प्रधानमन्त्री बालेन्द्र शाहको कार्यशैलीलाई लिएर यतिबेला राजनीतिक वृत्तमा तीव्र बहस सुरु भएको छ। संसद्मा लगातार अनुपस्थित रहने, सांसदहरूले उठाएका प्रश्नको प्रत्यक्ष जवाफ नदिने तर सामाजिक सञ्जालमा भने सक्रिय देखिने प्रवृत्तिका कारण प्रधानमन्त्री शाहमाथि “संसद्प्रति अनुत्तरदायी” बनेको आरोप लागेको हो।

सरकारको वार्षिक नीति तथा कार्यक्रम प्रस्तुत भइरहेका बेला प्रधानमन्त्री शाह प्रतिनिधिसभा बैठकबाट अचानक बाहिरिएपछि विवाद झन् चर्किएको थियो। राष्ट्रपति रामचन्द्र पौडेलले वैशाख २८ गते संसद्मा नीति तथा कार्यक्रम प्रस्तुत गरिरहँदा प्रधानमन्त्री सदन छाडेर बाहिरिनु र त्यसपछि नीति तथा कार्यक्रममाथिको छलफलमा समेत सक्रिय नदेखिनुलाई विपक्षी दलहरूले गम्भीर विषय बनाएका छन्।

संसदीय अभ्यासअनुसार सरकारको नीति तथा कार्यक्रममाथि छलफल सुरु गराउने प्रस्ताव प्रधानमन्त्री स्वयंले पेश गर्ने तथा सांसदहरूले उठाएका प्रश्नको जवाफ दिने परम्परा रहँदै आएको छ। तर यसपटक प्रधानमन्त्री शाहले ती दुवै अभ्यासलाई निरन्तरता नदिएको भन्दै आलोचना भइरहेको छ। प्रधानमन्त्री अनुपस्थित रहेको भन्दै विपक्षी दलहरूले प्रतिनिधिसभा बैठक अवरुद्धसमेत गरेका थिए। पछि सभामुख डिपी अर्यालले विपक्षीको विरोधकै बीच बहुमतबाट नीति तथा कार्यक्रम पारित गराएका थिए।

प्रमुख प्रतिपक्षी नेपाली कांग्रेससहित विभिन्न दलहरूले प्रधानमन्त्री संसद्मा जवाफदेही हुनुपर्ने संवैधानिक दायित्वबाट पन्छिन खोजेको आरोप लगाएका छन्। महँगी, बेरोजगारी, विकास निर्माणमा ढिलाइ, सुशासनलगायतका विषयमा सरकारको स्पष्ट धारणा आउन नसकेको भन्दै विपक्षी सांसदहरू आक्रामक बनेका छन्।

नेपाली कांग्रेस संसदीय दलका नेता भीष्मराज आङ्देम्बेले प्रधानमन्त्रीको कार्यशैलीमाथि प्रश्न उठाउँदै “प्रतिपक्षीले संसद्मा खोज्दा प्रधानमन्त्री नै नभेटिने अवस्था” बनेको टिप्पणी गरेका छन्। उनले नीति तथा कार्यक्रमजस्तो महत्त्वपूर्ण विषयमा समेत प्रधानमन्त्रीले स्वामित्व ग्रहण नगर्नु जिम्मेवारीबोधको कमी भएको संकेत भएको बताएका छन्।

यता प्रधानमन्त्री नेतृत्वको राष्ट्रिय स्वतन्त्र पार्टी (रास्वपा) भने आलोचनालाई राजनीतिक पूर्वाग्रहबाट प्रेरित भएको बताउँदै आएको छ। रास्वपाका नेताहरूले प्रधानमन्त्रीमाथि अनावश्यक रूपमा आक्रमण भइरहेको दाबी गरेका छन्।

संसद्मा अनुपस्थित रहेको आरोप खेपिरहेका प्रधानमन्त्री शाह भने सामाजिक सञ्जालमा निरन्तर सक्रिय देखिएका छन्। शनिबार उनले डिडिसीले उत्पादन गरेको याक चिज खाँदै गरेको तस्वीर फेसबुकमा सार्वजनिक गर्दै “से चिज, डिडिसीको चिज” भन्ने क्याप्सन लेखेका थिए। उक्त पोस्ट सामाजिक सञ्जालमा व्यापक रूपमा भाइरल बनेको थियो।

यसअघि पनि प्रधानमन्त्री शाहले सार्वजनिक गरेका पहिरन, चस्मा तथा शैलीले सामाजिक सञ्जालमा ठूलो चर्चा पाउने गरेका छन्। काठमाडौं महानगरपालिकाको मेयर हुँदा प्रयोग गरेको चस्मादेखि हालै लगाएको सेतो पहिरनसम्म बजारमा चर्चित बन्न पुगेको व्यापारीहरू बताउँछन्।

यसैबीच प्रधानमन्त्री तथा मन्त्रिपरिषद्को कार्यालयले प्रधानमन्त्रीको नाम, कार्यालयको लोगो तथा सचिवालयको प्रभाव दुरुपयोग गरी धम्की दिने वा दबाब सिर्जना गर्ने गतिविधिप्रति गम्भीर ध्यानाकर्षण भएको जनाएको छ। कार्यालयले शनिबार विज्ञप्ति जारी गर्दै प्रधानमन्त्रीको नाम लिएर गलत प्रभाव पार्ने जो–कोहीमाथि कानुनी कारबाही गरिने चेतावनी दिएको छ।

प्रधानमन्त्री कार्यालयले कुनै पनि व्यक्तिले प्रधानमन्त्री वा सचिवालयको नाम प्रयोग गरेर फोन, भेटघाट वा सामाजिक सञ्जालमार्फत धाकधम्की दिएमा तत्काल सुरक्षा निकायलाई जानकारी गराउनसमेत सर्वसाधारणलाई आग्रह गरेको छ।

यसैक्रममा प्रधानमन्त्री कार्यालयको नाम दुरुपयोग गर्दै दैलेखका एक वडा सचिवलाई धम्की दिएको आरोपमा प्रकाश खड्का नामक युवक पक्राउ परेका छन्। उनी राष्ट्रिय स्वतन्त्र पार्टी निकट कार्यकर्ता रहेको खुलेको प्रहरीले जनाएको छ। आरोपअनुसार उनले आफू प्रधानमन्त्री कार्यालयबाट बोलेको भन्दै वडा सचिवलाई गालीगलौज गर्दै आफ्ना चिनजानका व्यक्तिको काम तत्काल गरिदिन दबाब दिएका थिए। जिल्ला प्रहरी परिसर काठमाडौंले उनलाई नियन्त्रणमा लिएर अनुसन्धान अघि बढाएको जनाएको छ।