काठमाडौं, भदौ ७ / नेपाली कांग्रेसका नेता डा. मीनेन्द्र रिजालले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ लक्षित गर्दै तीव्र प्रहार गरेका छन्।

शनिबार काठमाडौंमा आयोजित कार्यक्रममा बोल्दै रिजालले प्रचण्डले केही दिनअघि दिएको अभिव्यक्तिलाई प्रश्न गर्दै भने, “नाम लिन जरुरी छैन, तर नेपालमा कुनै दलका नेताले भन्नुहुन्छ– मैले छोडिदिएँ भने सबै गल्र्यामगुर्लुम हुन्छ। आखिर त्यस्तो के हो जसले पृथ्वी नै बोकेको जस्तो देखिन्छ ?”

केही दिनअघि प्रचण्डले आफू राजनीतिबाट बाहिरिएपछि “सबै गर्ल्यामगुर्लुम ढल्ने हो कि” भन्ने अनुभूति हुने बताएपछि कांग्रेस नेता रिजालले ती टिप्पणीलाई कटाक्ष गरेका हुन्।

उनले थपे, “राजनीति छोड्नै नसक्ने, एकछिन पनि पदमा नबस्दा देशभर गोलमाल हुने अवस्था के हो ? यस्तो मानसिकता राजतन्त्रमा त हुन्थ्यो, तर लोकतन्त्रमा होइन। राजनीतिक दलमा पुस्तान्तरण नहुने भन्ने कुरा कहाँको तर्क हो ? राजनीतिमा जो सक्छ, उसले नेतृत्व लिन सक्ने हो।”

रिजालले आफ्नै दललाई पनि संकेत गर्दै भने, “कांग्रेसमा पनि धुलो, तुवाँलो लागेको छ, त्यो पुछ्ने मात्रै काम भयो भने कांग्रेस फेरि कांग्रेस जस्तो देखिन्छ।”

शेषनागले कहीँ पनि पृथ्वी बोकेको छैन, न त बोकेको हुन सक्छ। शेषनाग हल्लिँदा भूकम्प आउँछ भन्ने त दन्त्यकथा हो।

यसै बीच नेकपा (माओवादी केन्द्र)का उपमहासचिव जनार्दन शर्माले पार्टी अध्यक्ष पुष्पकमल दाहाल ‘प्रचण्ड’लाई लक्षित गर्दै “शेषनागले पृथ्वी बोकेको कुरा अब दन्त्यकथा मात्र भएको” टिप्पणी गरेका छन्।

शनिबार काठमाडौंमा आयोजित एक कार्यक्रममा उनले प्रचण्डको पछिल्लो अभिव्यक्तिलाई आलोचना गर्दै भने, “शेषनागले कहीँ पनि पृथ्वी बोकेको छैन, न त बोकेको हुन सक्छ। शेषनाग हल्लिँदा भूकम्प आउँछ भन्ने त दन्त्यकथा हो। आज विज्ञानले पृथ्वी किन हल्लिन्छ भन्ने प्रमाणित गरिसकेको छ।”

उनले थपे, “पृथ्वी कसैले छोड्यो भनेर नढल्छ। यो पृथ्वी चल्छ, तर केही गर्ल्यामगुर्लुम हुने होइन।”

शर्माले प्रचण्डले केही दिनअघि व्यक्त गरेको “आफूले राजनीति छोडे सब गर्ल्यामगुर्लुम हुन्छ” भन्ने भनाइलाई प्रत्यक्ष जवाफ दिँदै, कुनै व्यक्ति वा पदसँग पृथ्वीको स्थायित्व नजोडिएको स्पष्ट गरेका हुन्।

जनार्दन शर्माको आत्मग्लानि : “कानुन चोरी हुने संसद्‌मा किन आइएछ जस्तो लाग्छ”

 शर्माले हालको संसदीय अभ्यासप्रति गहिरो असन्तुष्टि व्यक्त गरेका छन्। शनिबार राजधानीमा आयोजित कार्यक्रममा बोल्दै उनले “कानुन चोरी हुने संसद्‌मा के बेकार आइएछ जस्तो लाग्छ” भन्दै आत्मग्लानि हुने गरेको बताए।

शर्माले आफू अन्तरिमकालदेखि निरन्तर संसद्मा रहे पनि संविधानले दिएको अधिकार र अवसर जनतासम्म पुर्‍याउन नसकिएकोमा दुःख प्रकट गरे। उनले भने, “संविधानमा लेखिएका धाराहरू, पानामा लेखिएका कुरा व्यवहारमा लागू गर्न सकिएन। संविधानको उपभोग बनाउन जनताले पाउने अवस्था सिर्जना गर्न हामी चुक्यौँ।”

उनले आफ्नो प्रश्न अरूलाई होइन, आफैंलाई भएको उल्लेख गर्दै, “मैले किन संविधानको कार्यान्वयन भएन भनेर आफैँलाई प्रश्न गर्छु, तर मेरो प्रश्नले अरू तर्सन्छन्। गाह्रो त्यसै कारण हुन्छ, किनभने त्यही ठाउँमा त हामी नै छौँ,” भने।

शर्माले पछिल्लो समय संसद्‌प्रति मोहभंग भएको खुलाउँदै भने, “आजभोलि लाग्छ– कानुन नै चोरी हुने संसद्मा किन आइएछ ? अलि दिक्क लाग्छ, सायद अलि पुरानो भएर पनि होला।”

उनको भनाइले संसद्मा भएका विवादास्पद विधेयक, प्रक्रियागत त्रुटि र नीतिगत असफलताप्रति प्रत्यक्ष आलोचना गरेको प्रस्ट भएको छ।