सरकारले पुर्व राजाका समर्थकले गरेको प्रदर्शनको क्रममा भएको हिंसात्मक गतिविधिको छानविन गर्न गृहमन्त्रालयलाई निर्देशन दिएको छ । शुक्रबार अबेर राती प्रधानमन्त्रीको सरकारी निवास बालुवाटारमा बसेको मन्त्रीपरिषद् बैठकले प्रर्दशनको क्रममा भएको अमानवीय क्रियाकलापको घोर भत्र्सना गर्दै सो क्रममा मृत्यु भएका व्यक्ति प्रति श्रद्धाञ्जलि व्यक्त गरेको छ । बैठकले घाईतेहरुको निशुल्क उपचार गर्ने व्यवस्था मिलाउन स्वास्थ्य मन्त्रालयलाई निर्देशन गरेको छ । त्यसैगरी शुक्रबारको घटनामा भएको जनधनको क्षतिको सत्य तथ्य पत्तालगाई दोषीलाई कारवाही गर्न र यस्ता घटना भविश्यमा हुन नदिन गृहमन्त्रालयलाई निर्देशन दिएको छ । मन्त्रीपरिषद्को बैठकको बारेमा जानकारी दिदै सरकारका प्रवक्ता पृथ्वी सुब्बा गुरुङले ले म्यानमार र थाईल्याण्डमा गएको विनासकारी भुकम्पबाट भएको धनजनको क्षति प्रति गहिरो दुख व्यक्त गरेको जानकारी दिनुभयो ।

उहाँले भन्नुभयो ‘पुर्व राजाका समर्थकहरुद्धारा काठमाण्डौको तीनकुने आसपासको क्षेत्रमा अराजक प्रर्दशनको क्रममा नीजी, सार्वजनिक एवं सरकारी सम्पति, सवारी साधन, राजनीतिक दलका कार्यालय एवंम् सञ्चारगृहहरु माथि भएको आक्रमण , आगजनी र तोडफोड एवंम् अन्तराष्ट्रिय विमानस्थल जस्तो संवेदनशील क्षेत्रमा हिंसात्मक गतिविधि गरि आतंक फैलाउने , घरभित्र मानिस भएको अवस्थामा ढुंगामुडा , आगजनी र मानिसको ज्यान जाने जस्ता अमानविय र गैह कानुनी कार्य गरि तोडफोड र लुट जस्ता कार्य भएकोमा नेपाल सरकार घोर भत्र्सना गर्दछ । नेपाल सरकार उक्त घटनामा मृत्यु भएका व्यक्तिप्रति श्रद्धाञ्जली व्यक्त गर्दै प्रर्दशनको क्रममा घाईते भएकाहरुको निशुल्क स्वास्थ्य व्यवस्था स्वास्थ्य मन्त्रालयले मिलाउने र घटनाको सत्य तथ्य छानविन गरि दोषी उपर कारवाही गरि आगामी दिनमा यस्तो घटना हुन नदिन उचित व्यवस्था मिलाउन गृह मन्त्रालयलाई निर्देशन दिने र यस्ता गतिविधिमा सहभागी नहुन सर्वसाधरणलाई आव्हान गर्दछ । त्यसैगरी म्यानमार र थाईल्याण्डमा गएको विनासकारी भुकम्पबाट भएको धनजनको क्षतिप्रति नेपाल सरकार गहिरो दुख व्यक्त गर्छ । दुखद घटनामा मृत्यु हुनेमा श्रद्धाञ्जली व्यक्त गर्दै प्रभावितहरुमा धैर्यधारण गर्ने शक्तिप्रदान गरुन् भन्ने कामना गर्दछु । ’

शुक्रबार काठमाण्डौमा राजावादी र समाजवादी मोर्चाले प्रर्दशन आयोजना गरेका थिए । राजावादीहरु सुरुमै ढुंगामुडा र अराजक गतिविधिमा उत्रिएपछि उनीहरुको औपचारिक कार्यक्रम हुन सकेन । सो क्रममा एक जना पत्रकार सहित दुई जनाको ज्यान गएको छ । समाजवादी मोर्चाले भने शान्तिपुर्ण रुपमा कार्यक्रम सम्पन्न भएको थियो । राजावादीले तीनकुने र समाजवादी मोर्चाले भृकुटीमण्डपमा कार्यक्रम आयोजना गरेका थिए ।

यता जिल्ला प्रहरी परिसर काठमाडौँले तीनकुने क्षेत्रमा भएको मानवीय र भौतिक क्षतिको घटनाप्रति गम्भीर ध्यानाकर्षण भएको जनाएको छ ।

पूर्वराजाका समर्थकद्वारा तीनकुने क्षेत्रमा शान्तिपूर्ण प्रदर्शनको लागि पूर्वअनुमति लिई भएको प्रदर्शनका क्रममा निषेधित क्षेत्रसमेत तोडी निजी सम्पत्ति, अस्पताल, सञ्चारगृह, राजनीतिक दलका कार्यालय, व्यापारिक क्षेत्रलगायत यातायातका सवारी साधनमाथि तोडफोड भएको प्रहरीले जनाएको छ ।

प्रहरीले मानवीय र भौतिक क्षति भएको घटनाप्रति गम्भीर ध्यानाकर्षण भएको उल्लेख गर्दै क्षतिको विवरणसमेत सार्वजनिक गरेको छ । तीनकुने घटनामा परी कीर्तिपुर–४ का सविन महर्जनको उपचारको क्रममा त्रिभुवन विश्वविद्यालय शिक्षण अस्पतालमा निधन भएको घोषणा गरिएको प्रहरीले जनाएको छ ।

तीनकुनेस्थित मार्बल हाउसमा सुरेश रजक मृत अवस्थामा फेला परेको प्रहरीले जनाएको छ । सो घटनामा परी नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका थिए ।

यसैगरी नौ वटा सरकारी सवारी साधन, छ वटा सरकारी वा निजी नखुलेका सवारी साधनमा आगजनी भएको छ । विभिन्न १४ स्थानमा आगजनी भएको, नौ वटा संस्थामा तोडफोड र एक स्थानमा लुटपाट भएको जिल्ला प्रहरी परिसर प्रहरी उपरीक्षक अपीलराज बोहराले जानकारी दिनुभयो ।