रवि लामिछानेसहित २२ जनाविरुद्ध जिल्ला अदालत रुपन्देहीमा मुद्दा दर्ता भएको छ । बुटवलको सुप्रिम सहकारी ठगी प्रकरणमा लामिछाने र पूर्व-डिआइजी छविलाल जोशी (बन्जाडे) विरुद्ध जिल्ला अदालत रुपन्देहीमा पूरक अभियोजन मुद्दा दर्ता भएको हो । जिल्ला सरकारी वकिलको कार्यालय रुपन्देहीले आइतबार रवि, छवि लगायतका २२ जनाविरुद्ध संगठित रूपमा सहकारी ठगीको कसुरअन्तर्गत पूरक मुद्दा दर्ता गरेको हो ।

सुप्रिम ठगी प्रकरणमा गोर्खा मिडियामार्फत जोडिएका पूर्व-गृहमन्त्रीसमेत रहेका लामिछानेविरुद्ध चार करोड १५ लाख बढी र पूर्व-डिआइजी जोशीविरुद्ध चार करोड २७ लाख बढी बिगो माग दाबी सहितको अभियोग पत्र सरकारी वकिलको कार्यालयले जिल्ला अदालतमा बुझाइएको बताइएको छ । यस्तै, सुप्रिम सहकारीका अध्यक्ष ओमप्रकाश गुरुङविरुद्ध व्यक्तिगत दुई करोड ८८ लाख १४ हजार र सामूहिक दुई करोड सात लाख ९४ हजार गरी चार करोड ९६ लाख आठ हजार बिगो माग दाबी प्रहरी प्रतिवेदनमा गरिएको छ । मुद्दा दर्ता प्रक्रिया अगाडि बढेसँगै लामिछाने थुनछेक बहसका लागि आफ्नो तर्फका कानुन व्यवसायीसहित रुपन्देही आउने तयारीमा रहेको रास्वपा स्रोतले बताएको छ ।

बुटवलको सुप्रिम सहकारीका एक हजार ८३१ बचतकर्ताले सहकारीमा जम्मा गरेको ठूलो रकम हिनामिना गरेको भन्दै सहकारीका संरक्षक गितेन्द्रबाबु (जिबी) राई, अध्यक्ष ओमप्रकाश गुरुङ, सहितका पदाधिकारी, सञ्चालक तथा कर्मचारीहरूविरुद्ध २०७९ सालको चैतमै प्रहरीमा उजुरी दिएका थिए । त्यसपछि सुरु भएको प्रहरीको छानविन अनुसन्धानले सर्वसाधारणबाट जम्मा गरेको एक अर्ब ३१ करोड मध्ये ८६ करोड १८ लाख बढी रकम राई र गुरुङको समूहले अपचलन गरेको खुलेको थियो ।

यसअघि सर्वोच्च अदालतमा पठाइएको सक्कल फाइल आउन ढिलाइ भएको भन्दै सरकारी वकिलको कार्यालयले शुक्रबार अदालतमा पूरक मुद्दा लैजान नसकेको जनाएको थियो । आइतबार भने कार्यालय खुलेपछि लामिछाने र जोशी लगायतको मुद्दा अदालतमा लगिएको हो ।

किन पर्‍यो पूरक मुद्दा ?
गत वैशाखमै जिबी सहितका २८ जनाविरुद्ध जिल्ला अदालतमा सहकारी ठगीको मुद्दा दर्ता भएको थियो । ती २८ जनामध्ये सहकारीका संरक्षक जिबी राई, अध्यक्ष ओमप्रकाश गुरुङ सहितका १७ जना सञ्चालक तथा कर्मचारीविरुद्ध सहकारी ठगीसँगै संगठित अपराधको मुद्दा दर्ता भएको हो । बाँकी ११ जनाविरुद्ध सहकारी ठगीमा मात्रै मुद्दा चलेको हो ।
अनुसन्धानकै क्रममा जिबी, छवि र रवि संलग्न रहेको गोर्खा मिडिया नेटवर्कमा मात्रै सुप्रिमबाट १४ करोड रुपैयाँ गएको पाइएपछि प्रहरीले पूरक अनुसन्धान अगाडि बढाएको थियो । जसमा रवि, छवि लगायतका थप १४ जनालाई प्रतिवादी बनाइएको थियो । प्रहरीले दोस्रोपटक गरेको पूरक अनुसन्धान प्रतिवेदनका आधारमा जिल्ला सरकारी वकिलको कार्यालयले मुद्दा दर्ताका लागि पूरक अभियोग पत्र जिल्ला अदालतलाई बुझाएको हो ।

