ललितपुरको महालक्ष्मीस्थित मितेरी सहकारी ठगी प्रकरणको अनुसन्धान सम्पन्न गरी केन्द्रीय अनुसन्धान ब्युरो (सीआईबी) ले जिल्ला सरकारी वकिल कार्यालयमा प्रतिवेदन बुझाएको छ। सो प्रतिवेदनमा नेपाली कांग्रेसका उपसभापति धनराज गुरुङको संलग्नताबारे कुनै प्रमाण नफेला परेकाले उनीविरुद्ध मुद्दा दायर नगर्ने राय दिइएको छ, जसअनुसार गुरुङले सीआईबीको अनुसन्धानबाट पूर्ण उन्मुक्ति पाएका छन्।

बुधबार सीआईबीले प्रतिवेदन बुझाएपछि अब सरकारी वकिल कार्यालयले प्रतिवेदनको अध्ययन गरी जिल्ला अदालत ललितपुरमा मुद्दा दायर गर्नेछ। सीआईबीका एसएसपी होविन्द्र बोगटीका अनुसार ११ जनालाई प्रतिवादी बनाउने रायसहितको अनुसन्धान प्रतिवेदन बुझाइएको हो। यीमध्ये धनराज गुरुङको नाम समावेश गरिएको छैन।

अनुसन्धानमा गुरुङविरुद्ध प्रत्यक्ष प्रमाण नभेटिएको र पक्राउ परेकाहरूको बयानबाट पनि उनको संलग्नता नखुलेको सीआईबी स्रोतले जनाएको छ। यसअघि उनीमाथि संलग्नताको आरोप लागे पनि प्रतिवादी सूचीमा उनको नाम नपरेको हो। तर, गुरुङकी पूर्वश्रीमती ज्योति गुरुङसहित ११ जनालाई प्रतिवादी बनाउन सिफारिस गरिएको छ। प्रतिवादीमा बर्दियाका ज्योतिबहादुर भण्डारी, धादिङका सुवास खत्री, बर्दियाका सुरेश अधिकारी, प्रकाश थापा, हितमान थापा लगायत छन्।

प्रतिवेदन अनुसार, मितेरी सहकारीमार्फत करिब १४ करोड रुपैयाँ ठगी गरिएको र सहकारी सञ्चालकहरूसँग उल्टै साढे तीन करोड रुपैयाँ ठगी भएको दाबी गरिएको छ। ठगीको प्रमुख आरोप ज्योति गुरुङ र ज्योतिबहादुर भण्डारीमाथि छ। ज्योति गुरुङमार्फत भण्डारीले सहकारीका पदाधिकारीसँग सम्पर्क गरी रकम फिर्ता गर्ने प्रलोभन देखाएर उल्टै अनलाइन फिसिङमार्फत ठगी गरेको पाइएको हो। ठगीपछि उनीहरू विदेश भागेका थिए र भण्डारीले थाइल्यान्ड, मलेसिया, भियतनाम हुँदै कम्बोडियाबाट समेत अनलाइनमार्फत ठगी जारी राखेका थिए।

भण्डारीले विदेशमै रहँदा ३ करोड ४४ लाखभन्दा बढी रकम थप ठगी गरेको र सहकारीलाई तिर्ने भन्दै ३३ करोडभन्दा बढी रकम पठाएको भनी नक्कली कागजात पेस गरेको प्रमाण भेटिएको छ। त्यस क्रममा उनले सहकारीका पदाधिकारीलाई पटक–पटक रकम हाल्न लगाएर ठगी गरेका थिए। अनुसन्धानमा उनको समूहले ६ अर्ब ७४ करोडभन्दा बढीको हुन्डी कारोबार र ठूलो मात्रामा क्रिप्टो कारोबार गरेको तथ्य फेला परेको छ।

भण्डारीमाथि ठगी, संगठित अपराध, हुन्डी कारोबार, आभौतिक मुद्रा कारोबार, कीर्ते लगायतका मुद्दा दायर गर्न सिफारिस गरिएको छ। यसका साथै, उनीसँग दुई फरक जिल्लाबाट लिएको दुईवटा नागरिकता र राहदानी रहेको प्रमाण समेत भेटिएको छ, जसमा कास्की र बर्दियाबाट अलग–अलग नम्बरका नागरिकता र पासपोर्ट लिएको पाइएको छ। यी मुद्दा ललितपुरबाट चल्ने बताइएको छ।

यस प्रकरणमा संलग्न केही व्यक्ति यसअघि पनि नक्कली नोट प्रकरण र हुन्डी कारोबारमा पक्राउ परेका थिए। हाल सीआईबीको अनुसन्धान सकिएपछि सरकारी वकिल कार्यालयको निर्णयअनुसार अदालतमा मुद्दा अगाडि बढ्नेछ।

राजनीति, सत्ता र शक्ति, “दाइ भाउजु” को आशिर्बादका कारण धनराज लाई उन्मुकी मिलेको जनमानसको टिप्पणी छ।