छन्दः शार्दूलविक्रीडित
-स्पन्दन विनोद

केरा पालन गर्न थाल मनुवा, के हुन्छ खेती गरि
बाख्रा रोप र नस्ल पालन गरौँ, डाडा र पाखा भरि
चढ्दा त्यो रुख लड्दछौ मरिचका, हुन्छन् बडेमा ठुला
भ्या भ्या गर्न नछोड “बा” शहरका, हे कार्यकर्ता मुला ॥
मुर्राले अब पाउँछन् सपुत लौ, खाऊ बिगौँती बसी
नक्सा पास गरेर भारत खुसी, चुच्चो हरायो कति
भेडा रोप र भ्रष्ट पालन गरौँ, भ्रष्टे बुढाका कुरा
भ्या भ्या गर्न नछोड “बा” शहरका, हे कार्यकर्ता मुला ॥
आँखा छैन र कान बन्द गरि ऊ, मस्तै निदायो सधैँ
राजा आउँछ भन्दछन् जनहरू, हाँस्दैछ ऊ लाजमै
होला दण्ड र के मरेपछि उही, जल्लाद जल्ला कता
भ्या भ्या गर्न नछोड “बा” शहरका, हे कार्यकर्ता मुला ॥
लुट्ने मात्र छ कूटनीति छ कहाँ, लाजै लजायो सखे
कोही छैन कि मर्द यो मुलुकमा, पालो कुरेरै बसे
डुब्दै देश छ जोक भन्छ सहजै, हाँस्छन् तिनैका ठुटा
भ्या भ्या गर्न नछोड “बा” शहरका, हे कार्यकर्ता मुला ॥
हेर्दै विश्व छ जिल्ल पर्छ अहिले, कस्तो भयो हालत
टुक्के बा अब मृत्युको मुख पुग्यौ, बिर्स्यौ बुटो के रुख
के गर्छस् सुविधा अझै छ सुविधा, थप्दै तलाका तला
भ्या भ्या गर्न नछोड “बा” शहरका, हे कार्यकर्ता मुला ॥