त्यसो त यसअघि सुप्रिम सहकारी ठगी प्रकरणमा गत शुक्रबार जिबी राई सहितका १७ जनाविरुद्ध जिल्ला अदालत रुपन्देहीमा थप अभियोजन मुद्दा दर्ता भइसकेको छ । सहकारीका संरक्षक गितेन्द्रबाबु राई (जिबी), अध्यक्ष ओमप्रकाश गुरुङ, कुमार रम्तेल सहितका १७ जनाविरुद्ध सहकारी ठगी र संगठित अपराधको मुद्दा दर्ता भएको हो । सुप्रिम ठगी प्रकरणमा थप र पूरक गरी ४२ जनाविरुद्ध मुद्दा चल्नेछ । ती ४२ जनाबाट एक अर्ब १२ करोडको रुपैयाँ माग दाबी गरिएको बताइएको छ ।

प्रहरी कार्यालयको प्रतिवेदनका आधारमा जिल्ला सरकारी वकिलद्वारा पूरक अभियोजन
यसअघि इलाका प्रहरी कार्यालय बुटवलले गत पुस २६ गते नै लामिछाने सहितका व्यक्तिलाई प्रतिवादी बनाउनुपर्ने राय सहितको अनुसन्धान प्रतिवेदन जिल्ला सरकारी वकिल कार्यालय रुपन्देहीमा बुझाएको थियो । जिल्ला सरकारी वकिलको कार्यालयले प्रहरीले बुझाएको अनुसन्धान प्रतिवेदन अध्ययन गरेर अभियोगपत्र तयार गरेको हो । जिल्ला सरकारी वकिलको कार्यालयले अदालतमा लैजान लागेको २५६ पृष्ठको पूरक अभियोग पत्रमा लामिछाने र जोशी दुवै जनालाई सहकारी ठगी र संगठित अपराध कसुरको कारबाहीसहित चार करोडभन्दा बढीको बिगो माग गरिएको छ ।
यसअघि लामिछाने र जोशीविरुद्ध पोखराको सूर्यदर्शन सहकारी र काठमाडौंको स्वर्णलक्ष्मी सहकारी ठगीसँगै संगठित अपराध र सम्पत्ति शुद्धीकरणको कसुरमा पोखरा र काठमाडौंमा अभियोग दर्ता भएको थियो । सहकारी ठगी अभियोगमा गत कात्तिक २ गते कास्की प्रहरीको हिरासतमा रहेका लामिछाने अदालतको आदेशपछि ६५ लाख धरौटी बुझाएर पुस २६ गते हिरासतमुक्त भएका थिए । जोशी भने ८८ लाख धरौटीमा रिहा भएका थिए ।

त्यसलगत्तै, लामिछाने जिल्ला अदालत काठमाडौंमा पनि उपस्थित भएर ६० लाख धरौटीमा हिरासत मुक्त भइसकेका छन् भने जोशी काठमाडौं अदालतमा अझै उपस्थित भएका छैनन् । रुपन्देहीमा पूरक अभियोग पत्र दायर भएपछि लामिछाने र जोशीलाई रुपन्देही ल्याइनेछ । त्यसपछि चितवनको साहारा र पर्साको सानोपाइला सहकारी प्रकरणमा पनि उनीहरू दुवै जनाविरुद्ध मुद्दा चलाउने तयारी छ । – यज्ञराज पाण्डे