मनीला, फिलिपिन्स / मंगलबार राति फिलिपिन्सको केन्द्रीय क्षेत्रमा ६.९ म्याग्निच्युडको शक्तिशाली भूकम्प जाँदा कम्तीमा २० जनाको ज्यान गएको छ भने कैयौँ घाइते भएका छन्। घर र भवनका पर्खाल भत्किएका छन् र बिजुली अवरुद्ध भएपछि स्थानीयहरू अन्धकारमै घरबाट भाग्न बाध्य भए।

फिलिपिन्सको भूगर्भ तथा ज्वालामुखी विज्ञान संस्थानका अनुसार यो भूकम्प सेबु प्रान्तको बोगो सहरबाट करिब १७ किलोमिटर टाढा समुद्री सतहमुनि स्थानीय फॉल्ट लाइन सक्रिय हुँदा आएको हो। बोगोमा मात्र कम्तीमा १४ जनाको मृत्यु भएको बताइएको छ। उद्धारकर्मीहरूले पहिरो र ठूला ढुंगाले थुनिएका बस्तीहरूमा खोजतलास गर्न डोजर र भारी उपकरण पठाइरहेका छन्।

बोगो नगर आपत् व्यवस्थापन अधिकृत रेक्स यगोटका अनुसार मृत्यु संख्या अझै बढ्न सक्ने देखिन्छ। “उद्धारमा कठिनाइ छ किनकि पहिरो र ठूला ढुंगाहरूले बाटो अवरुद्ध गरेका छन्,” उनले बताए।

सेबु प्रान्तकै सान रेमिगियो नगरमा अलग-अलग घटनामा तट रक्षक, एकदमै बच्चा र एक अग्नि नियन्त्रण कर्मचारीसहित ६ जनाको मृत्यु भएको उप–मेयर अल्फी रेनिसले बताएका छन्। त्यहाँ पानी आपूर्ति प्रणाली नष्ट भएपछि खानेपानी र खाद्यान्नको अभाव भएको उनले जानकारी दिए।

बोगोमा घर र भवनका कङ्क्रिट पर्खाल, फायर स्टेशन, सडक र ढलानहरू चिरा परेर ध्वस्त भएका छन्। एक फायरफाइटर रे क्यानेतेका अनुसार भूकम्प सुरु हुदै गर्दा उनीहरू ब्यारेकमा आराम गर्न तयार थिए तर शक्तिशाली कम्पनले सबैतिर ढालिदियो। उनी र उनका साथीहरूलाई सामान्य चोटपटक परेको छ।

डानबान्तायानस्थित ऐतिहासिक रोमन क्याथोलिक चर्च पनि क्षतिग्रस्त भएको प्रारम्भिक जानकारी आएको छ। सेबु प्रान्तका गभर्नर पामेला बारिकुआत्रोले क्षतिको पूर्ण विवरण दिन उज्यालो पर्खनुपर्ने बताएका छन्। “हामीले सोचेभन्दा बढी क्षति हुनसक्छ,” उनले फेसबुक भिडियो सन्देशमा भने।

भूकम्पपछि फिलिपिन्स भूगर्भ संस्थानले सेबु, लेयते र बिलिरानमा सुनामी सतर्कता जारी गरेको थियो। तर केही समयमै असामान्य छाल नदेखिएपछि चेतावनी फिर्ता गरिएको छ।

फिलिपिन्स हालै आएको आँधीबाटै ठूलो क्षति व्यहोर्दै पुनःसङ्कटमा परेको छ। गत शुक्रबार आएको तूफानले कम्तीमा २७ जनाको ज्यान लिएको थियो र लाखौँ मानिसलाई विस्थापित पारेको थियो।

अधिकारीहरूले प्रभावित क्षेत्रमा उद्धार र राहतका प्रयास तीव्र पारिरहेका छन् र स्थानीयलाई तटीय इलाकाबाट टाढा रहन तथा पराकम्पनको जोखिमका कारण सतर्कता अपनाउन आग्रह गरिएको छ।

Photo by Dennis M. Sabangan/EPA.