Updated … काठमाडौं प्रहरीले गुन्डागर्दीका आरोपमा पक्राउ परेका मिलन गुरुङ उर्फ ‘चक्रे मिलन’लाई ज्यान मार्ने उद्योगको मुद्दामा अनुसन्धानका लागि भक्तपुर पठाउने तयारी गरेको छ। प्रहरीका अनुसार, २०८१ साल भदौ १० गते मनीष रायमाझीमाथि खुकुरी प्रहार भएको घटनामा चक्रे मिलनको संलग्नता देखिएको छ। घटनासँगको जोड प्रमाणित भएपछि उनलाई आजै भक्तपुर प्रहरीको जिम्मा लगाइने काठमाडौंका एसपी कुलदिप चन्दले जानकारी दिए।

यसअघि अभद्र व्यवहारको आरोपमा पक्राउ परेका चक्रे मिलनलाई काठमाडौं जिल्ला अदालतले ३० हजार रुपैयाँ धरौटीमा रिहा गर्ने आदेश दिएको थियो। तर भक्तपुरमा दर्ता भएको ज्यान मार्ने उद्योगसम्बन्धी मुद्दामा अनुसन्धान अघि बढाउन उनलाई पुनः भक्तपुर पठाइने भएको हो।

काठमाडौं जिल्ला अदालतले बुधबार गुन्डागर्दी र अभद्र व्यवहारको आरोपमा पक्राउ परेका मिलन गुरुङ उर्फ ‘चक्रे मिलन’सहित १९ जनालाई धरौटीमा रिहा गर्ने आदेश दिएको छ। न्यायाधीश खिमानन्द भुसालको इजलासले चक्रे मिलन र राजेश भनिने रोजेश खड्कालाई जनही ३० हजार रुपैयाँ धरौटी तोकेको हो।

अदालतको आदेश अनुसार गणेशबहादुर बोगटी, डिल्लीराज कँडेल र रितिक लामालाई जनही २० हजार रुपैयाँ धरौटीमा छाडिने छ। बाँकी १४ जनालाई भने १०–१० हजार रुपैयाँ धरौटी तोकिएको छ।

अदालतले उनीहरूलाई ‘पटके कसुरदार’ देखिएको र तत्काल निर्दोष ठहर गर्ने अवस्था नभएको भन्दै धरौटीमा छोड्ने निर्णय गरेको हो। उनीहरू केही दिनअघि चक्रे मिलनको जन्मदिन मनाउने क्रममा स्कटिङसहित गाडीमा निस्किएको, र प्रहरीले पक्राउ गर्दा टिमका सदस्यसँग प्रतिबन्धित वस्तु फेला परेको थियो।

धरौटी तोकिएका व्यक्तिहरूको सूची यसप्रकार छः

• जीतबहादुर लामा – रु. १०,०००

• रितिक लामा – रु. २०,०००

• चन्द्र देव कार्की – रु. १०,०००

• प्रकाश गोले – रु. १०,०००

• आमिर आलेमगर – रु. १०,०००

• उत्तम महर्जन – रु. १०,०००

• प्रनिश कँडेल – रु. १०,०००

• राजु परियार – रु. १०,०००

• राजेश (रोजेश) खड्का – रु. ३०,०००

• गणेशबहादुर बोगटी – रु. २०,०००

• रोशन सुवेदी – रु. १०,०००

• सन्दीप के.सी – रु. १०,०००

• राहुल खड्का – रु. १०,०००

• यामु पौडेल – रु. १०,०००

• सौरभ सुनार – रु. १०,०००

• डिल्लीराज कँडेल – रु. २०,०००

• मिलन गुरुङ (चक्रे मिलन) – रु. ३०,०००

• सफल (सुजल) शाही – रु. १०,०००

• निराजन पौडेल – रु. १०,०००

• 

***

काठमाडौंको महाराजगञ्जस्थित होटल साम्बालामा गत १५ साउनमा गरिएको जन्मदिन पार्टी प्रकरणमा गुण्डा नाइके भनेर चिनिने मिलन गुरुङ उर्फ चक्रे मिलनसहित १९ जनाविरुद्ध काठमाडौं जिल्ला अदालतमा मुद्दा दर्ता भएको छ। यो मुद्दा न्यायाधीश खिमानन्द भुसालको इजलासमा पेश भएको हो र हाल उनीहरूको बयान प्रक्रिया भइरहेको छ। प्रहरीका अनुसार उनीहरू पटके कसुरदार श्रेणीमा पर्छन्।

