अमेरिकामा गत वर्ष दुई चरणमा देशव्यापी रूपमा आयोजना गरिएको ‘नो किङ्स’ (No Kings) आन्दोलनको नेतृत्व गर्ने समूहले अब अर्को ठूलो राष्ट्रिय प्रदर्शनको तयारी थालेको छ। आगामी मार्च २८ मा हुने भनिएको यस प्रदर्शनको मुख्य केन्द्र मिनेसोटा रहनेछ, जहाँ पछिल्ला महिनाहरूमा आप्रवासन कार्यान्वयनविरुद्धका आन्दोलनहरू तीव्र बन्दै आएका छन्। राष्ट्रपति डोनाल्ड ट्रम्प को नीतिविरुद्ध लक्षित यो प्रदर्शन उदारवादी आधारस्तरको समूह इन्डिभिजिबल ले आयोजना गर्न लागेको हो। आयोजकहरूका अनुसार सो दिन अमेरिकाभर समन्वित रूपमा प्रदर्शन हुनेछ, जसको मुख्य मार्च ‘ट्विन सिटिज’ क्षेत्रमा आयोजना गरिनेछ। यस कार्यक्रमलाई ‘नो किङ्स–३’ नाम दिइएको छ।

इन्डिभिजिबलका सह–कार्यकारी निर्देशक एज्रा लेभिन ले एसोसिएटेड प्रेससँग कुरा गर्दै यो अमेरिकी इतिहासकै सबैभन्दा ठूलो प्रदर्शन हुनसक्ने दाबी गरेका छन्। उनका अनुसार करिब ९० लाख मानिस सहभागी हुन सक्छन्। लेभिनका शब्दमा, “लोकतन्त्र र समुदायमाथि भइरहेका गम्भीर आक्रमणविरुद्धको यो प्रतिक्रिया हो। कसैले हामीलाई बचाउन आउँदैन भन्ने अनुभूतिले मानिसहरू सडकमा निस्किरहेका छन्।”

मिनेसोटा पछिल्लो समय ट्रम्प प्रशासनको आप्रवासन कडाइको मुख्य केन्द्र बनेको छ। करिब ३ हजार संघीय एजेन्टहरू त्यहाँ खटाइएपछि अवस्था झन् तनावग्रस्त बनेको आयोजकहरूको भनाइ छ। यसलाई ट्रम्पको दोस्रो कार्यकालकै सबैभन्दा ठूलो एकल आप्रवासन अपरेसनका रूपमा वर्णन गरिएको छ। यद्यपि वसन्तकालीन प्रदर्शनको योजना यसअघि नै बनिसकेको भए पनि, हालै संघीय एजेन्टहरूसँगको मुठभेडमा एलेक्स प्रेट्टी र रेनी गुड को ज्यान गएपछि आन्दोलनको केन्द्रीय विषय मिनेसोटातर्फ मोडिएको छ।

गत वर्ष ‘नो किङ्स’ आन्दोलन दुई चरणमा देशभर फैलिएको थियो। आयोजकहरूका अनुसार अक्टोबर १८ मा भएको दोस्रो चरणमा करिब ७० लाखभन्दा बढी मानिस ५० वटै राज्यका झन्डै २,७०० सहर र गाउँमा सडकमा उत्रिएका थिए। पहिलो चरण जुन १४ मा करिब २ हजार स्थानमा भएको थियो, जसको पृष्ठभूमिमा संघीय आप्रवासन छापा, लस एन्जलसमा नेसनल गार्ड र मरीन खटाइएका घटनाहरू थिए। इन्डिभिजिबल र यसका सहयोगी समूहहरूले ठूला प्रदर्शनका दिनहरूमा मात्र होइन, दीर्घकालीन रूपमा पनि संगठन विस्तार गर्ने योजना बनाएका छन्। यसमा आप्रवासन कार्यान्वयन गतिविधि निगरानीका लागि देशव्यापी तालिम कार्यक्रमसमेत समावेश छन्। लेभिनका अनुसार यो डेमोक्र्याट र रिपब्लिकनबीचको लडाइँ नभई लोकतन्त्र नै रहने कि नहुने भन्ने प्रश्न हो।

