४ मौलिक तीज गीत एकै साथ: रामप्रसाद खनालको नयाँ प्रस्तुति 

काठमाडौं, साउन १६ –  लोकगायक तथा पत्रकार रामप्रसाद खनालले यस वर्षको तीजलाई विशेष बनाउँदै चारवटा मौलिक तीज गीतको शृंखला एकै पटक सार्वजनिक गरेका छन्। करिब १ घण्टा १८ मिनेटको लगातार तीज गायनमा आधारित यस भिडियो खनालको आफ्नै युट्युब च्यानलबाट सार्बजनिक गरिएको छ ।

खनालको शब्द, संगीत, एरेन्ज र निर्देशनमा तयार भएको तीज गीत शृंखलामा नेपालका ख्यातीप्राप्त लोक तथा तीज गायनमा दखल राख्ने कलाकारहरूको सहभागिता रहेको छ। गायनमा रामप्रसाद खनालसँगै राजु परियार, रामचन्द्र काफ्ले, जुनु रिजाल, पूर्णकला बीसी, नविन पौडेल, कमला पोखरेल, सुमन थापा मगर, सीमा थापा, मिना लामा, सुनितमी परियार, मनु बीके, दिपिका बायम्बु, प्रतिमा विश्वकर्मा, रूपी सिजाली, कमल कुमार बीके, यान प्रसाद न्यौपाने लगायतका कलाकारहरूको आवाज रहेको छ।

लोकको आत्मा बोकेको गीत

“म लोकगायक हुँ, त्यसैले लोक जीवनसँग जोडिएका मौलिक भाकालाई तीजमार्फत प्रस्तुत गरेको छु। केही टुक्का मात्र होइन, पूरा गीत हेर्नुहोस्, सुन्नुहोस्, बुझ्नुहोस्। मौलिकता र सन्देश बोकेको यो हाम्रो चाडको आत्मा झल्काउने प्रयास हो”, खनालले सामाजिक सञ्जालमा लेखेका छन्।

सारङ्गी संसारको स्टुडियोमा रेकर्ड

उक्त गीतहरुको रेकर्डिङ ‘सारङ्गी संसार’ स्टुडियोमा गरिएको हो, अडियो तथा भिडियो उत्पादन भने अन्तर्राष्ट्रिय कलाकार मञ्च अमेरिका (International Artists Forum USA) को सहकार्यमा गरिएको हो।

मौलिकता र सन्देशको सन्देश

खनालले तीजको मौलिक भाकाहरू मात्र नभई, नेपाली समाजमा महिलाहरूको भोगाइ, सन्देश, संघर्ष र संस्कारलाई गीतमार्फत प्रस्तुत गर्न खोजेका छन्। उनले भनेका छन्, “यी भाका पुराना पनि हुन्, संकलित पनि। तर, हाम्रो बाल्यकालदेखि सुन्दै गाइरहेका यी मौलिक भाकालाई सम्झना र जगेर्नाका लागि पुनः जीवन दिन खोजिएको हो।  संस्कृति जगेर्नाको भावनाबाट प्रेरित छ।” उनले आफ्ना दर्शक श्रोताहरुलाई युट्युब च्यानल सब्स्क्राइब गर्न पनि आग्रह गरेका छन्।

यस वर्षको तीजको अवसरमा लोक भाकाको जगेर्ना र प्रवर्द्धनमा एउटा उदाहरणीय प्रयासका रूपमा खनालको यो प्रस्तुतिलाई नेपाली संगीतप्रेमीहरूले खुलेर स्वागत गरिरहेका छन्।