अमेरिकी राष्ट्रपति डोनाल्ड ट्रम्पले मंगलबार कम्तीमा ९० मिनेटसम्म रसियाली राष्ट्रपति भ्लादिमिर पुटिनसँग युक्रेन युद्ध अन्त्य गर्ने विषयमा कुराकानी गरेका छन्, ह्वाइट हाउसले उक्त कुराको पुस्टि गरेको छ । दुबै नेताहरूले “मध्यपूर्वमा तत्काल शान्ति वार्ता सुरु गर्ने” सहमति गरेको ह्वाइट हाउसले जनाएको छ । दुवै पक्षले ऊर्जा पूर्वाधारमाथि आक्रमण रोक्ने युद्धविराम सम्झौतामा सहमति भएको स्पस्ट पारेका छन ।

ह्वाइट हाउसका प्रवक्ता ड्यान स्काभिनोका अनुसार, यो वार्ता बिहान १०:०० सुरु भएको थियो। करिब १२:५२ बजे ह्वाइट हाउसले वार्ता समाप्त भएको जनाएको थियो, तर दुबै नेताले ठीक कुन समयमा फोन राखे भन्ने कुरा सुरुमा खुलाइएको थिएन।

वार्तापछि जारी गरिएको ह्वाइट हाउसको विज्ञप्तिमा भनिएको छ, “आज राष्ट्रपति ट्रम्प र राष्ट्रपति पुटिनले युक्रेन युद्धमा शान्ति र युद्धविरामको आवश्यकताबारे छलफल गरे। दुबै नेताहरूले यो द्वन्द्वलाई स्थायी शान्तिका माध्यमबाट अन्त्य गर्नुपर्ने कुरामा सहमति जनाए।”

विज्ञप्तिमा थप भनिएको छ, “संयुक्त राज्य अमेरिका र रसियाबीचको सम्बन्ध सुधार गर्नुपर्ने आवश्यकतामा दुबै नेता सहमत भए। युक्रेन र रसियाले यो युद्धमा खर्च गरिरहेको जनशक्ति र स्रोत उनीहरूकै जनताको आवश्यकतामा खर्च गर्नु उचित हुनेछ।”

“यो द्वन्द्व कहिल्यै सुरु हुनुहुँदैनथ्यो र ईमानदार तथा सद्भावनापूर्ण शान्ति प्रयासहरूबाट धेरै पहिले नै अन्त्य हुनु आवश्यक थियो। दुबै नेताहरूले ऊर्जा तथा पूर्वाधार युद्धविरामबाट शान्ति प्रक्रिया सुरु गर्ने, कालो सागरमा समुद्री युद्धविरामको लागि प्राविधिक वार्ता गर्ने, पूर्ण युद्धविराम लागू गर्ने र स्थायी शान्ति स्थापनाका लागि प्रक्रिया अघि बढाउने सहमति जनाएका छन्। यी वार्ताहरू मध्यपूर्वमा तत्काल सुरु गरिनेछ।”

ह्वाइट हाउसका अनुसार, “दुबै नेताहरूले मध्यपूर्वलाई भविष्यमा हुन सक्ने द्वन्द्व रोक्नका लागि सहकार्य गर्न सकिने क्षेत्रको रूपमा व्यापक रूपमा छलफल गरे। उनीहरूले रणनीतिक हतियारहरूको प्रसार रोक्न आवश्यकताबारे छलफल गरे र यसको सबैभन्दा व्यापक रोकथाम सुनिश्चित गर्न अन्य पक्षहरूसँग संलग्न हुने प्रतिज्ञा गरे।”

ह्वाइट हाउसले थप भन्यो, “दुबै नेताहरूले इरान कहिल्यै पनि इजरायललाई नष्ट गर्नसक्ने अवस्थामा रहनु हुँदैन भन्ने साझा दृष्टिकोण व्यक्त गरे। साथै, अमेरिका-रसिया सम्बन्ध सुधारिएको भविष्यले ठूला आर्थिक अवसरहरू र शान्ति प्राप्त भएपछि भू-राजनीतिक स्थायित्व ल्याउने ठूलो सम्भावना रहेकोमा सहमति जनाइयो।”

रूसको सरकारी सञ्चारमाध्यम TASS का अनुसार, वार्ताका क्रममा पुटिनले युक्रेनलाई दिइँदै आएको सबै प्रकारको सैन्य सहायता पूर्ण रूपमा रोक्नु नै युद्ध अन्त्यको प्रमुख सर्त रहेको बताएका छन्।

TASS ले ट्रम्पको ऊर्जा पूर्वाधारमा आक्रमण रोक्न ३०-दिनको आपसी युद्धविराम प्रस्तावलाई पुटिनले समर्थन गरेको र सोहीअनुसार आफ्नो सेनालाई आदेश दिएको उल्लेख गरेको छ। साथै, रूसले गम्भीर घाइते भएका २३ जना युक्रेनी सैनिकहरूलाई कीभ फर्काउने निर्णय गरेको छ, जसलाई सद्भावनाको संकेतका रूपमा हेरिएको छ।
वार्तापछि ह्वाइट हाउसले जारी गरेको विज्ञप्तिका केही प्रमुख बुँदा यस्ता छन्ः

ट्रम्प र पुटिनबीच युक्रेन युद्धमा अब “शान्तिको आवश्यकता र युद्धविराम” का विषयमा कुराकानी भयो र युद्धको अन्त्य “दिगो शान्ति” सहित हुनु पर्नेमा सहमति भयो।

दुवैजनाले अमेरिकी रुस सम्बन्धमा सुधार हुनु पर्ने आवश्यकतामा पनि जोड दिए।

दुवै नेताबीच “शान्ति हासिल गर्ने गतिविधि तर्फको बाटो” उर्जा र पूर्वधारका संरचनाहरूमा युद्धविरामबाट आरम्भ हुने कुरामा सहमति भयो। साथै ब्ल्याक सीमा समुद्री आवागमनमा पनि युद्धविराम लागु गर्ने वार्ता पनि सुरु हुनु पर्ने सहमित भयो।

दुवै राष्ट्रपतिबीच मध्यपूर्वको विषयमा पनि त्यस क्षेत्र “भविष्यमा हुनसक्ने द्वन्द्वहरू रोक्नका लागि सम्भावित सहकार्यको क्षेत्र” भएको भन्नेमा पनि कुराकानी भयो।

“रणनीतिक अस्त्रहरूको विस्तारलाई रोक्नु पर्ने ” आवश्यकताका बारेमा पनि छलफल भयो।

र दुवै नेताले “इजरेललाई नष्ट गर्नसक्ने अवस्थामा इरानलाई कहिल्यै पनि पुग्न दिन नहुने साझा धारणा” पनि बन्यो।