उपत्यका अपराध अनुसन्धान कार्यालय र जिल्ला प्रहरी परिसर, काठमाडौंको संयुक्त अपरेशनमार्फत पक्राउ परेका यी व्यक्तिमध्ये प्रारम्भमा ४७ जनालाई नियन्त्रणमा लिइएको थियो, जसमा २८ जनालाई पछि रिहा गरिएको थियो। मध्यरातसम्म चलेको चक्रेको जन्मदिन पार्टीमा होहल्ला र सार्वजनिक शान्ति भंगको आरोप लगाउँदै प्रहरीले नियन्त्रणमा लिएको हो।

मुख्य आरोपित चक्रे मिलनले भने आफू गुण्डागर्दी होइन, लामो समयदेखि सामाजिक सेवा र राजनीतिक क्रियाकलापमा सक्रिय रहेको दाबी गरेका छन्। उनका अनुसार उनी नेकपा एमालेको गोरखास्तरीय पार्टी सदस्यका रूपमा विभिन्न सामाजिक तथा राजनीतिक कार्यक्रममा संलग्न छन्, र पक्राउ परेका कतिपय व्यक्तिहरू केवल उनका समर्थक वा चिनजानका साथी मात्र हुन्, जो स्वेच्छाले जन्मदिनमा सहभागी हुन आएका थिए।

उनले दिएको बयानअनुसार, श्रावण महिनाभर समर्थकहरूले विभिन्न स्थानमा उनको जन्मदिन मनाउन निम्त्याउने गरेका थिए, र त्यही क्रममा १५ साउनमा महाराजगञ्जस्थित होटल साम्बालामा ग्राउण्ड फ्लोर र रुफटप बुक गरेर सबैलाई निमन्त्रणा दिएका थिए। राती साढे ११ बजे केक काट्ने क्रममा सबै मिलेर नाचगान गर्दै रमाइलो भइरहेको बेला प्रहरी टोली आएको र सामान्य भनाभन भए पनि कुनै अभद्रजन्य गतिविधि नगरेको उनको दाबी छ।

चक्रे मिलनले प्रतिवेदनमा उल्लेखित धारिलो वा जोखिमी हतियार प्रदर्शन, सार्वजनिक आवागमन अवरुद्ध गर्ने, गालीगलौज वा धम्की दिने जस्ता आरोपहरू असत्य भएको बताए। उनले प्रमाणका रूपमा देखाइएका फोटो तथा भिडियोहरू घटनाभन्दा अघिका अन्य समारोहका भएको दाबी गरेका छन्।

उनको भनाइमा, ठूलो संख्यामा युवाहरूलाई भेला पारेर जन्मदिन मनाउने कार्यक्रम आयोजना गर्नु नै गल्ती भएको भए पनि त्यसले प्रतिवेदनमा उल्लिखित आपराधिक गतिविधिको पुष्टि गर्दैन। अब अदालतको फैसलाले यो प्रकरणको कानुनी निष्कर्ष तय गर्नेछ।

तस्बिर : उमेश कार्की / नेपाल प्रेस

यस्तो छ प्रहरीसमक्ष चक्रेको बयान:

“हाल म नेकपा एमाले पार्टीको गोरखास्तरीय पार्टीको सदस्य भई पार्टीगत रुपमा नेपालको विभिन्न वडा क्षेत्रमा आयोजना हुने कार्यक्रम र सामाजिक सेवा विशेष कार्यहरूमा सहभागी भई संयोगात्मक कार्य गर्दै आइरहेको छु ।

विगत केही वर्ष अघिदेखि सक्रिय रुपमा सामाजिक सेवा र राजनितिक पार्टीमा आबद्ध भई समाजसेवी कार्यहरू गर्दै आउने क्रममा मेरो प्रस्तुत मुद्दामा मसँगै पक्राउ परी आएका साथी भाइहरूसँग चिनजान हुन पुगेको हो । पक्राउ परी आएका प्रतिवादीहरूमध्ये कतिलाई मैले नामले मात्र चिन्छु । निजहरू सबै जना मेरो नाम र मैले गरेको सामजिक कार्यहरू मन पराइ मेरो जन्म दिन मनाउन निजहरू आफैं उपस्थित हुन आएका थिए ।

