गीत लेखनमार्फत् उनले नेपाली भाषाको संवर्द्धनमा उल्लेखनीय भूमिका निर्वाह गरेका छन्।

लोकार्पण कार्यक्रम लुम्बिनी वाङ्मय प्रतिष्ठानको आयोजनामा श्री जनजागृति माध्यमिक विद्यालय, योगीकुटीमा सम्पन्न भयो। कार्यक्रमको आरम्भमा प्रतिष्ठानका अध्यक्ष पुरुषोत्तम पाण्डेयले स्वागत मन्तव्य व्यक्त गर्दै कृतिकारलाई बधाई ज्ञापन गर्नुका साथै कृतिको सफलताको कामना गर्नुभयो। साथै, प्रतिष्ठानले सञ्चालन गर्दै आएका साहित्यिक गतिविधि र भावी योजनाबारे पनि जानकारी गराउनुभयो।

कृति समीक्षाका क्रममा प्रा. डा. हिरण्यलाल ज्ञवालीले ‘शब्दका छर्रा’ नेपाली भाषामा प्रयोगबिहीन हुँदै गएका शब्दहरूलाई सूक्ष्म अध्ययनका साथ उजागर गर्ने महत्वपूर्ण कृति भएको उल्लेख गर्नुभयो। उहाँले कविता काव्यका क्षेत्रमा यो कृति पठनीय, संग्रहणीय र अनुसन्धेय रहेको धारणा व्यक्त गर्नुभयो।

कार्यक्रमका प्रमुख अतिथि साहित्यकार रुद्र ज्ञवालीले नारद गौतम संस्कृतका ज्ञाता मात्र नभई प्रचलनबाट हराउँदै गएका नेपाली शब्दका गहिरा अनुसन्धाता रहेको उल्लेख गर्दै, नेपाली भाषा र साहित्यको श्रीवृद्धिमा उहाँले पुर्‍याएको योगदानको खुलेर प्रशंसा गर्नुभयो।

कार्यक्रममा प्रतिष्ठानका केन्द्रीय अध्यक्ष ऋषि आजाद, साहित्यकार विजय हितान, मदनलाल पौडेल, रमेश समर्थन, लक्ष्मण ज्ञवाली, तिलक लामिछाने, दुर्गा थापा मगर, डा. लक्ष्मी पोखरेल ‘कोकिला’ लगायतले शुभकामना मन्तव्यसहित आफ्ना रचनाहरू वाचन गर्नुभयो।

गंगा पुरीले कृतिकारको साहित्यिक यात्रा, योगदान र पहिचानबारे संक्षिप्त तर प्रभावकारी परिचय प्रस्तुत गर्नुभयो।

श्री जनजागृति माध्यमिक विद्यालयका प्रधानाध्यापक टंकप्रसाद पौडेल, लेखककी धर्मपत्नी मधुरा गौतमलगायत विशिष्ट अतिथिहरूको उपस्थितिमा सम्पन्न कार्यक्रममा स्वयं साहित्यकार नारद गौतमले आफ्नो साहित्यिक लेखनको प्रारम्भिक यात्रा, रचनागर्भ तथा सिर्जनाका प्रेरणाबारे भावुक र आत्मीय लेखकीय मन्तव्य व्यक्त गर्नुभयो। कार्यक्रमको संयोजन माधव गौतमले गर्नुभएको थियो भने सञ्चालन प्रतिष्ठानका उपाध्यक्ष कृष्ण गाउँलेले गर्नुभएको थियो।

समग्रमा, ‘शब्दका छर्रा’ को लोकार्पणले नारद गौतमको साहित्यिक साधनालाई थप उजागर गर्नुका साथै नेपाली भाषाका दुर्लभ शब्द र संवेदनालाई पाठकमाझ पुनः जीवित गराउने विश्वास सहभागीहरूले व्यक्त गरेका छन्।