बेलायतको राजधानी लन्डनमा फेरि एकपटक दक्षिणपन्थी तथा आप्रवासनविरोधी प्रदर्शनले राजनीतिक माहोल तातेको छ। “युनाइट द किङडम” नाम दिइएको विशाल प्रदर्शनमा हजारौँ मानिस सहभागी हुँदा बेलायती राजनीतिमा कट्टर राष्ट्रवाद र दक्षिणपन्थी आन्दोलन झन् संगठित बन्दै गएको संकेत देखिएको छ।

यो प्रदर्शनको नेतृत्व इस्लामविरोधी अभिव्यक्ति र आपराधिक मुद्दाका कारण विवादित बनेका टमी रोबिन्सनले गरेका थिए। स्टेफन याक्सली–लेनन नामका रोबिन्सन लामो समयदेखि बेलायतमा आप्रवासनविरोधी अभियान चलाउँदै आएका व्यक्ति हुन्। गत सेप्टेम्बरमा लन्डनमा भएको उनको विशाल प्रदर्शनलाई धेरैले बेलायती राजनीतिमा “टर्निङ पोइन्ट” का रूपमा लिएका थिए। त्यसबेला लन्डनका मेयर सादिक खानले “देशमा केही परिवर्तन भएको महसुस भएको” टिप्पणी गरेका थिए।

शनिबारको प्रदर्शनमा सहभागीहरू मुख्यतः अवैध आप्रवासी हटाउनुपर्ने, बेलायतको “खोइएको महानता” फर्काउनुपर्ने र कडा राष्ट्रवादी नीति लागू गर्नुपर्ने माग गर्दै सडकमा उत्रिएका थिए। धेरै प्रदर्शनकारीहरूले बेलायतमा बसोबास गरिरहेका आप्रवासीहरूलाई सामाजिक सुविधा उपभोग गरेर राज्यलाई भार बनाएको आरोप लगाए।

टमी रोबिन्सनले संसद् भवनअगाडि समर्थकहरूलाई सम्बोधन गर्दै “तपाईंहरू ‘ब्याटल अफ ब्रिटेन’ का लागि तयार हुनुहुन्छ ?” भन्दै उत्तेजक भाषण दिएका थिए। उनले आगामी आमनिर्वाचनअघि आफ्ना समर्थकहरूलाई “सक्रिय अभियन्ता” बन्न आह्वान गर्दै “अब नउठे देश सधैँका लागि गुम्ने” चेतावनी दिए।

बेलायती प्रधानमन्त्री कीर स्टार्मरले भने शान्तिपूर्ण प्रदर्शनको अधिकार स्वीकार गरे पनि आयोजकहरूले “घृणा र विभाजन फैलाइरहेको” आरोप लगाए। उनले चरम दक्षिणपन्थी विचार फैलाउन बेलायत आउन खोज्ने केही विदेशी अभियन्ताहरूलाई भिसा नदिइएको पनि बताएका छन्।

प्रदर्शनमा सहभागी धेरैले दक्षिणपन्थी पार्टी “रिफर्म यूके” को समर्थनमा निलो–हरियो (टर्क्वाइज) रंगका कपडा लगाएका थिए। उक्त पार्टीका नेता निगेल फराज ब्रेक्जिट अभियानका प्रमुख अनुहारमध्ये एक मानिन्छन् र अमेरिकी राष्ट्रपति डोनाल्ड ट्रम्पका निकट सहयोगीसमेत मानिन्छन्। हालैको स्थानीय निर्वाचनमा रिफर्म यूकेको प्रभाव बढेपछि सत्तारुढ लेबर पार्टी दबाबमा परेको विश्लेषण गरिएको छ।

तर केही प्रदर्शनकारीहरूका लागि फराज पनि पर्याप्त कठोर नरहेको देखियो। उनीहरूले “रिस्टोर ब्रिटेन” नामक अर्को दक्षिणपन्थी अभियानलाई समर्थन गरेका थिए, जसको नेतृत्व रुपर्ट लोवले गरिरहेका छन्। उक्त समूहले ठूलो मात्रामा आप्रवासी निष्कासन गर्नुपर्ने र बेलायतलाई आप्रवासीका लागि “कठोर वातावरण” बनाइनुपर्ने माग गर्दै आएको छ।

प्रदर्शनका कारण सम्भावित झडप रोक्न लन्डन मेट्रोपोलिटन प्रहरीले ठूलो सुरक्षा व्यवस्था मिलाएको थियो। सोही दिन शहरमा प्यालेस्टाइन समर्थक प्रदर्शनसमेत भएका कारण सुरक्षा निकाय सतर्क बनेका थिए। प्रहरीले विभिन्न घटनामा ११ जनालाई पक्राउ गरेको जनाएको छ।

प्रदर्शनमा धार्मिक र राष्ट्रवादी भावनासमेत तीव्र रूपमा प्रस्तुत गरिएको थियो। केही वक्ताहरूले “क्रिश्चियन विश्वासको रक्षा” को नाममा भाषण दिए भने दोस्रो विश्वयुद्ध र नाजीविरुद्ध लडाइँको प्रसंग उठाउँदै राष्ट्रवादी भावना भड्काउने प्रयास गरिएको देखिएको थियो।

त्यहाँ डोनाल्ड ट्रम्प, इजरायल र इरानका पूर्व राजतन्त्र समर्थकहरूको झण्डासमेत देखिएको थियो। इरानी मूलका केही प्रदर्शनकारीहरूले अमेरिका–इजरायलले इरानमाथि गरेको आक्रमणमा बेलायत सहभागी नभएको भन्दै प्रधानमन्त्री स्टार्मरको आलोचना गरेका थिए। उनीहरूले इरानमा शासन परिवर्तनको अपेक्षा राखेको बताएका थिए।

विश्लेषकहरूका अनुसार यो प्रदर्शन केवल आप्रवासनविरोधी आन्दोलन मात्र नभई ब्रेक्जिटपछि बेलायतमा बढ्दो असन्तुष्टि, आर्थिक असुरक्षा र राष्ट्रिय पहिचानको बहससँग जोडिएको ठूलो राजनीतिक संकेत पनि हो। सन् २०१६ को ब्रेक्जिट अभियानमा गरिएको “कन्ट्रोल फिर्ता ल्याउने” नारालाई धेरै प्रदर्शनकारीहरूले अझै अधुरो सपना मानिरहेका छन्।