मेरो जन्म श्रवाण महिनामा पर्ने हुँदा कतिपय मलाई पार्टीगत हिसाबले सहयोग र साथ दिने व्यक्तिहरूले मलाई श्रावण महिनाको सुरू हप्तादेखि नै विभिन्न स्थानहरूमा बोलाई निजहरू आफैंले केक काटेर शुभकामना दिने गरेको थिए ।

मैले आफूलाई सहयोग गर्ने र मन पराउने सबै साथी भाइहरूको मन राख्न भनी श्रावण महिनाको सुरुहप्ता देखि नै काठमाडौं, पोखरा, बुटवल र अन्य स्थानहरूमा समेत साथी भाइहरूको अनुरोधमा उपस्थित हुन गई आफ्नो जन्म दिन मनाउँदै आइरहेको थिएँ ।

यसरी विभिन्न स्थानहरूमा मलाई माया र साथ सहयोग गर्ने साथी भाइहरूले बोलाई केक काटी रमाइलो गराएको हुँदा मैले पनि सबै जनालाई साउन १५ गते बेलुकी महाराजगञ्जस्थित होटल साम्बालामा उपस्थित हुन आउनु भनी निमन्त्रणा दिएको हुँ ।

मैले महाराजगञ्जस्थित होटल साम्बालाको ग्राउण्ड फ्लोर र माथिको रुफ टप बुकिङ गरी राखेको थिएँ । १५ महराजगञ्जस्थित होटल साम्बालामा मलाई साथ सहोग गर्ने मेरो निमन्त्रणा सुनी जन्म दिन मनाउन आएका व्यक्तिहरू सबै जना बेलुकीको समयमा होटलको ग्राउण्ड फ्लोरमा भेला जम्मा भई सबै जना सँगै बसेर ग्राउण्ड फ्लोरमा खाना खाई रातको १२ बजे भन्दा अघि नै केक काट्ने कुरा भएको थियो ।

केक काट्नको लागि हामीहरू सबै जना होटलको रुफ टपमा गई राती साढे ११ बजेको समयमा सबै जनाले माया गरी लिएर आएका केकहरू मैले पालै पालो काटी सबै जनालाई खुवाइ सबै जना मिलेर नाँच्दै गाउँदै रमाईलो गरी बसिरहेका थियौं ।

सोही समयमा हामी रमाईलो गरी बसिरहेको स्थानमा एक्कासी ड्यूटीमा खटिएका प्रहरी आई हामीहरू सबै जनालाई रातभर किन हो हल्ला गरेको भनी सम्झाई–बुझाई गर्न आउँदा हामीहरूमध्ये केही भाइहरूको प्रहरीसँग सामान्य भनाभान मात्र हुन पुगेको थियो ।

तर हामीले प्रतिवेदनमा उल्लेखित कुनै किसिमको अभद्रजन्य कार्य गरेको छैन, थिएन । प्रतिवेदनमा उल्लेखित धारिलो तथा जोखिमी हतियारहरू प्रदर्शन गर्ने, सार्वजनिक स्थान, सडक, बाटो नै अवरोध हुने गरी स्थानिय व्यक्तिहरूलाई गाली गलौज गर्ने, डर धाक धम्की दिने लगायतको कार्य मबाट भए गरेको छैन ।

मलाई देखाइएका प्रतिवेदन साथ पेश भएको भिडियो तथा फोटोहरू उक्त वारदात भन्दा अघिल्लो दिनहरूमा अन्य भाइहरूको निमन्त्रणामा म आफैं आफ्नो जन्म दिनको केक काट्न जाँदाको फोटाहरू हुन् ।

हामीले सार्वजनिक स्थानमा भेला जम्मा भई केक मात्र काटी रमाइलो गरेका थियौं । तर धारिलो हतियार प्रदर्शन गर्ने, सार्वजनिक आवगमनमा नै अवरोध खडा गर्ने जस्ता कार्यहरू गरेको थिएन, छैन । यसरी ठूला संख्यामा युवाहरूलाई भेला जम्मा गरी आफ्नो जन्म दिन मनाउने कार्यक्रम सञ्चालन गर्नु नै मेरो गल्ती भयो ।”