अमेरिकी राष्ट्रपति डोनाल्ड ट्रम्पले कोलम्बियालाई दिँदै आएको सबै प्रकारको अमेरिकी सहयोग र अनुदान बन्द गर्ने घोषणा गरेका छन्। आइतबार उनले आफ्नो Truth Social मार्फत कोलम्बियाका राष्ट्रपति गुस्ताभो पेत्रोलाई “एक गैरकानुनी लागूऔषधका नेता” भन्दै कटाक्ष गरेका छन्।

ट्रम्पले लेखे, “पेत्रोले साना–ठूला खेतहरूमा लागूऔषध उत्पादनलाई प्रोत्साहन दिएका छन्। उनले केही पनि नगरेका कारण अब अमेरिका कोलम्बियालाई कुनै भुक्तानी वा अनुदान दिने छैन।” अमेरिकी सरकारी तथ्यांकअनुसार सन् २०२३ मा अमेरिकाले कोलम्बियालाई ७४० मिलियन डलरभन्दा बढी सहयोग प्रदान गरेको थियो।

यो कदम पछिल्ला केही हप्तामा अमेरिकाद्वारा लाटिन अमेरिकी देशहरूमा गरिएको “ड्रग्सविरोधी सैन्य आक्रमण” को शृङ्खलाको अर्को कडीका रूपमा आएको हो। अमेरिकी सेनाले पछिल्ला हप्ताहरूमा करिब आधा दर्जनभन्दा बढी नौकामा आक्रमण गरेको छ, जसमा २७ जनाको मृत्यु भएको अमेरिकी प्रशासनले जनाएको छ।

ट्रम्पको यो निर्णय कोलम्बियाली राष्ट्रपति पेत्रोका तीव्र प्रतिक्रियापछि आएको हो। पेत्रोले गत सेप्टेम्बरमा कोलम्बियाको समुद्री सीमाभित्र अमेरिकी सेनाले गरेको हवाई आक्रमणलाई “हत्या” र “सार्वभौमिकता उल्लंघन” भनेका थिए। उक्त आक्रमणमा कोलम्बियाली माछेवाला आलेखान्द्रो कारान्जा मारिएका थिए।

पेत्रोले सामाजिक सञ्जालमा लेखेका थिए, “माछा मार्न निस्केको कोलम्बियाली डुङ्गा इन्जिन बिग्रिएर रोकिएको थियो, त्यसमा ‘Distress Signal’ पनि झुन्ड्याइएको थियो। तर अमेरिकी सेनाले त्यसमा आक्रमण गर्‍यो। यो घटनाको स्पष्टीकरण अमेरिकी सरकारले दिनुपर्छ।”

अमेरिकी विदेश विभागले सेप्टेम्बरमै चेतावनी दिएको थियो कि पेत्रो सरकारको नेतृत्वमा कोलम्बियामा कोका खेती ऐतिहासिक उच्च स्तरमा पुगेको छ र लागूऔषध नियन्त्रणका लक्ष्यहरू पूरा गर्न असफल भएको छ। त्यसपछि अमेरिकाले कोलम्बियालाई “Foreign Assistance Act” अन्तर्गत सहयोगका लागि अयोग्य घोषित गरेको थियो, तर तत्कालीन अवस्थामा छुट दिएर सहयोग निरन्तर राखिएको थियो।

तर पेत्रोले अमेरिकामाथि “हत्या”को आरोप लगाएपछि ट्रम्पले अब उक्त छुट हटाउँदै सम्पूर्ण सहायता बन्द गर्ने निर्णय गरे।

संयुक्त राष्ट्रसंघका मानवअधिकार विज्ञहरूले अमेरिकी नौसेनाद्वारा गरिएका यी आक्रमणहरूलाई “बिनान्यायिक हत्या (extrajudicial executions)” भनेका छन्।

ट्रम्पले भने आक्रमणको बचाउ गर्दै भनेका छन्, “यी सबै कारबाहीहरू अमेरिकी भूमिमा लागूऔषध प्रवेश रोक्ने उद्देश्यले गरिएका हुन्।” उनले पछिल्लो आक्रमणबारे पनि भने, “खोज र विश्लेषणले देखाएको छ कि उक्त पनडुब्बीमा मुख्य रूपमा फेन्टानिल र अन्य अवैध लागूऔषधहरू लोड गरिएका थिए।”

कोलम्बियाली पक्षले भने अमेरिकाको यो कदमले दुई देशबीचको दशकौँ लामो साझेदारीमा गम्भीर असर पार्ने चेतावनी दिएको छ। राष्ट्रपति पेत्रोले प्रतिक्रिया दिँदै भनेका छन्, “यो हाम्रो देशको सार्वभौमिकतामाथिको आक्रमण हो, जुन कुनै पनि राष्ट्रले सह्य गर्न सक्दैन।”