यसैबीच मिनेसोटाको म्यापल ग्रोभस्थित एक होटल बाहिर भएको प्रदर्शन हिंसात्मक बनेपछि प्रहरीले अवैध भेला घोषणा गर्दै कारबाही गरेको छ। प्रदर्शनकारीहरूले सीमा सुरक्षा अधिकारी ग्रेगरी बोभिनो त्यहीँ बसेको आशंकामा स्प्रिङहिल सुइट्स बाइ म्यारियट होटल बाहिर प्रदर्शन गरेका थिए। प्रहरीका अनुसार प्रदर्शन शान्तिपूर्ण नरहेपछि, सम्पत्ति तोडफोड र प्रहरीमाथि वस्तु फ्याँकिएको आरोपमा १३ जना पक्राउ परेका छन्। म्यापल ग्रोभ प्रहरीले विज्ञप्ति जारी गर्दै शान्तिपूर्ण भेला र अभिव्यक्ति स्वतन्त्रताको सम्मान गर्ने बताए पनि आपराधिक गतिविधिमा संलग्न व्यक्तिहरूलाई पहिलो संशोधनले संरक्षण नदिने स्पष्ट पारेको छ।

उही सन्दर्भमा मिनेसोटाकी सांसद इल्हान ओमर ले आफ्नै निर्वाचन क्षेत्रमा टाउन हल कार्यक्रम आयोजना गरेकी थिइन्। कार्यक्रमका क्रममा एक व्यक्तिले दुर्गन्धित रासायनिक पदार्थ छर्किएर आक्रमण गरेपछि स्थिति तनावग्रस्त बन्यो। आक्रमणपछि पनि ओमरले कार्यक्रम नछोडी भाषण जारी राख्दै “हामी मिनेसोटा स्ट्रङ छौँ र जे आए पनि डटेर सामना गर्छौँ” भन्दै भीडलाई सम्बोधन गरिन्। उक्त आक्रमणको आरोपमा एन्थोनी जेम्स काज्मिएर्चाक नामका व्यक्तिलाई तेस्रो दर्जाको आक्रमण अभियोगमा पक्राउ गरी हेनेपिन काउन्टी जेलमा राखिएको छ। ओमरले यस अवसरमा संघीय गृह सुरक्षा सचिव क्रिस्टी नोएम को राजीनामा वा महाभियोगको मागसमेत दोहोर्याइन् र आप्रवासन तथा सीमा सुरक्षा निकायलाई ‘नियन्त्रणबाहिरको संस्था’ को संज्ञा दिइन्।

ओमरले संघीय आप्रवासन कारबाहीलाई शरणार्थीहरू भागेर आएका हिंसात्मक अवस्थासँग तुलना गर्दै यस्ता कार्यले नागरिक र कागजात भएका बासिन्दामा समेत भय सिर्जना गरेको बताइन्। “बालबालिका विद्यालय जान डराइरहेका छन्, अभिभावकहरू डराइरहेका छन्, किनकि उनीहरू बन्दुकधारीहरूबाट भागेर यहाँ आएका हुन्,” उनले भनिन्।

यता, अर्कोतर्फ डोनाल्ड ट्रम्प आयोवा राज्यको एक रेस्टुरेन्टमा पुग्दा एक ग्राहकले उनको लागि प्रार्थना गर्न अनुमति मागेका थिए। ट्रम्पले सहर्ष स्वीकार गर्दै टाउको निहुराएपछि रेस्टुरेन्टभित्र छोटो प्रार्थना सम्पन्न भयो। उक्त क्षणको भिडियो ह्वाइट हाउसका सहयोगी मार्गो मार्टिन ले सामाजिक सञ्जाल एक्समा सार्वजनिक गरेकी थिइन्।

प्रार्थनामा राष्ट्रपतिका लागि बुद्धि, विवेक, शान्ति र सुरक्षाको कामना गरिएको थियो, जसमा वरपरका मानिसहरूले ‘आमेन’ भन्दै समर्थन जनाएका थिए। यो घटना ट्रम्पले २०२६ को मध्यावधि निर्वाचन अभियान सुरु गर्नुअघि डेस मोइन क्षेत्रमा भाषण दिन जाने क्रममा भएको हो। ह्वाइट हाउसले अमेरिकाको २५०औँ स्थापना वार्षिकोत्सवको सन्दर्भमा राष्ट्रिय प्रार्थना र आध्यात्मिक पुनःसमर्पणको आह्वानसमेत जारी गरेको छ। ट्रम्पले देश लामो समयदेखि प्रार्थनाले नै मजबुत बनेको उल्लेख गर्दै ‘ईश्वरअन्तर्गतको एक राष्ट्र’ प्रतिको प्रतिबद्धता दोहोर्याउन आग्रह गरेका छन्।