काठमाडौं । नेपालमा पछिल्लो समय उत्पन्न भएको विनाशकारी प्राकृतिक विपत्ति र त्यसबाट भएको ठूलो मानवीय क्षतिप्रति ऐक्यबद्धता जनाउँदै नवौं ग्लोबल नेपाली फिल्म अवार्ड–२०२६ स्थगित गरिएको छ।

नेपाल फिल्म सोसाइटी, ग्लोबल नेपाली फिल्म अवार्ड एलएलसी अमेरिका तथा भारा इन्टरटेन्मेन्ट अष्ट्रेलियाको संयुक्त आयोजनामा अष्ट्रेलियाको सिड्नीमा आगामी डिसेम्बर १७, २०२६ मा आयोजना गर्ने तय भएको अवार्ड कार्यक्रम हालका लागि स्थगित गरिएको आयोजकहरूले संयुक्त प्रेस विज्ञप्तिमार्फत जानकारी दिएका छन्।

आयोजक संस्थाहरूले नेपालमा आएको अकल्पनीय प्राकृतिक विपत्तिले सिंगो राष्ट्रलाई गहिरो पीडा र शोकमा डुबाएको उल्लेख गर्दै यस्तो संवेदनशील समयमा उत्सवभन्दा राष्ट्रिय पीडा र मानवीय संवेदनालाई प्राथमिकता दिनु उचित ठानेर कार्यक्रम स्थगित गर्ने निर्णय गरिएको जनाएका छन्।

विपत्तिमा धेरै अमूल्य जीवन गुमेको, ठूलो संख्यामा परिवारले आफ्ना आफन्त गुमाएको र देश अझै पनि उद्धार, राहत तथा पुनर्स्थापनाको चुनौतीसँग जुधिरहेको अवस्थामा मनोरञ्जनात्मक तथा उत्सवमुखी कार्यक्रम आयोजना गर्नु उपयुक्त नहुने आयोजकहरूको निष्कर्ष छ।

“नेपाल र नेपाली जनताको पीडाभन्दा ठूलो कुनै उत्सव हुन सक्दैन,” विज्ञप्तिमा भनिएको छ, “आज नेपाल रोइरहेको बेला हामी विदेशमा रहेर पनि नेपालको पीडाबाट अलग रहन सक्दैनौं। त्यसैले उत्सवभन्दा पहिले संवेदना, कार्यक्रमभन्दा पहिले ऐक्यबद्धता र मनोरञ्जनभन्दा पहिले मानवीयता रोज्ने निर्णय गरेका छौं।”

ग्लोबल नेपाली फिल्म अवार्ड नेपाली चलचित्र, कलाकार तथा चलचित्रकर्मीहरूको सम्मानसँगै नेपाली कला, संस्कृति र चलचित्रको अन्तर्राष्ट्रिय प्रवर्द्धन गर्ने उद्देश्यले आयोजना हुँदै आएको कार्यक्रम हो।

तर अहिलेको परिस्थितिमा अवार्ड आयोजना गर्नुभन्दा पीडामा रहेका नेपाली जनतासँग उभिनु, उनीहरूको दुःखमा ऐक्यबद्धता जनाउनु र मानवीय जिम्मेवारी निर्वाह गर्नु पहिलो दायित्व भएको आयोजकहरूले बताएका छन्।

यसै भावनाअनुसार डिसेम्बर १७ का लागि तय गरिएको नवौं संस्करण तत्काल आयोजना नगरी स्थगित गरिएको हो। आयोजकहरूले यसलाई विपत्तिको समयमा नेपाल राष्ट्र र नेपाली जनताप्रतिको मानवीय तथा सामाजिक जिम्मेवारी र ऐक्यबद्धताको निर्णय भनेका छन्।

कार्यक्रमको नयाँ मिति भने अहिले घोषणा गरिएको छैन। सम्बन्धित पक्ष, कलाकार, चलचित्रकर्मी, प्रायोजक तथा साझेदार संस्थाहरूसँग आवश्यक परामर्श र समन्वयपछि नयाँ मिति तय गरिने र त्यसबारे औपचारिक रूपमा जानकारी सार्वजनिक गरिने आयोजकहरूले बताएका छन्।

आयोजकहरूले प्राकृतिक विपत्तिमा ज्यान गुमाएकाहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेका छन्। साथै प्रभावित नागरिकको उद्धार, राहत तथा पुनर्स्थापनामा खटिएका सुरक्षाकर्मी, सरकारी तथा गैरसरकारी निकाय, संघसंस्था र स्वयंसेवीहरूप्रति सम्मान व्यक्त गरिएको छ।

विश्वभर रहेका नेपाली चलचित्रकर्मी, कलाकार, सञ्चारकर्मी, दर्शक, शुभेच्छुक, सहयोगी तथा प्रायोजकहरूको निरन्तर साथ र सहयोगप्रति आभार व्यक्त गर्दै कार्यक्रम स्थगनको निर्णयलाई राष्ट्रिय ऐक्यबद्धता र मानवीय संवेदनाको भावनाका रूपमा बुझिदिन पनि आयोजकहरूले आग्रह गरेका छन्।

परिस्थिति सामान्य भएपछि नवौं ग्लोबल नेपाली फिल्म अवार्डलाई अझ व्यवस्थित, गरिमामय र भव्य रूपमा आयोजना गर्ने प्रतिबद्धतासमेत आयोजकहरूले दोहोर्‍याएका छन्।

“नेपालसँगै छौं, नेपाली जनताको दुःखमा हामी पनि सँगै छौं,” संयुक्त विज्ञप्तिमा भनिएको छ।

विज्ञप्तिमा नेपाल फिल्म सोसाइटी, नेपालका कृष्ण मल्ल, ग्लोबल नेपाली फिल्म अवार्ड एलएलसी, अमेरिकाका नवराज श्रेष्ठ तथा भारा इन्टरटेन्मेन्ट, अष्ट्रेलियाका अरुण श्रेष्ठ र रुपेश भट्टराईको नाम उल्लेख छ।