काठमाडौं / पूर्वराजा ज्ञानेन्द्र वीर बिक्रम शाहदेवले २०८२ सालको विजयादशमीको अवसरमा नेपाली जनतालाई शुभकामना दिँदै देशमा शान्ति, स्थिरता र राष्ट्रिय एकता कायम गर्न सबैले आत्ममूल्यांकन गर्नुपर्ने बताएका छन्। निर्मल निवास महाराजगञ्जबाट जारी गरिएको विजयादशमी सन्देशमा उनले हालको राजनीतिक अव्यवस्था र सामाजिक विभाजनप्रति चिन्ता व्यक्त गर्दै समयमै सुधार र सही बाटो रोज्नुपर्नेमा जोड दिएका छन्।

पूर्वराजाले भनेका छन्, “हामी नेपालीहरूको राष्ट्रिय चाड विजयादशमी श्रद्धा र आस्थासँगै परिवार र समाजलाई एकसाथ ल्याउने अवसर हो। विगत केही समयदेखि देश र जनताको हितविपरीत राजनीति भैरहेको छ, जसले आशा र विश्वास कमजोर बनाएको छ। अब हाम्रो सोच र दृष्टिकोणलाई सुधारेर नयाँ पुस्तालाई आशा र समृद्धिको बाटो देखाउनुपर्छ।”

परम्परा र स्वाभिमान बचाउन आह्वान

सन्देशमा पूर्वराजाले नेपालको ऐतिहासिक एकता, सार्वभौमिकता, राष्ट्रियता र बलिदानका मूल्यहरूलाई नबिर्सिन आग्रह गरेका छन्। उनले पूर्वजहरूले दिएको स्वतन्त्रता, स्वाभिमान र गौरवशाली संस्कृतिको मर्मलाई नयाँ पुस्ताले सिक्नुपर्ने बताएका छन्। “यो देशको गौरव र पहिचानलाई जोगाउन हामी सबै सजग रहनुपर्छ। नयाँ पुस्ताले आधुनिकता र प्रविधिलाई स्वीकार्दा पनि देशप्रेम, सदाचार र राष्ट्रभक्तिको भावना हराउन नदिऔँ,” सन्देशमा उल्लेख छ।

वर्तमान राजनीति र शासनप्रति आलोचना

पूर्वराजाले हालको राज्य व्यवस्थाले अपेक्षित सुधार र स्थिरता दिन नसकेको बताएका छन्। उनका अनुसार, विगत केही समययता देश असन्तोष र अनिश्चिततामा परेको छ। “हाम्रो शासनप्रणालीले जनताको विश्वास जित्न सकेको छैन। सत्य, सदाचार र अनुशासन कमजोर हुँदै गएको छ,” उनले भनेका छन्। देशलाई निकास दिन राजनीतिक नेतृत्वले आत्मसमीक्षा गरेर जनताको आशा र अपेक्षामा उत्तरदायी हुनुपर्ने उनको सन्देशमा भनिएको छ।

युवाप्रति विशेष सन्देश

ज्ञानेन्द्रले सन्देशमा युवापुस्तालाई आह्वान गर्दै भनेका छन्, “युवा नै राष्ट्रको बल, समृद्धि र भविष्य हुन्। उनीहरूलाई सही बाटो देखाउन नेतृत्वले जिम्मेवारीपूर्वक काम गर्नुपर्छ। उनीहरूमा देशभक्तिको भावना, नवीन सोच र मेहनतको प्रेरणा जगाउनुपर्छ।”

समृद्ध र सशक्त नेपालको आह्वान

सन्देशको अन्त्यमा पूर्वराजाले सम्पूर्ण नेपालीलाई आपसी सद्भाव, पारिवारिक र सांस्कृतिक सम्बन्ध मजबुत पार्न, आशा, विश्वास र सहयोगको भावना बढाउन आग्रह गरेका छन्। “राष्ट्रिय माया गर्ने सोच जागोस्, विगतका गल्ती नदोहोऱ्याऔं, सत्य र न्यायको बाटोमा लागौं। यिनै आधारमा हाम्रो नेपाल पुनः समृद्ध र सम्मानित बन्छ,” सन्देशमा भनिएको छ।